MATTHE 10

Ang Düihpüi Gha-lei-goi

(Mk 3:13-19; Lk 6:12-16)

1 Bawipa Jesuh naw ang düihpüi chang sing gha-lei-goi cu khü gui netah, khoshe gui ami k’täm nak hning vai la gaw nak phung ami gai sak nak hning vai ah, huham cu pe gui ci. 2Ang düihpüi gha-lei-goi ah ami ming gui cu; (Peter ami ciah) Simon la anau Andru; Zebedee ah hta goi James la Johan; 3Philip la Bartolome; Thomas la Matthe akhawn look; Alphaeus ah hta James la Thaddaeus; 4M’lungling ciah Simon; la Bawipa Jesuh gaa-am ap ciah Judas Iskariot gui ah kyak ci.

Chang Gha-lei-goi ah Bi Bi Nak

(Mk 6:7-13; Lk 9:1-6)

5Ang düihpüi chang gha-lei-goi cu Bawipa Jesuh naw shikchaa m’cäi ne tüi gui ci; “Chang pakhui hei gui ah kho gui ung la Samaritan gui ah pigaw gui ung kä nami hteh vai. 6Maih ciah hto gui ah kyak ciah Israel chang gui ah om nak ah hteit ne, 7‘Khankho uknak ng’et lawk ci nei,” cine ng’thu pyein vä! 8Akgaw gai sak vä, aksi m’ghin ba vä, kheei lei ah ei gui theek sak vä, khoshe gui k’täm vä, Khanpughi ah m’gein nak kä khleih ah nami gah ci kyasei, chang gui am a phu kä lak ah vah pe vä. 9Ghui la ngui ni, khawh cham ni gui m’khäp ne kä nami k’bah vai. 10Ng’yoih nak ah ng’ip, k’htu ang yung akda, phahnak la ng’shopawng gui phi kä nami hteh püi vai. A i ah kyasei ci ung bi bik ciah chang ah ang yak hlü cu peit taak vai ah kyak ci. #1Kor 9:14; 1Tim 5:18

11A i pigaw ung nami gawk law ung phi, ning dou gui khai ah chang nami shui vai. Cun ah pigaw ungka kä nami hteh ba pha ah chuih nami kai nak ah im ung nami om tu vai. 12Im kyong ah nami gawk ung ‘yeikyai nak om sä’ cine nami yavaih vai. 13Im mah gui naw yei ne ami ning dou gui ung, nangmi ah yeikyai yavaih nak cu ngami ung gawk khai, kä ami ning dou gui ah a kiak ung nami yeikyai yavaih nak cu, nami mät ung law ba khai. 14Kä ning dou gui ne nami ng’thu kä ngai ciah im, pigaw a om ah a kiak ung, acun ungka lut law ba ne, nami kho ung m’vut phi nami khawn shüt vai. #Lt 13:51 15Kei naw akcang ka pyein cu, m’khoichaa nak ah hnüüp ung cun ah pigaw gui cu, Sodom la Komorrah ah tah nui pi ciah m’shet nak cu hmuk khai nei. #Mt 11:24; Tün 19:24-28

Bui-aut Vai ah Dukdeiu Nak Gui

(Mk 13:9-13; Lk 21:12-17)

16‘Ngai vä! Hngei khli ah ng’lung ah htome hta chah ah mäih ah, kei naw ka ning tüi gui ci nei. Cun ah kyasei, k’phyu ah mäih ah theileh u ne, am äm kä om ciah müm kha ah mäh ah nami m’lung gei sä. #Lk 10:3 17Geing nah ne nami om vai, chang gui naw ning pha gui ne yung ah m’kawt ung ning hteh püi gui khai gui. 18Mang ah im ung ning tuthat gui khai gui. Nangmi cu kei ah hmawk ah uk-chuk ci gui la ghangpughang gui ah ma ah ning hteh püi gui khai gui. Cun ah kyasei ngami gui la a pakhui hei gui-am ng’thu k’ni cu nami m’thein gui khai. 19Cun gui ah kut ung ami ning ap gui ung, a i pyein ne ng’thu vai, a i ah ng’thu vai cu kä nami ng’ä vai; 20A khin a gawk law ung nami ng’thu vai gui cu gawk lawk khai. Cun ah ng’thu gui cu nangmi ah thu ah kä kyak ci, nami Pa Khanpughi naw mümcha awn nangmi ung ang thu ah kyak ci. #Mk 13:9-11; Lk 12:11-12; 21:12-15

21‘Chang phäi nau gui tumat la tumat sih nak ung ng’ap tuk khai gui, nupa gui naw ami hta gui sih nak ung ap khai gui, ami hta gui naw phi, ami nupa ah m’cäi kä ngai ne ngawn phak khai gui. #Mk 13:12; Lk 21:16 22Kei ah hmawk ah chang naw ning gen gui khai, cun ung phi ak hnubäih ah khüt sei, düng ciah chang cu, hun phiawn nak gah khai. #Mt 24:9, 13; Mk 13:13; Lk 21:17 23Pigaw tumat ung ami ning shedam nak gui ung, a hei pigaw ah nami dawng vai. Kei naw akcang ka pyein cu, Israel kho pigaw päng ung bilawh vai kä nami bi yawp pha ung, chang ah Htapa cu kyum lawk khai nei.

24‘Ng’thei tuk ci cu, m’thei tuk ciah kä hlüngtai pi ci, #Lk 6:40; Jn 13:16; 15:20 25Changshäm cun phi a bawi ah kä hlüngtai pi ci. Cun ah kiasei ng’thei tuk ci naw m’thei tuk ci k’pha ne, changshäm cu a bawi ah mäih ah a kyak tu ung yeikyai vai kyak ci. Im kyong ung ang vai pi cu, Beelyebul ah mi khü ung, im kyong ung om ciah chang hmün gui läi cu, akshe pi ah khü gui vai kyak khai. #Mt 9:34; 12:24; Mk 3:22; Lk 11:15

Kyih Vai Cu A U Ang?

(Lk 12:2-7)

26‘Cun ah kyasei chang kä nami kyih vai, küp gui phung avan ng’hmawng yawp khai, m’yih gui phung avan ng’hmat yawp khai. #Mk 4:22; Lk 8:17 27Hmüp khui ung ka ning m’thein gui ah ng’thu cu khodei ung nami pyein ba vai. Adüm ah nami ng’yak ah ng’thu cu m’kiung khan ah kai ne nami shäü vai. 28Pumsa a ngawn hlawt ung phi Mumcha kä ngawn hlawt cicu kä nami kyih vai; pumsa la mümcha avan m’htei kho ah m’di hning ciah Khanpughi bäng nami kyih vai. 29Biithta hnih cu ngui phe awn khleih hning vai ah kyak ci, cun ung phi biithta tumat phi Pa Khanpughi ah kä hmat ah kä chük maih düt khai. 30Khanpughi naw nami lu ung lumu avan cu khei ne khän ci. 31Cun ah kyasei kä nami kyih vai, nangmi cu biithta akda ah mä nami küikyang pi ci.

Bawi Khrit ah Ng’kiaa ci la Hnu Ng’tuk Püi Ci Gui

(Lk 12:8-9)

32‘Chang gui ah ma ah kei cu ana Bawipa ah pyein ne, m’dang ne ng’kiaa ciah chang cu, kei naw khankho ka Pa ah ma ah, kakchang nei cine m’dang ne ka pyein khai. 33Cun ung phi chang gui ah ma ah kei na hnu ng’tuk püi ciah chang cu, khankho ka Pa ah ma ah kei naw ka hnu ng’tuk püi khai. #2Tim 2:12

Kä Dimdeeih nak Vai, Ng’tai Nak Vai

(Lk 12:51-53; 14:26-27)

34‘Khomdek khan ah dimdeeih nak ka pek khai ah, ka lawk ciah kä nami ngaih-en vai. Dimdeeih nak ka pek khai ah ka lawk ciah kä kiak ci, ng’tai nak vai ah ka lawk ciah kyak ci. 35Pa la hta, nu la hta, kawinu la a hta gui, ami ng’tai nak vai ah kei ka lawk ci. 36Chang tumat ung ak nget pi bäih ah aga cu, amät ah kyong ung kaa ah kyak khai nei. #Mik 7:6

37‘Kei ah mä, anu apa m’hni pi ciah chang cu kei ah düihpüi ah kä kya hlawt khai. Kei ah mä, a hta m’hni pi ciah chang cu, kei ah düihpüi ah kä kya hlawt khai. 38Amät ah kutlamtung kawt ne ka hnu ah kä na läk ciah chang cu, kei ah düihpüi ah kä kya hlawt khai. #Mt 16:24; Mk 8:34; Lk 9:23 39Amät ah hnun ghin nak vai k’tha nak ciah chang cu, a ghin nak maih khai, kei ah hmawk ah a hnun ghin nak pek ciah chang cu ghin nak gah khai. #Mt 16:25; Mk 8:35; Lk 9:24; 17:33; Jn 12:25

M’Cümhnah Nak Gui

(Mk 9:41)

40‘Nangmi ning dou gui cicu kei na dou ciah kyak ci. #Lk 10:16; Jn 13:20; Mk 9:37; Lk 9:48 41Kei na dou ci cu, kei na tüi lawk ci dou ciah kyak ci. Khanpughi ah ang shä tüih m’hni ne dou ciah chang cu, chang k’ni ah gah ah m’cümhnah nak gah tuk khai. 42Kei naw akcang ka pyein cu, kei ah kang khahpüi gui ung kaa, akhmaw pi-am tui k’gei m’yak ät tu ciah chang cu, kei ah kang khahpüi ah gah ah m’cümhnah nak cu, kä gah ah kä om khai.

Currently Selected:

MATTHE 10: CBC

Highlight

Copy