MATTHE 9

Bawipa Jesuh Naw Shum Ciah Chang Gai Sak ci

(Mk 2:1-12; Lk 5:17-26)

1 Bawipa Jesuh cu hleiko ng’cum ne, tuili ah vang-gaa ah va kai ba netah, amät ah pigaw ah hteit ba ci. 2Cun yah ung chang gui naw akshum tumat kawt ne law püi ci gui. Bawipa Jesuh naw cun ah chang gui ah yum nak cu hmu netah, shum ciah chang-am, “Kahta, kä na ng’ä vai, na katnak cu ning k’phiawn pyii nei,” cik ci.

3Thukhän saya amshah gui naw, “Shin ah chang cu Khanpughi ah khan ah katnak awn ng’thu pyein ci nei,” cine ami mät ng’cengcäk ci gui.

4 Bawipa Jesuh naw, ngami ah ngaih cu hmat netah, “Nangmi a i ah kiasei cän ah akshe ah nami ngaih-tüh ang? 5Na katnak ning k’phiawn pyii nei, ci ang a yäi tu ba, tho law ne hteit ä, ci vai ang a yäi tu ba? 6Cun ung phi chang ah Htapa naw, khomdek khan ah katnak ak phiawn hning cu, ka ning hmuh sak gui khai nei; ci netah shum ciah chang-am, “Tho law ne na ih phak look ne, na im ah hteit ba ä,” cine pyen nak ci.

7Cun ah chang cu tho law ne a im ah hteit ba ci. 8Acun ah mawng hmuh teng tuk ciah chang gui cu cäicat u netah, chang gui-am shin ah mäih ah huham pek ciah Khanpughi cu m’hlüngtai ci gui.

Bawipa Jesuh Naw Matthe Khü Ci

(Mk 2:13-17; Lk 5:27-32)

9 Bawipa Jesuh naw cun ungka a hteh nak ba lam ah, ayung kyong ah ngok ciah, akhawn look ciah Matthe cu hmu netah, “Ka hnu ah na läk ä,” cine kyak na sei, Matthe cu tho law ne a hnu ah läk tuk ci.

10 Bawipa Jesuh cu Matthe ah im ah mü ei a ei tu yah ung, akhawn look ci gui la ami shadam nak ah chang gui phi vun ne ei tuk ci gui. 11Acun gui cu Pharisee gui naw hmuh u netah, “Nami saya cu a i ah kiasei, shin ah changshe gui awn vun vai ne a ei awk tu ang?” ci ne ang düihpüi gui cu ng’shik ci gui. #Lk 15:1-2

12Cun ah ami ng’shi gui cu Bawipa Jesuh naw ng’yah netah, “Akgai ah hmawk ah khisa ya kä hlü ci, akgaw ah hmawk ah vah hlü ci, 13Kei cu peit taak ah mä m’gein nak kam hni pi ci, ciah cacim cu teng ne vang ngaih-tüh ba vä. Kei cu chang k’ni gui ka hun gui khai ah ka lawk ciah kä kyak ci, changshe gui ka hun gui khai ah ka lawk ei nei,” cine pyen na gui ci. #Mt 12:7; Hos 6:6

Ei Hlawi ah Mawng

(Mk 2:18-22; Lk 5:33-39)

14Cun kawn ah Johan ah ang düihpüi gui cu Bawipa Jesuh ah pei ah law u netah, “Keimi la pharisee gui cu a shäng shäng ei kami hlawi ci, cun ung phi nang Bawipa ah düihpüi gui cu, a i ah kiasei ei kä ami hlawi tu ang? cine ng’shik ci gui.

15 Bawipa Jesuh naw, “Chumah khai ah pamihta ah a teihpüi gui cu, cun ah pamihta awn a täng ah ami om yah ung, thüisei khai gui ang? Cun ung phi cun ah pamihta cu ngami ungka la ne ami hteh nak püi vai ah a khin gawk lawk khai nei. Cun kawn ah ngami cu ei hlawi khai gui nei.

16A u naw phi sui ak kheei cu sui akthai awn kä k’dawm man ci nei. K’dawm ah a kyak ung akthai naw kaih sei ak kheei cu teek law pi ci. 17Sapyit tui asü phi a u naw um akshe ung kä than man ci, than ah a kiak ung um pawk sei sapyit tui phi ng’chawt yawp khai. Cun ah kiasei um phi kä sheka ne sapyit tui phi kä ah dimaih vai ah sapyit tui asü cu um akthai ung than man nei,” cine m’cäi gui ci.

Zungbawi ah Htahnumi La Bawipa Jesuh ah Suinu Tawk Ciah Hnumi

(Mk 5:21-43; Lk 8:40-56)

18 Bawipa Jesuh naw cun ah ng’thu a pyein yah ung, Jew chang yungbawi tumat cu Bawipa Jesuh ah pei ah law ne m’khuukdoong netah, “Ka hta hnumi cu tuhbäi hta sik ci nei, cun ung phi nang Bawipa law ne ak khan ah na kut na taih ah a kyak ung, ani cu ghing ba khai nei,” cine ng’hui ng’paa ne pyein ci.

19Cun ah kyasei Bawipa Jesuh cu ng’düi law ne ani awn a täng ah hteit tuk ci. Ang düihpüi gui phi hteit tuk ci gui.

20Kho kum gha-lei-goi ung asi ng’chawt sei gaw ciah hnumi tumat cu, Bawipa Jesuh ah hnu ah hei k’et netah, 21“A suinu ah a pyai hta pang ka va tawk ung kei ka gai khai,” ci ne ngai ne, a yih pyai cu va tawk ci.

22 Bawipa Jesuh naw ng’hlat ne va teng ne cun ah hnumi cu hmu netah, “Ka hta hnumi kä ng’ä ai ä, na yum nak naw ning gai sak pyii ci nei,” cik ci. Acun vai-am cun ah hnumi cu gai ci.

23 Bawipa Jesuh cu yungbawi ah im ah gawk law netah, gook htüm ne, tum ng’lam ci gui cu hmu gui ci. 24Cun kawn ah Bawipa Jesuh naw, “Ng’nawn vä, shin ah hnumi hta sik ciah kä kyak ci, ip ci nei,” cine kya khätah, chang gui naw päipih ci gui. 25Bawipa Jesuh naw chang gui akpung ah tüi gui netah, kyong ah va lut ne, cun ah hnumi hta ah kut cu k’pang ne, m’hto ba khätah hnumi hta cu tho law ba ci. 26Cun ah a mawng cu cun ah kho avan ung thang yawp ci.

Amik M’dauh Chang Pahnih M’dei Sak Ci

27 Bawipa Jesuh cu cun ungka hteit ba khätah, amik m’dauh ciah chang pakhnih naw läk law ni netah, “David ah Htapa nam htei goi ä,” cine m’lau ci goi.

28 Bawipa Jesuh cu im tumat ung a gawk law yah ung, cun ah chang goi cu gawk lawk ci goi. Bawipa Jesuh naw, “Kei naw nani mik ka ning m’dei sak goi hning ciah nani yum ci ang?” cine ng’shi goi khätah, “Kani yum ci nei,” cine pyein ci goi.

29 Bawipa Jesuh naw, ani mik tawk goi netah, “Nani yum ah mäih ah kia sä,” cine kyak na goi khätah, 30ani mik cu acun vai-am m’dei lawk ci. Bawipa Jesuh naw, “Shin ah a mawng cu a u-am kä nani m’thein-en vai,” cine khän ne m’cäi goi ci.

31Cun ung phi ngahni cu ani hteh ba vai-am Bawipa Jesuh ah a mawng cu, cun ah kho avan ung thang khai ah pyein ci goi.

Bawipa Jesuh naw Chang ak Ang Thu Thei Sak Ci

32Ngahni ani hteh ba kawn ah chang gui naw khoshe naw kai sei, ang ciah chang tumat cu Bawipa Jesuh ah law püi ci gui. 33Bawipa Jesuh naw khoshe ak täm vai-am cun ah ak ang cu ng’thu law thei sei, cun hmuk ciah chang gui cu cäicat u netah, “Shin ah mäih ah a mawng ama cu Israel kho ung kä hmuh man nei,” ci ne pyein ci gui.

34Pharisee gui naw, “Shin ah chang naw, khoshe bawi ah peit ah huham awn, khoshe cu k’täm ci nei,” cine pyein ci gui. #Mt 10:25; 12:24; Mk 3:22; Lk 11:15

Bawipa Jesuh Naw Chang gui M’gein Gui Ci

35 Bawipa Jesuh cu gawnu, gawhta apigaw päng ung hteit ne, pum im gui ung m’theithang gui ci. Khanpughi ah uknak kho a mawng thu k’ni gui cu m’theithang gui ne, gawpai nak a hlü hlü ung gawpai ci gui phi gai sak gui ci. #Mt 4:23; Mk 1:39; Lk 4:44 36Chang gui cu htoshäm kä om ciah htome gui ah mäih ah, ami ngaih u vai kä om sei, ami ng’ä ai cu hmuh gui netah, chang gui cu m’gein gui ci. #Kn 27:17; 1Gpg 22:17; 2Stn 18:16; Ezk 34:5; Mk 6:34 37Cun ah kyasei Bawipa Jesuh naw, “Khäm vai htangmguh da pang sei phi, khäm ciah chang gui cu ken aih ci gui. 38Cun ah kyasei htangmguh khäm khai a tüih law vai ah, htangmguh nak ciah taigü vä,” cine ang düihpüi gui cu m’cäi gui ci. #Lk 10:2

Currently Selected:

MATTHE 9: CBC

Highlight

Copy