MATTHE 14

Tuihnim Johan ah Sih Nak

(Mk 6:14-29; Lk 9:7-9)

1Cun yah ung Kalile kho uk ciah Herod naw Bawipa Jesuh ah a mawng cu ng’ya netah, 2“Ani cu sih nak ung ka tho ba ciah Tuihnim Johan akcang ah kiak khai. Cun ah kya ne ani ung cäi aih nak vai m’dang nak hning ah hlüngtai nak gui om ciah kyak ci,” cine ak chang vai gui-am kiak na gui ci.

3Herod naw Johan cu anau Philip ah chu, Herodias ah mawng awn pha ne thawng ung a chum te ah kyak ci. 4A i ah kyasei ci ung Johan naw, “Na nau ah chu Herodias, cu na khäm tu ba vai ah kä nik ci,” cine a kyak nak ah phäh ah kia ci. 5Herod naw Johan cu ngawn hlü te ci, cun nung phi Jew chang gui naw Johan cu profet ah k’bäi u khätah, ngah mi cu kyih gui ne kä ngawn ci.

6Herod ah ang tüi nak hnüüp ung Herodias ah hta hnumi hta cu mang khin gui ah ma ah ak ni ah lam khätah, Herod cu ang htei ah yei ci. 7Cun ah kyasei Herod naw cun ah hnumi hta-am, “Nam hni a i phi ng’yoi ä, ka ning pek khai,” cine khän ne pyen nak ci.

8Cun ah hnumi hta naw anu ah m’cäi ah, “Tuihnim Johan ah lu cu tawnglang ung khäp ne, atuhbäi na peä,” cine pyein ci.

9Herod mang cu ang htei ah a yä pang ne phi, khin chang gui ah ma ah khän ne a pyein pyi ah kyasei, hnumi hta naw a pyein ah mäih ah pek vai ah bäi ci. 10Cun ah kyasei Johan ah lupum cu thawng kyong ah chün sak gui netah, tawnglan ung khäp ne hnumi hta-am pek sak gui ci. 11Hnumi hta naw cun ah lupum cu anu ah om nak ah hteh püi ci. 12Johan ah ang khahpüi gui naw law ne, a gook cu hteh püi ba u ne, phuh ci gui. Cun kawn ah Bawipa Jesuh ah hteit ne a mawng avan cu m’thein tuk ci gui.

Bawipa Jesuh naw Chang Phia Hma-kip M’bei Ci

(Mk 6:30-44; Lk 9:10-17; Jn 6:1-14)

13Cun ah a mawng gui cu Bawipa Jesuh naw ng’ya hetah, amät bäng hleiko awn ading gei nak ah hteit ci. A pigaw päng ung chang gui naw, Bawipa Jesuh ah a hteh cu ng’ya u netah, kawnglam ung hteit ne läk ci gui. 14Bawipa Jesuh naw hleiko ung a kai kawn ah chang gui cu teng gui ne m’gein gui netah gawpai ci gui cu gai sak gui ci.

15Kho mühun law khätah ang düihpüi gui cu Bawipa Jesuh ah pei ah law u netah, “Shin yah cu chang ah kä om nak ah kya ci, kho phi mü lawk khai kyak ci, shin ah chang gui pigaw gui ah hteit ne, ami mü-ei vai ami hleih vai ah tüi gui ä,” cine pyein ci gui.

16 Bawipa Jesuh naw, “Ngahmi kä hteit u sä, nangmi naw ami ei vai pe gui vä,” cine pyen na gui ci.

17Ang duihpüi gui naw, “Keimi ung m’htut pum hma la nga pahnih bäng om ci nei,” cik ci gui.

18 Bawipa Jesuh naw, “Cun ah m’htut la nga cu kei ah law püi vä,” cik ci. 19Bawipa Jesuh naw chang gui cu, taa ng’phan khan ah ngoh sak gui netah, m’htut, pum hma la nga pahnih cu la ne, khankho dan ne Khanpughi m’hlüngtai ci. Cun kawn ah m’htut cu bou ne ang düihpüi gui-am pe gui ci, ngami naw chang gui-am tei gui ci gui. 20Chang gui avan naw ami ei kawn ah ak pawih cu them-dawn ung a gha-lei-goi ah kaw ba ci gui. 21Hnumi gui la ak hmaw hta gui kä khei tu ah m’htut ei ciah pami ng’vai bäng cu phia hma-kip lawk ci.

Bawipa Jesuh cu Tui ah Khan ah Hteit Ci

(Mk 6:45-52; Jn 6:15-21)

22Cun kawn ah Bawipa Jesuh naw chang gui cu ami im ah tüi ba gui netah, ang düihpüi gui cu hleiko ung kai sak gui ne, tuili vangtäng ga ah vang kah sak gui ci. 23Cun ah chang gui a tüih ba gui kawn ah amät cu taigü khai ah khomhtung khan ah kai ci. Kho mü law güt sei a cu ah amät om ci. 24Cun yah ung ang düihpüi gui ah hleiko cu tuili lai ah gawk pyi ci. Kho khi ng’hlat sei hleiko cu tui naw hnawk püi ci.

25Ngawilam ai khong htük ung Bawipa Jesuh cu ang düihpüi gui ah om nak ah lawk khai ah tui khan ah ana a vük ci. 26Cun ah tui khan ah düi ne ana avü cu hmu u netah, ang düihpüi gui cu cäicat u ne, “m’cha nei,” cine m’lau ci gui.

27Acun vai-am Bawipa Jesuh naw, “Kä cäicat vä, kei nei, kä kyikyawk vä,” cine pyen na gui ci.

28Cun kawn ah Peter naw, “Bawipa, nang ah na kyak ung, kei cu tui ah khan ah hteit ne nang ah ka law hning vai ah k’bäi ne pyein nä cine pyein ci.

29 Bawipa Jesuh naw, “Law ä,” ci khätah Peter cu hleiko ung kaa kyum law ne, Bawipa Jesuh ah hteit khai ah tui ung ana a pawng vük ci. 30Cun ung phi kho akhi law hmu netah, cäicat ne tui ung yu hnim vü netah, “Bawipa aw, na khui ei tu ba ä,” cine m’lau ci. 31Cun vai-am Bawipa Jesuh gawk law ne, a kut awn Peter cu pang netah, “Na yum nak ken aih ci nei, a i vai kä na ngaih gep ang,” cine pyen nak ci.

32 Bawipa Jesuh la Peter hleiko khan ah ani gawk ba ung kho phi kä khi ba ci. 33Hleiko khan ah om ciah ang düihpüi gui cu Bawipa Jesuh ah kawp ne ngüm yawp u netah, “Nang cu akcang ah Khanpughi ah Htapa ah na kyak ci nei,” cik ci gui.

Kennesaret ung Akgawi Gai Sak ci

(Mk 6:53-56)

34 Bawipa Jesuh la ang düihpüi gui cu hleiko awn tui-kam vangtäng ah vang kat u ne, Kennesaret ah gawk ci gui. 35Cun ah gawnu ung chang gui naw Bawipa Jesuh cu hmat ba u netah, pigaw pei yung avan ung chang gui tüi ne khü sak gui netah gawipai ci gui cu law püi ci gui. 36Cun kawn ah gawpai ci gui naw Bawipa asui pyai hta bawtah ami tawn tu vai ah ng’yoi lawk ci gui. Cun ah tawh tuk ciah chang gui phung cun phi, gai ba ci gui.

Currently Selected:

MATTHE 14: CBC

Highlight

Copy