MATTHE 15

Pupa Gui ah Thungyo Gui Man

(Mk 7:1-13)

1Cun kawn ah Jerusalem ah kaa pharisee gui la thukhän saya gui cu Bawipa Jesuh ah law u netah, 2“A i ah kyasei nang düihpüi gui naw pupa gui ah thungyo man cu kä ami läk ang? ngami cu thungyo man ah kut käm si ah ei ei ci gui nei,” cine pyein ci gui.

3 Bawipa Jesuh naw, “Nangmi a i ah kyasei Khanpughi ah thukhän nawng-en ne, nami mät ah thungyo man düt nami läk ang? 4Khanpughi naw, ‘Nanu la napa cu nak chang m’sui vai, anu pa yüi gen ciah chang cu sih nak gah sä,” cine thu khän ci. 5Cun ung phi nangmi naw, chang tumat ung anu pa-am a peit vai khawh cham a om ung, cun cu Khanpughi-am peit pyi ah kyak ci, anu pa-am a peit vai kä hlü khai, cine nami theithang ci. 6A cu cha ah nangmi cu Khanpughi ah thukhän nawng-en u ne, nami mät ah thungyo cu nami läk ci. 7Thuvi chang gui, nangmi ah mawng Isaiah naw a pyein cu, akcang ah bä ci nei, cun ah thu cu;

8Khanpughi naw, ‘Shin ah chang gui naw, ami shai awn

Kei cu nam hlüngtai ci gui,

Cun ung phi ami m’lung cu kei awn ng’shawng aih ci.

9Ngami naw kei ami na khawihnah cu akholä ah kyak ci,

A i ah kyasei ci ung, ngami naw chang ah pyan ah thukhän gui cu, Khanpughi ah thukhän ah mäih ah, m’theithang ci gui!” cine kyak na gui ci.

Chang Shetkat Sak ciah Amawng Gui

(Mk 7:14-23)

10 Bawipa Jesuh naw chang gui cu a pei ah khü gui netah, “Ka thu cu ngai netah hmat vä, 11Chang shetkat sak cicu m’gawnglei ung yulut vük ciah kä kiakci, m’gawnglei ungka lut lawk ciah kya ci,” cine kyak na gui ci.

12Ang düihpüi gui naw a pei ah law u netah, “Nang Bawipa naw thu na pyein ah phäh ah pharisee gui m’lungkshe ci gui nei, na hmat ci ang?” cine pyein lawk ci gui.

13 Bawipa Jesuh naw, “Khankho Kapa ah geit ah kä kyak ciah a ging phung cu mawi ne ghawh vai nei. 14Cun ah kyasei ngami ah hmawk ah kä nami ng’ä vai, ngami cu amik käm dei ci lam shüm tuk ciah amik m’dauh gui ah kyak ci gui. Amik m’dauh naw amik m’dauh cu lam am shüm ah a kyak ung, ani nik hnih cu m’ghawng ah lut khai goi nei,” cine m’cäi gui ci.

15Peter naw, “Shin ah tumtäng nak cu phlan ne nam thein gui ä,” cine ng’yoi khätah;

16 Bawipa Jesuh naw, “Nangmi phi tuhgüt chang hei gui ah mäih ah a i kä nami hmat phak ci ma? 17M’gawnglei ung yulut vük ci phung avan cu, chikhawn ung yu gawk netah, cun kawn ah ak pung ah aluh law ba cu kä nami hmat ci ma? 18Cun ung phi m’gawnglei ung lut lawk cicu m’lung kyong ungka lawk ciah kya ne, acun naw chang cu shetkat sak ci nei. 19Chang ngawn nak, chang ah chu hta kat püi nak, changshe awn ih om nak, m’guk-ei hleei pyein nak, la chang m’thüi khang nak gui ah kä nik ciah ngaih-tüh gui phung cu, m’lung kyong ungka lut lawk ciah kyak ci. 20Cun gui naw chang cu shetkat sak ci gui. Kut käm si ah ei ei naw chang cu kä shetkat sak ci nei,” cine m’thein gui ci.

Kanan Hnuminu ah Yumnak

(Mk 7:24-30)

21 Bawipa Jesuh cu cun ungka hteit ba ne Tire la Sidon kho ah gawk ci. 22A cu ah om ciah Kanan Hnuminu tumat cu law netah, “David ah Htapa, kei cu nam gein ä, kei ah hta hnumi cu khoshe naw kai sei, geinvai ne ng’yän ci nei,” cine ng’pa ne yoi ci.

23Cun ung phi Bawipa Jesuh naw a i ah phi käm shang ci. Ang düihpüi gui cu a pei ah law u netah, “Shin ah hnumi cu mi hnu ah na läk law gui ne, pamcai ci nei, yüi ne gawt ba ä,” cine pyein ci gui.

24 Bawipa Jesuh naw, “Kei cu maih ciah htome bum ah kyak ciah Israel chang gui ah hmawk bäng ah ka lawk ci nei,” cine m’shang gui ci.

25Cun ci khätah cun ah hnuminu naw akho pei ah khuukdong netah, “Bawipa, kei cu nam gein ä,” cine ng’yoi ba ci.

26 Bawipa Jesuh naw, “Hta hmaw gui ah ei vai cu la ne, ui gui-am kä vuh vai nei,” cine pyein ba ci.

27Cun ah hnuminu naw, “Hman ci nei Bawipa aw, cun ung phi ui gui cun naw, ami mah ah ei nak ung ng’theh ciah ei-book cu ei tu man ci gui nei,” cine pyein ba mä ci.

28Cun ci ba khätah, Bawipa Jesuh naw, “Nang hnumi, nang cu na yum nak däm aih ci nei, nang yak hlü ah mäih ah kya sä,” cine pyen nak ci. Acun yah lung ung cun ah hnuminu ah hta cu gai ba ci,

Bawipa Jesuh Naw Chang Akda Gai Sak ci

29 Bawipa Jesuh cu cun ungka pawng ba ne, Kalile tuilinu kem yung ah hteit ba ci, Cun kawn ah m’htung ah hang kai ne ngok ci. 30Chang gui naw akho khem, amik m’dauh, ak shum, ak ang gui la gawpai ci gui akda a pei ah law u sei, gai ba sak gui ci. 31Ak ang gui thu thei ci gui, apumsa kä küm ci gui küm ba ci gui, akho khem gui hteit thei ci gui, amik m’dauh gui m’dei lawk ci gui, acun gui cu chang gui naw hmu u netah, ang htei ah cäicat u neh Israel gui ah Khanpughi cu m’hlüngtai ci gui.

Chang Phia phli-kip Am bei ah Mawng

(Mk 8:1-10)

32Bawi Jesuh naw ang düihpüi gui cu khü gui netah, “Shin ah chang gui kei awn a täng ah ami om tu cu hnüüp thum lüng lawk ci nei, Ngami ung ei vai kä om ci, kam gein gui ci nei. A i kä tumbei gui ung ami hteh ba ung lamah ami thagui maih khai nei,” cine kyak na gui ci.

33Ang düihpüi gui naw, “Shin ah bung hmu k’pyama ah, chang shi chü ah ei vai, a hawi shui ne gah vai ang?” cik ci gui.

34 Bawipa Jesuh naw, “Nangmi ung m’htut a i chü ang a om,” cine ng’shi gui sei,

“M’htut pum chih la nga api om ci nei,” cine m’thein ba ci gui.

35Cun kawn ah Bawipa Jesuh naw chang gui cu m’dek ung ngoh sak gui ci. 36M’htut pum chih la nga api cu la ne, Khanpughi ah taigü netah, m’htut la nga cu bou ne ang düihpüi gui-am pe gui sei ang düihpüi gui naw chang gui-am tei gui ci gui. 37Chang gui naw ami phü ah ami ei kawn ah ami ei ah ak pawih cu them dawn ung ak chih ah kaw ba ci gui. 38M’htut ei ci gui cu ak hmaw la hnumi kä khei tu ung phia phli-kip lawk ci gui.

39Cun kawn ah chang gui cu Bawipa Jesuh naw tüi ba gui netah, amät cu Makadon kho lam ah hteit ci.

Currently Selected:

MATTHE 15: CBC

Highlight

Copy