MATTHE 16

Cäi-aih Vai Amik Thäh ah Mawng

(Mk 8:11-13; Lk 12:54-56)

1Pharisee gui la Sadducee gui cu Bawipa Jesuh ah pei ah law u netah, ami phawtcam nak ah, Khanpughi a tüih law ah mawng cäi aih vai cu am dang vai ah k’thäh ci gui. 2Bawipa Jesuh naw, “Khohni a hang luh vü vai ung, khosing ang theh ung, kho shen khai cine phi bäi, 3Kho ngawi hta ung hni law lam ah meile a tawt ung kho aa khai ci ne phi bäi, nami pyein man ci. Nangmi cu khomik teng ne kho akhi aa vai cu hmat lang u ne, tuhbäi chü akhin ah a mawng cu m’khoicha ne kä nami hmat ci ma? 4Tuhchü chang gui cu ang htei ah shetkat u ne, düng nak kä om aih ci gui nei. Nangmi naw cäi aih vai nami thäh ci, cun ung phi Jonah ah m’dang ah cäi aih vai ah kawn ah a i nami hmuh vai kä om ci nei,” cine pyen na gui ci.

Cun kawn ah Bawipa Jesuh cu pawng ne a hei lam ah hteit ba ci.

Pharisee Gui la Sadducee Gui ah K’caw

(Mk 8:14-21)

5Ang düihpüi gui cu tuili ah vang ga ah ami vah kai ba yah ung, m’htut ami sho vai sü cu m’hnih shüt ci gui. 6Bawipa Jesuh naw, “Nangmi cu pharisee gui la Sadducee gui ah k’caw cu ngaih na ne nami hlawi vai,” cine m’cäi gui ci.

7Ang düihpüi gui naw, “Mikmi naw ei vai kä mi sho khätah, cun ah a pyein ah kyak khai,” cine ami mät ng’cecäk ci gui.

8Cun ah ami ng’cecäk cu Bawipa Jesuh naw ng’ya gui netah, “A i ah kyasei ei kä nami sho ah mawng pyein ne nami ng’htau ang? 9Zum nak ken ciah chang gui, tuhgüt kä nami hmuhmat lawk ci ma? m’htut pum hma, chang phia hma-kip-am ka tei gui la, ami ei ah pawih dawn ung a i chü nami kaw ba cu, kä nami shüm ba ci ma? 10m’htut pum chih, chang phia phli-kip naw ami ei ah mawng la ami ei pawih dawn ung a i chü nami kaw ba cu, kä nami shüm ba ci ma? 11Ei ei vai ah mawng ka pyein ah kä kyak ci, cicu kä nami hmat ci ma? Pharisee gui la Sadducee gui ah k’caw cu geeik na ne nami hlawi vai nei,” cine pyen na gui ci.

12Cun kawn ah ang düihpüi gui naw, m’htut pyan nak ah k’caw ami hlawi vai ah kä kya ne, pharisee gui la Sadducee gui ah theithang cu kä ami läk-en vai ah Bawipa Jesuh naw am cäi gui cu, hmat lawk ci gui.

Bawipa Jesuh ah Mawng Peter ah Ng’kiaa Nak

(Mk 8:27-30; Lk 9:18-21)

13Sisaria Philippi kho ah ami gawk law yah ung Bawipa Jesuh naw ang düihpüi gui cu, “Chang gui naw chang ah Htapa-am a u ah nei ami pyein?” cine ng’shi gui ci.

14Ang düihpüi gui naw, “Chang amshah naw ‘Tuihnim Johan’ cik ci, amshah naw, ‘Elijah’ cik ci, amshah naw Jeramaih kä cun ung profet ah kyak khai,’ cine pyein ci gui nei,” cik ci gui.

15 Bawipa Jesuh naw, “Nangmi naw mä, kei cu a u ah nei nami na pyein,” cine ng’shi gui ci.

16Simon Peter naw, “Nang cu angtäi ghing ciah Khanpughi ah Htapa, Messiah ah na kyak ci,” cine pyein ci.

17 Bawipa Jesuh naw, “Johan ah hta Simon, nang ung yeikyai nak om ci, shin ah düng ciah a mawng cu chang naw kä hmat hning ci, Khankho ah om ciah Kapa naw a ning m’thein ah kyak ci.

18Cun ah kyasei nang cu, “Kheng lung,” ah ming ciah “Peter” ah na kyak khai, acun ah kheng lung ah khan ah ka pum im ka k’süm khai, cun cu sihnak naw phi kä näng hlawt khai. 19Kei naw nang-am khankho hmawn nak ah htawh gui cu ka ning pek khai. Khomdek khan ung nang naw na khih pawn cu, khankho ah phi khih pawn nak om khai. Khomdek khan ung nang naw na chah cu khankho ah phi chah nak om khai,” cine pyen nak ci.

20Cun kawn ah Bawipa Jesuh naw amät Messiah ah a kyak ah mawng cu, a u-am kä ami m’thein-en vai ah ang düihpüi gui-am m’yih sak gui ci.

Bawipa Jesuh Naw A Yaica nak Vai La A Sih Nak Vai ah Mawng Pyein Ci

(Mk 8:31; 9:1; Lk 9:22-27)

21Cun ah akhin ung tün ne Bawipa Jesuh naw ang düihpüi gui am akdei angdang ah am thein gui cu, “Kei cu Jerusalem ah hteit ne, pum im ung ang vai gui, taigüpa gui la thukhän saya gui ah kut ung dukdeiu nak ka gah khai, cun kawn ah sih nak ung na gawksak khai gui, cun ung phi ak hnüüp thum hnüüp sih nak ung kaa ka tho ba khai,” ciah kyak ci.

22Peter naw Bawipa Jesuh cu a pei ah khü netah, “Bawipa, na pyein gui cu akcang ah kä ah bä-en vai ah, Khanpughi naw shungshet sä. Nang Bawipa cu acun ah a mawng ama gui-awn, a i yah ung phi kä bui awt-en ä,” cine pyein ci.

23 Bawipa Jesuh naw Peter lam ah vang hlat netah, “Nang khoshe a hei ah hteit ä, nang cu vawntam nak vai ah na kyak ci, nang ah ngaih tüh gui cu Khanpughi lam ah kä kyak ci, chang lam ah kiak ci,” cine pyen nak ci.

24Cun kawn ah Bawipa Jesuh naw ang düihpüi gui-am, “Kei awn atäng ah hteit tu hlük ciah chang cu, amät ah ng’yak hlü nawng shüt ne, amät ah kutlam tung kawt netah, ka hnu ah a na läk vai. 25Amät ah hnun ghin nak phiawn hlük ciah chang cu sih nak hmuk khai, kei ah hmawk ah sih nak gah ciah chang cu, ghin nak hmuk khai. 26Chang cu khomdek khan avan a uk ung phi amät ah ghin nak a maih ung a i ah mawng mei ba khai ang? amät ah hnun ghin nak cu a i awn thong ne gah khai ang? 27Chang ah Htapa cu apa Khanpughi ah bämang nak awn ak khankho chang gui awn a täng ah kyum lawk khai. Cun kawn ah chang gui-am, ami mät ah om ih ah ciah, m’cümhnah nak cu pe gui khai. 28Kei naw akcang ka pyein cu, shin ung om ciah chang avan kä a sih pha ung chang ah Htapa cu Ghangpughang ah kya ne law ba khai nei” cine m’cäi gui ci.

Currently Selected:

MATTHE 16: CBC

Highlight

Copy