MATTHE 17

Amüi Ang Khukhlat ah Mawng

(Mk 9:2-13; Lk 9:28-36)

1Ak hnüüp chuk nak ung Bawipa Jesuh naw, Peter ni, James la anau Johan ni cu khah püi gui ne khomhtung ah kai püi gui ci. 2Ngami naw ami hmuh ge ah Bawipa Jesuh ah amüi cu ng’khukhlat lawk ci, a hmai cu khohni ah mäih ah pyü ne, a suisak gui cu bawk-en phäng phäng ne khang ci. 3Cun kawn ah ang düihpüi gui naw, Moses la Elijah dang law ni sei, Bawipa Jesuh awn düi ne thu ng’htau u sei hmuk ci gui.

4Cun ah kya khätah Peter naw, “Bawipa, shin ah hmun cu om nak ah ni aih ci nei, nang naw nang yak hlü ung, nang ah hmawk ah tumat, Mosesah hmawk ah tumat, Elijah ah hmawk ah tumat, k’pyu thum ah ka co khai nei, cine pyein ci.

5Cun ah Peter naw thu a pyein yah ung a bawk phäng phäng ah khang ciah khomei naw küm law gui ci. Cun ah khomei ung kaa ng’shan lawk ciah k’aw cu, “Shin cu kei ah Htapa nei, ani awn ka yei kiai ci nei, ang thu cu ngai vä,” ciah kyak ci.

6Cun ah k’aw cu ang düihpüi gui naw ng’ya u netah ang htei ah kyi kyawk u ne, m’dek ung kaup yawp ci gui. 7Bawipa Jesuh naw law ba ne a kut awn hnün gui netah, “Tho law ba vä, kä kyikyawk vä,” cine pyen na gui ci. 8Ngami naw täu law ba ne teng u khätah Bawipa Jesuh ah kawn ah a u kä om ba ci.

9Cun kawn ah Bawipa Jesuh la ang düihpüi gui cu, khomhtung ah kaa kyum law ba ci gui. Ami kyum law ba yah ung Bawipa Jesuh naw, “Tuhbäi nami hmuh gui cu, chang ah Htapa sih nak ungka a thawh law ba ung khüt sei, a u-am kä nami m’thein vai,” cine ang düihpüi gui-am m’yih sak gui ci.

10Ang düihpüi gui naw, “A i ah kyasei a htük bäih ah ‘Elijah kyum law ba khai,’ cine thukhän saya gui naw ami pyein ang?” ci ne ng’shik ci gui.

11 Bawipa Jesuh naw, “Elijah cu law ba ma ne a mawng ama avan anam khüp ma khai,’ cicu akcang ah kyak ci nei. 12Kei naw akcang ah ka pyein cu Elijah cu gawk law pyi ci nei. Cun ung phi chang gui naw ani cu kä hmat u ne, ani ah khan ah ami bi hlü hlü ah bik ci gui nei. Acun ah mäih ah chang ah Htapacun phi chang gui ah kut ung shedam nak gah khai nei.

13Acun kawn ah ang düihpüi gui naw tuihnim Johan ah mawng a pyein ah hmat lawk ci gui.

Ak Hmaw ungka Khoshe Aktäm ah Mawng

(Mk 9:14-29; Lk 9:37-43a)

14 Bawipa Jesuh la ang düihpüi gui cu chang gui ah om nak ah gawk law ba u khätah, chang tumat cu Bawipa Jesuh ah ma ah law ne khuukdong netah, 15“Bawipa, ka hta cu nam gein pe ä, ani cu mangtak ne, a shäng shäng tui ung phi lut ci, mei ung phi lut ci ci nei. 16Ani cu nang düihpüi gui ah hteh püi ung phi kä gai sak hlawt ci gui nei,” cine pyein ci.

17 Bawipa Jesuh naw, “Nangmi cu nami yum nak kä om sei nami ng’lihlak yawp ci nei. Kei naw nangmi a i güt ka ning om püi gui vai ang, a i güt ka ning ngaih peit gui vai ang, ak hmaw cu ka pei ah law püi vä,” cine pyen na gui ci. 18Bawipa Jesuh naw ak hmaw ungka khoshe cu täm khätah khoshe cu dawng sei, acun vai-am ak hmaw cu gai ci.

19Cun kawn ah ang düihpüi gui cu Bawipa Jesuh amät a om yah ung a pei ah law u netah, “Keimi naw khoshe cu a i ah kyasei kä kami täm hlawt ang?” cine ng’shik ci gui.

20 Bawipa Jesuh naw, “Cun cu nami yum nak a ken su ah kyak ci nei, kei naw akcang ka pyein cu, nangmi ung, anhta ui teih pang yum nak a om ung, shin ah khomhtung cu ‘Ng’nawn ä,’ nami ci ung ng’nawn khai nei. Zum nak awn kä nami m’khüt cu a i kä om khai nei. 21(Khoshe cu, taigü nak la ei hlawi nak ah kawn ah a i awn kä nami m’khüt khai nei),” cine pyen na gui ci.

Bawipa Jesuh naw a Sih nak Vai ah Mawng Pyein ba Mä ci

(Mk 9:30-32; Lk 9:43b-45)

22 Bawipa Jesuh la ang düihpüi gui cu Kalile kho ah ami hteh hton yah ung Bawipa Jesuh naw, “Chang ah Htapa cu chang gui ah kut ung ap khai gui. 23Ani cu ngawn khai gui, cun ung phi ak hnüüp thum hnüüp ung sih nak ungka tho law ba khai,” cine m’thein gui ci.

Ang düihpüi gui cu ang htei ah cäi ng’ä ci gui.

Pum im ah Khawn M’cu nak

24 Bawipa Jesuh la ang düihpüi gui cu Kapernaum ah ami gawk law yah ung khawn look ci gui law u netah, Peter-am, “na saya naw pum im ah khawn m’cu ne ang?” cine ng’shik ci gui.

25Peter naw, “Ä! Pek ci nei,” cine pyein ci.

Cun kawn ah Peter cu kyong ah va lut ba khätah Bawipa Jesuh naw, “Simon, nang naw a i ah nei na ngaih, m’dek khan ghangpughang gui naw, ami mät ah kho chang gui-am ang a khawn ami m’cun sak; a kho hei ah kaa om tuk ciah chang gui-am ang a khawn ami m’cun sak?” cine ma ne ng’shik ci.

26Peter naw, “A kho hei ah kaa om tuk ci gui-am a khawn m’cu sak ci gui nei,” cine pyein ci. Bawipa Jesuh naw, “Cun ah kiasei mät ah kho chang gui cu a khawn käm cu ci gui. 27Cun ung phi ngami kä a mi m’lung she vai ah, tuili ah hteit ne nga vam htuih ä. Ngah na pha ung na pha ma ah m’gawng cu m’aan ne na teng vai. Acun ung tangka tumat na hmuk khai, cun cu kei la nang ah hmawk ah büh khai kyasei, la ne pum im khawn ah nam cu vai,” cine m’cäi ci.

Currently Selected:

MATTHE 17: CBC

Highlight

Copy