Psalms 27
27
Mandaj Diosmi ñucapaj micha, ñucata quishpichij
David rurashca Salmomi.
1Mandaj Diosca, ñucapaj michami, ñucata quishpichijmi.
¿Pitata manllana cani?
Mandaj Diosca, ñuca causaipaj shinlli torreshnami.
¿Pitata manllana cani?
2Nalita rurajcuna, ñucata llaquichijcuna,
ñucata fiñajcuna ñucata micunshna
llaquichingapaj tandanajushpaca,
paicunarami nitijashpa urmanajurca.
3Ashtaca soldadocuna ñucata chaupipi churajpipash,
ñuca shungupica na manllashachu.
Ñucata fiñashpa macanajungapaj jatarijpipash,
ñucaca imatapash na manllashachu.
4Shuj mañanagutallami, Mandaj Diostaca mañarcani.
Chaitami mascasha.
Tucui ñuca causaipi, Mandaj Diospaj huasipi cashpa,
Mandaj Dios juyaillagu cajta ricungapaj,
paipaj huasipi tapushpa yachangapajmi mañarcani.
5Nali punllapica, paimi paipaj jatun
carpapi pacahuanga.
Paipajlla shicanyachishca ucupimi pacahuanga.
Shuj jatun rumi jahuapimi, jahua jahuapi shayachihuanga.
6Chai jipami, ñuca muyundipi tiaj ñucata fiñajcunapaj
ñaupajpi, umata alsanshna ali canapi churahuanga.
Ñucaca, ninan cushijuihuan carashpa huañuchina
animalcunatami, paipaj jatun carpapi carashpa huañuchisha.
Mandaj Diostaca candashpa, tocashpami alicachijusha.
7Mandaj Dioslla, caparishpa,
canda mañajujtaca uyahuayari.
Ñucata llaquishpa, ñuca mañashcatapash tigrachihuayari.
8Ñuca shunguca, canmandaca: “Paita mascaichi” nihuarcami.
Mandaj Dioslla, candallami mascasha.
9Cambaj ñavitaca, ñucamanda ama shujman churapaichu.
Canda servij ñucataca, ama fiñashpa anchuchihuaichu.
Ñucata ayudajmari capangui.
Ñucata quishpichij Taita Dioslla,
ama saquihuaichu, ama jichuhuaichu.
10Ñuca taita mama jichujpipash, Mandaj Diosmi japihuanga.
11Mandaj Dioslla, ñucata fiñajcuna ama
juchachinajuchunga, cambaj ñambi
purinata yachachihuayari.
Ali ñanda pushahuayari.
12Ñucata fiñajcuna paicuna munashcata
rurachunga, ama paicunaman saquihuaichu.
Paicunaca ñucata fiñashpami, llullashpa
villangapaj, ñucata huañuchingapaj munashpa jatarishca.
13Runacuna causanajuj cai pachapi,
Mandaj Diospaj juyaita na crishpaca, huañuimanmi carcani.
14Mandaj Diosta chapariajuilla.
Cambaj shungupica, shinlli tucushpa ama shaijuichu.
Ari, Mandaj Diosta shuyajuilla.
Currently Selected:
Psalms 27: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
