Psalms 28
28
Ayudachun mañajpi, mañashcata tigrachishcamanda alicachishcami
David rurashca Salmomi.
1Mandaj Dioslla, candami caparishpa mañapasha.
Jatun Rumishna ñuca Dioslla.
Ñuca mañajujtaca, ama uyaj tucupaichu.
Ñucata can saquijpica, huañushcata
pambana utujuman urai rijcunashna
ama cangapajmi, chashna mañapani.
2Caparishpa, canda ñuca mañajujtaca uyahuayari.
Cambajlla huasi ladoman, maquita
vichai churashpa mañajujtaca uyahuayari.
3Ñucataca, chai nalita ruraj runacunahuan,
jatun nalita rurajcunahuanga,
ama tandachishpa apahuaichu.
Paicunaca, pihuan parlashpapash
casilla ali causaitami parlanajun.
Ashtahuangarin paipaj shungupica, nalitamari yarinajun.
4Paicuna imata rurashcashnallata cupairi.
Paicuna jatun nalita rurashcashnallata tigrachipairi.
Paicunapaj maquihuan imatalla rurashcamandaca,
japinatallata cupairi.
5Paicunaca, Mandaj Dios rurashcacunata
na yarinajurcachu.
Paipaj maquihuan imatalla
rurashcacunatapash, na yarinajurcachu.
Chaimandami paicunata urmachishpaca,
cutinga na shayachinga.
6Mandaj Diosca, alicachi tucushca cachun.
Paimi, ñuca ninanda mañashca shimicunataca uyarca.
7Mandaj Diosca, ñucapaj shinlli torreshnapash,
ñuca jarcarina escudoshnapashmi.
Ñuca shungupica, paitalla yariajpimi ayudahuarca.
Chaimandami, ñuca shungupica cushijurcani.
Ñuca rurashca candanahuanmi, paitaca alicachisha.
8Mandaj Diosca, pai agllashcacunapaca shinlli torreshnami.
Aceitehuan javi tucushca paipaj jatun
mandajtaca, pacashpami quishpichin.
9Can agllashcacunataca quishpichipairi,
cambajlla gentecunataca bendiciapairi.
Paicunapaj tucui causaipi michishpa,
cuidashpa pushapairi.
Currently Selected:
Psalms 28: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
