Psalms 29
29
Mandaj Diosca jatun ushai, punchapamba cajtami villajun
David rurashca Salmomi.
1Ushaita charijcunapaj churicuna,
Mandaj Diosman cunataca cuichiyari.
Mandaj Diostaca, punchapambami cangui,
ninan ushaita charijmi cangui nichiyari.
2Mandaj Diostaca, paipaj shuti punchapamba
cashcamandallata alicachinajuichi.
Mandaj Diostaca, jucha illaj, juyaillagu
cashcamanda ninanda alicachinajuichi.
3Mandaj Dios rimashca shimicunaca,
yacu jahuacunapimi uyarin.
Punchapamba Taita Diosca, culun nishpami uyarin.
Mandaj Diosca, ashtaca yacu jahuacunapimi.
4Mandaj Dios rimashca shimicunaca,
ninan ushaihuanmi uyarin.
Mandaj Dios rimashca shimicunaca, punchapambami ricurin.
5Mandaj Dios rimashca shimicunaca,
cedro quirucunatapash faquinllami.
Mandaj Diosca, Líbano shuti urcupi tiaj
cedro quirucunatapash faquircallami.
6Chai quirucunataca, shicucunatashnami fahuachirca.
Líbano shuti, Sirión shuti urcucunataca, búfalo
nishca huagracunapaj huahuacunatashnami fahuachirca.
7Mandaj Dios rimashca shimicunaca,
rupajuj ninatami shitamun.
8Mandaj Dios rimashca shimicunaca,
jichushca pambatapashmi chujchuchin.
Mandaj Diosca, Cades shuti jichushca
pambatapashmi chujchuchin.
9Mandaj Dios rimashca shimicunaca,
encina nishca quirucunapaj
malquicunatapash urmachinllami.
Bosquetapash, chushajtami saquin.
Paipaj huasipica, tucuicunami pai
punchapamba cajtaca villanajun.
10Mandaj Diosca, ninan tamiapimi mandajun.
Mandaj Diosca, causaita causaicamanmi
jatun mandanshna mandashpa tiajun.
11Mandaj Diosmi, pai agllashcacunaman ushaita cunga.
Mandaj Diosmi, pai agllashcacunataca,
casilla ali causaita cushpa bendicianga.
Currently Selected:
Psalms 29: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
