JON 14

Ge Jisus Ubwa Shɛ Uhwaŋna ata

1Ge Jisus hiɛŋ eseshi-iyi ubwa, Kede shihwulu shi hi horukono. Hiɛ tɛtanɛ Agwatana rishe,#14:1 hiɛ tɛtanɛ Agwatana rishe: Kwo kaa tɛtana ma Agwatana rishe. n tɛtana ma du rishe. 2Ohwolu tuzwono barɛ ba ni ihwɛ Bishi mi. Yaa ga shɛ shɛ gana ata, N gɛ zhɛ mo hi mbiso, ama N zhɛ mo hi hwulono maa Ma hi imangana ohwolu. 3Yaa shɛ Ngee zhe Ngaa hi imanganɛ ofwo, N zhɛ ma zhajɛ sasana, maa Mo hi sugo pi mi, maa hi nama du no ofwo ata Ngaa namɛ. 4Hi mepi kaa uhwaŋna ofwo ata Ngɛɛ zhɛ.#14:4 Hi mepi kaa uhwaŋna ofwo ata Ngɛɛ zhɛ: Tɛjɛshɛrɛga tu ko ti cala ti hiɛŋ, Hi mepi ofwo ata Ngɛɛ zhɛ, ehi mepi kaa du uhwaŋna wa aba.

5Go Tomas hiɛŋ bụ, Agwangwama, ti mepi shi kaa ofwo ata ɛbi zhɛ, gana na ɛti zhɛ ta mapa ya uhwaŋna wa abaa?

6Ge Jisus jishijɛ bụ, bɛɛ hiɛŋ, Gamba n shɛ uhwaŋna, ti iwɛ-tɛkana, tu uraiŋ ata. I zasa bụtụ be elele na eri bo to pe Bishi mi ti yaa shɛ bee duri shi pi mi o. 7Yaa shɛ ehi m mwopwo,#14:7 Yaa shɛ ehi m mwopwo: Tɛjɛshɛrɛga tu ko ti hiɛŋ, Yaa shɛ ehi go mo mwopwo gom. asha hi mepi du Bishi mi. Te kwuni na aka ga hi mepi bu ya, ahi kwụbwa bụ du kaa.

8Ge Filip hiɛŋ bụ, Agwangwama, iti mbiseni Bishi, asha inɛ ɛtɛ iti gwumwa.

9Ge Jisus jishijɛ bụ, bɛɛ hiɛŋ, E-Filip, N namwawaŋ te ilegeji ne hiŋ, bi te me mepi shi waa hŋ? Bụtụ na n kwụbwa, asha bu kwụbwa du Bishi mi. Gana naa ebi te eri bɛ hiɛŋ yɛ maa, Iti mbiseni Bishii? 10Bu tɛtanɛ shɛ suu rishe maa N namɛ na amɛ Bishi, Bishi du namɛ na amɛ mi? N-ndumwa mu ga Omo hi mbiso, shɛ nu ukpahiŋ mu Ama duma mu o, ama Bishi ata namɛ na amɛ mi ubwa ba nda ugondu ata. 11N tɛtana ma rishe maa N namɛ na amɛ Bishi, Bishi du kaa namɛ na amɛ mi; shibwonu asha n tɛtana ma rishe iwɛ ogondu ga Ama ndangana. 12Iwɛ-tɛkana Omo hi mbiso maa, bụtụ na n tɛtanɛ-rishe, bi zhɛ ba nda du ogondu ga Ama nda, bɛɛ zhɛ kaa ba nda du ogondu na hwuri a na ga, iwɛnɛ ti Ngɛɛ zhɛ pe Bishi mi. 13Iyi elele nɛ kaa ɛhi zhɛ hia lụpa ni izeci mi, N zhɛ ma hi ndana iŋ, iwɛ maa Bishi 'yaga ụjɛrụma tedure ni Yɛu. 14Yaa shɛ ɛhi zhɛ hia lụpa iyi elele ni izeci mi,#14:14 yaa shɛ ɛhi zhɛ hia lụpa…ni izeci mi: Tɛjɛshɛrɛga tu ko ti hiɛŋ, yaa shɛ ɛhi zhɛ hi ma n lụpa…ni izeci mi. N zhɛ ma hi ndana iŋ.

Bishi Zhɛ ma Hi Pana Mpiala mi Tijilo

15Yaa shɛ ehi n lubi, hi zhɛ hia hwuga-unu onu-tupana mi. 16Gamba n zhɛ ma lụpa Bishi nazhɛ bɛɛ zhɛ ma hi panɛ bụsụmɛ-bu-uno bi nya na zhɛ ba nama ne hi unyizo-nom. 17Ubwa shɛ Mpiala mu na mo mbisono atwa gana na Agwatana shɛ, mu na kaa unyizo eri shi wa lashɛga, iwɛnɛ tu unyizo hieci shi bu, unyizo kaa mepi shi bu o. Ama hi mepi bu, iwɛnɛ tu baa namɛ ne hiŋ, bɛɛ tɛ zhɛ kaa ba nama#14:17 bɛɛ tɛ zhɛ kaa ba nama: Tɛjɛshɛrɛga tu ko ti hiɛŋ, mu namɛ kaa na shɛmɛ shi hŋ. na shɛmɛ shi hiŋ. 18N zha shɛ ma hi ganga maa hiɛ shɛ gana miaụŋ-me-e'weteji o, N tɛ zhɛ ma zhajɛ pi hiŋ. 19I vwɛ cwɛŋ tu unyizo zha shɛ ma n kwụba ya, ama hi zhɛ hi na ma kwụba, iwɛnɛ tu Ngaa shɛ buumwa, hi zhɛ du kaa hia sha buumwa. 20Ụjita ata ci hwuŋ, nazhɛ ɛhi zhɛ hia mapa maa N namɛ na amɛ Bishi mi, ahi namɛ du na amɛ mi, Ngaa namɛ du kaa na shɛmɛ shi hiŋ. 21Bụtụ na 'yajɛ onu-tupana mi, na kaa ba hwuga-unu wa aba, asha ubwa mo n lubo. Bụtụ na kaa mo n lubo, Bishi mi zhɛ bo lubo bu du, Ngɛɛ zhɛ du mo lubo bu, Ngɛɛ zhɛ kaa m momo mbisono bu caakwụ.

22Ga Judas na shɛ shɛ una Iskariot heŋteni bu, bɛɛ hiɛŋ, Agwangwama, iwembe po yaa shɛ atuba ɛbi zhɛ bu momo mbisono caakwụ, yaa shɛ shɛ atwa unyizoo?

23Ge Jisus jishijɛ bụ, bɛɛ hiɛŋ, Yaa shɛ bụtụ be elele mo n lubo, bi zhɛ na hwuga-unu imbisegeni mi, nazhɛ Bishi mi zhɛ bo lubo bu, nazhɛ ɛti zhɛ ta zhajɛ te Bishi mi maa ta nama na amɛ bụtụ ata. 24Bụtụ na n lubi shi, bụ hwụjɛ shɛ du unu imbisegeni mi o. N-ndumwa mu ga kaa ahia hwuga mɛ shɛ shɛ mi nee mi o, ama mu na me Bishi mi na n tumwanɛ.

25N hi mbishi ijɛ kpaaŋ tu Ngaa ta namɛ ne hiŋ. 26Bụsụmɛ-bu-uno na shɛ Mpiala mi Tijilo, na Bishi zhɛ ba tumwanɛ ni izeci mi, ubwa zhɛ mo hi mbisogono iyi elele, bɛɛ zhɛ kaa du ne hi teyingeni iyi elele nɛ Ngee hi mbishi. 27Amɛ-olom Ngɛɛ zhɛ ma hi gangana, amɛ-olom mi aba Ama hi pana. Shɛ gana na tu unyizo wa pana bụtụ Ama hi pana o. Kede shihwulu shi hi horukono, ta nda ma du kaa okwo inyɛsɛ o.

28Hi hwugwa ti Ngee hi mbishi maa, N zhɛ mo hwulo, Ngɛɛ zhɛ kaa ma zhagananɛ pi hiŋ. Ehi ge me lubi, asha hi nduwa unyasa iwɛnɛ ti Ngɛɛ hiɛŋ, N zhɛ mo hwulo pe Bishi, iwɛnɛ te Bishi mi n hwuri. 29N hi mbiswo ijɛ hwuwayɛ tobwolo aka te ci shi o, iwɛ maa aka na yee ci hwuŋ maa hiɛ. 30N zha shɛ ma dumanga ya n-ndumwa te ilegeji ne hiŋ duwa o, iwɛnɛ tu uhiu unyizo ga we ci ba, ama bu zasa tuba ukpahiŋ bee n hwuri o. 31Ama iwɛ maa unyizo mepi maa Mo lubo Bishi, maa kaa gana na te Bishi m peni-unu, gana ata du Ama nda iyi.

Ishijɛ ma ti genji ma epe.

Currently Selected:

JON 14: RBT

Highlight

Copy