JON 15

Ge Jisus Ubwa Shɛ Ukparɛ Ufwafwa u Tugom

1Ge Jisus hiɛŋ, Gamba n shɛ ukparɛ ufwafwa u tugom, Bishi mi tuba ubwa shɛ bufwashɛ. 2A'walụ elele na 'weri shi na amɛ mi, bi zhɛ ba vwala aŋ, ama a na elele na a 'wala tụ'walụ, bi zhɛ ba nangangana#15:2 nangangana: Tunangangana tɛ shaananɛ tɛnda shɛshɛshɛ na rɛjɛmɛ ra aturo oko. aŋ tebiye maa e keeni tụ'walụ tu'wala. 3N-ndumwa mu ga Ngee hi mbishi mi hi nangwangwanua tebiye. 4Nama ma na amɛ mi, gana na tu Ngaa namɛ du na shɛmɛ shi hiŋ. Gana na ta a'walụ ufwafwa eri shi a 'wala tụ'walụ ni ikɛnyi aba uzawa ticimbono nu ukparɛ ufwafwa, gobwonu du ehi eri shi hia 'wala nu uzawa ticimbono ne mi.

5Gamba n shɛ ukparɛ ata ufwafwa, ahiɛba tuba hiɛ shɛ a'wa'walụ. Bụtụ na cimbeni ne mi, Ngee cimbeni du kaa na amɛ ubwa, ubwa zhɛ ba 'wala tụ'walụ duwa, iwɛnɛ te ehi eri shi hia nda iyi elele uzawa mu. 6Yaa shɛ bụtụ cimbeni shi ne mi, ɛ zhɛ a kala bu gana a'wa'walụ ụ'wụ'wụ, aka na te e hweteni nazhɛ ɛɛ zhɛ o hwugo aŋ maa e zweni nu ulwa maa e hwoŋzhinji aŋ. 7Yaa shɛ ehi cimbeni ne mi, n-ndumwa mi mi du kaa mu namɛ na shɛmɛ shi hiŋ, asha lụpa ma iyi elele nɛ ahia jala, ɛ zhɛ ma hi ndana iŋ. 8Yaa shɛ ahia 'wala tụ'walụ duwa, nazhɛ Bishi mi zhɛ ba 'yaga ụjɛrụma, iwɛ maa tuba hiɛ shɛ eseshi-iyi mi. 9Gana na te Bishi n lubi, gana ata du Ngee hi lubi. Nama ma no tulubo ti mi. 10Yaa shɛ ahia hwuga-unu imbisegeni mi, nazhɛ ɛhi zhɛ hia nama no tulubo ti mi, gana na Ngaa untanganɛ onu-tupana Bishi mi, Ngaa namɛ du no tulubo tu bwa. 11N hi mbishi iwɛ gɛ iwɛ maa ga unyasa mu nama na shɛmɛ shi hiŋ, iwɛ maa ga unyasa ata hiŋ ulwa. 12Unu ata mu tụpana ụ shɛ iwɛ maa hi no momo lubonu gana na ti Ngee hi lubi.#Jon 13:34; 15:17; 1 Jon 3:23; 2 Jon 5 13I zasa bụtụ na ta 'yajɛ tulubo tu na tu hwuri ma tu ga o, ibɛ shɛ maa bụtụ keri uhiuhiu ubwa iwɛ eyejilo ubwa. 14Yaa shɛ ahia nda iyi elele nɛ Ngee hi peni-unu ibɛ, asha ahiɛba hiɛ shɛ eyejilo mi. 15N zha shɛ mɛ hi hiɛŋ ya miaụŋ-mu-ugondu#15:15 miaụŋ-mu-ugondu: Kwo kaa ajama. o, iwɛnɛ ti yɛu-ugondu mepi shi iyi nɛ agwuma-ihwɛ ibwɛ a nda, ama N zhɛ mɛ hi hiɛŋ ya eyejilo mi, iwɛnɛ tu Ngoo hi mbiswo iyi elele nɛ Ngɛɛ hwujɛ no olugwo Bishi mi. 16Shɛ ahiɛba hi n teri o, ama Gamba n hi teri, Ngee hi shileni maa hi zhe maa hi 'weri tụ'walụ, maa tụ'walụ ta ata ti hiŋ tu nama, iwɛ maa Bishi ihi peni iyi elele nɛ ahia lụpa ni izeci mi. 17Unu na Ngee hi peni ta, maa no momo lubonu ma.

Unyizo wo Imo Eseshi-iyi

18Yaa shɛ atwa unyizo mo hi imo, asha mapa ma maa Gamba oo imwo nazhɛ oo hi imo. 19Yaa shɛ ahi ga shɛ atwa unyizo, atwa unyizo gɛ zhɛ mo hi lubo iwɛnɛ ta ahi ga shɛ atwa aba. Ama hiɛ shɛ shɛ atwa unyizo. Gamba n hi teri maa hi beni nu unyizo ga, iwɛbɛ po atwa unyizo mo hi imo. 20Ne teyinje ma iwɛ ɛtɛ Ngee hi mbishi, Ngɛɛ hiɛŋ, Bujama#15:20 bujama: Kwo kaa yɛu-ugondu. hwuri shi agwangwama#15:20 agwangwama: Kwo kaa agwuma-ihwɛ. ubwa o. Yaa shɛ aa n shɛka, ɛ zhɛ ma hiɛ shɛka du, yaa shɛ kaa aa 'wa imbisegeni mi, asha ɛ zhɛ a 'wa du imbisegeni hiŋ.#Mat 10:24; Luk 6:40; Jon 13:16 21Ama ɛ zhɛ ma hi nda ijɛ hwɛɛ iwɛ izeci mi, iwɛnɛ te e mepi shi bụtụ na n tumwanɛ. 22Yaa shɛ Ngee nge zhe shi maa mo mbiso aŋ n-ndumwa, a ga zha shɛ a mapa tụwụma ti iwɛwɛ ya aba o. Ama a zasa ya onungwu maa e benengeni tụwụma ti iwɛwɛ ya aba o. 23Bụtụ na mo n imo, bo imo du Bishi mi. 24Yaa shɛ Ngaa nga njɛ shɛ ugondu na ashashɛ aba unaa na ta zasa bụtụ na nduwa uŋ, a ga zha shɛ a mapa tụwụma ti iwɛwɛ ya aba o. Ama a kwụbwa uŋ ya, oo n imwo te Bishi mi hwɛɛ. 25Ama inɛ ɛtɛ shɛ iwɛ maa iwɛ nɛ oo 'nywotwo nu Undwa wa aba i sɛ, iwɛ ɛtɛ hiɛŋ, E n imi uzawa ecilo.#Shɛzu 35:19; 69:4

26Ama aka na ta bụsụmɛ-bu-uno na shɛ Mpiala ma ata ma kapɛshɛngana atwa maa Agwatana shɛ tɛkana, mu gata Ngɛɛ zhɛ ma tumwanɛ maa mu banɛ no olugwo Bishi mi zhajɛ, ubwa zhɛ ma n la tiseyida. 27Hi zhɛ du hi ma n la tiseyida, iwɛnɛ ta ahi namɛ ne mi taa nu umozhigo.

Currently Selected:

JON 15: RBT

Highlight

Copy