JON 16

1N hi mbishi inɛ gɛ, iwɛ maa kede hi leyegeji o. 2Ɛ zhɛ ma hi bacɛnga no shimwono shɛ tụ'ụlwatagwụ. Ama aka zhɛ o to ta bụtụ be elele na ma hi kwụna zhɛ ba haŋsa maa Agwatana baa ndana ugondu. 3Ɛ zhɛ ma hi nda ijɛ iwɛnɛ te e mepi shi Bishi, tu Gamba du. 4Ama N hi mbiswo inɛ gɛ iwɛ maa okwo aka na ta aka ata ci ya, maa hi teyinje maa N go hi mbiswo la iwɛ ya aba.

Ugondu Mpiala mi Tijilo

N te hi mbishi shi la iwɛ gɛ taa nu umozhigo, iwɛnɛ tu Ngaa ta namɛ la ne hŋ. 5N zhɛ mo hwulo ya hwuwayɛ no ofwo bụtụ ata n tumwanɛ, i zasa kaa bụtụ be elele na ashashɛ hiŋ n unseni maa, Cee kwuŋ ɛbi zhɛ ɛ? 6Amɛ-tụhaŋtụ shini shɛmɛ shi hiŋ iwɛnɛ ti Ngee hi mbishi iwɛ gɛ. 7Mo hi mbiso iwɛ-tɛkana maa, i shɛ titeni ti hiŋ ti Ngɛɛ zhɛ mo hwulo. Yaa shɛ Ngee hwuri shi, asha Bụsụmɛ-bu-uno zha shɛ ba zhajɛ pi hŋ o, ama yaa shɛ Ngee hwuri, nazhɛ Ngɛɛ zhɛ ma tumwanɛ bụ pi hiŋ. 8Aka na baa zhajɛ, bi zhɛ bo mbisono atwa unyizo tuhaŋsa tu na tu 'wanjɛ iwɛ iwɛwɛ ya aba, ti iwɛ tiririri, ti iwɛ ụshɛrɛya. 9Tụwụma ta aba tɛ shɛ iwɛ iwɛwɛ, iwɛnɛ ta a n tɛtanɛ shɛ rishe. 10Tụwụma ta aba iwɛ tiririri, tɛ shɛ iwɛnɛ ti Ngɛɛ zhɛ no ofwo Bishi mi, ahi zha shɛ hi ma n kwụba ya. 11Tụwụma ta aba iwɛ ụshɛrɛya, tɛ shɛ gana na ta a dumwa ụshɛrɛya uhiu unyizo ga.

12N nga ta 'yajɛ iyi ifwugwo maa mo hi mbiso, ama hi te eri shi hia untangana iŋ hwuwayɛ o. 13Ama aka na tu ubwa na shɛ Mpiala mu na ma kapɛshɛngana atwa iwɛ-tɛkana zhajɛ, ubwa zhɛ ma hi kapɛshɛngana iwɛ-tɛkana elele kpaaŋ. Iwɛnɛ tu baa zha shɛ ba duma iwɛ ni ikɛnyi ibwɛ, semi iyi elele nɛ baa hwuga, ibɛ du bɛɛ zhɛ ba duma, bɛɛ zhɛ kaa du ma hi anangana ti iyi nɛ te ci. 14Gamba bɛɛ zhɛ ba pana ụjɛrụma, iwɛnɛ ti bɛɛ zhɛ nɛ lɛshijɛ iyi no olugwo mi nazhɛ bɛɛ zhɛ ma hi anangana. 15Iyi elele nɛ Bishi 'yajɛ, i shɛ inee mi. Ibɛ po Ngɛɛ hiɛŋ, Bi zhɛ bɛ lɛshijɛ no olugwo mi nazhɛ bɛɛ zhɛ ma hi anangana.

Amɛ-tụhaŋtụ keeni Unyasa

16Aka fwalaa hi zha shɛ hi ma n kwụba o, na aka fwalaa kaa hi zhɛ hi ma n kwụba sasana.

17Ibɛ po eseshi-iyi ubwa oko momo hoŋtongonu, ɛɛ hiɛŋ, Imbe shɛ ecilo iwɛ gɛ boo tu mbiso maa, Na aka fwalaa hi zha shɛ hi ma n kwụba o, na aka fwalaa kaa hi zhɛ hi ma n kwụba sasanaa? Ti inɛ ɛtɛ bɛɛ hiɛŋ, N zhɛ pe Bishi mii? 18Imbe shɛ ecilo aka fwalaa ataa? Ti mepi shi ecilo iwɛ ɛtɛ bɛɛ hiɛŋ o.

19Ti ge Jisus mepi maa a jala maa e unseni bu iwɛ ɛtɛ, bɛɛ hiɛŋ aŋ, Hi momo unsongonu suu iwɛnɛ Ngɛɛ hiɛŋ, Aka fwalaa, hi zha shɛ hi ma n kwụba o, na aka fwalaa kaa hi zhɛ hi ma n kwụba sasana? 20Iwɛ-tɛkana Omo hi mbiso maa, hi zhɛ hi na twa-u'wo, ɛhi zhɛ hi na zunga azunga tiriri, ama atwa unyizo tuba zhɛ na nda unyasa. Shɛmɛ shi hiŋ shi zhɛ sha hashɛganụ, ama amɛ-tụhaŋtụ hiŋ tuba zhɛ a jɛshɛrɛga unyasa. 21Aka na ta tumata tu to biyikwo na ga 'yajɛ ofubo, bi zhɛ ba 'yaga amɛ-tụhaŋtụ, iwɛnɛ ta aka tumata tu bwa ci. Ama aka na bee meci yɛu ɛtɛ, bi zha shɛ be teyinje ya ụbaụta ubwa o, iwɛ unyasa yɛu ɛtɛ bee meci#16:21 yɛu ɛtɛ bee meci: Tɛjɛshɛrɛga tu ko ti hiɛŋ, butugwumwa ata bee meci. nu unyizo. 22Hi ta 'yajɛ amɛ-tụhaŋtụ hwuwayɛ du, ama N zhɛ ma zhajɛ maa ma hi kwụba sasana, nazhɛ shɛmɛ shi hiŋ shi zhɛ sho lomo. I zasa kaa bụtụ eri ba lashɛga amɛ-olom ata hiŋ o. 23Hi zha shɛ hi mo n hoŋtono hwuŋ ya iyi elele jita ata o. Iwɛ-tɛkana Omo hi mbiso maa, yaa shɛ ɛhi zhɛ hia lụpa Bishi iyi elele, bi zhɛ ma hi pana iŋ ni izeci mi. 24Okwo taa hwaye, hi ta lupɛ shɛ iyi elele ni izeci mi o. Lụpa ma, nazhɛ ɛɛ zhɛ ma hi pana, iwɛ maa unyasa hiŋ ulwa.

Ge Jisus Lasụ unyizo

25Iwɛ gɛ Ngaa jɛmɛ gana eshi, aka e ci ba tu Ngaa zha shɛ ma duma ya iwɛ ne hiŋ ne eshi, ama N zhɛ mu no hi mbiso ya iwɛ Bishi na tɛcaakwụ. 26Aka na ta aka ata ci hwuŋ, hi zhɛ hia lụpa iyi ni izeci mi. N hi hiaŋ shɛ maa N zhɛ ma hi lụpaga iyi no olugwo Bishi mi o. 27Bishi ni ikɛnyi ibwɛ mo hi lubo, iwɛnɛ ehi n lubi, ahiɛ tɛtanɛ kaa rishe maa no olugwo Agwatana Ngaa banɛ. 28No olugwo Bishi Ngaa banɛ Ngee teni nu unyizo ga, Ngɛɛ zhɛ ma bana kaa nu unyizo ga maa Mo gwulo pe Bishi. 29Ibɛ po eseshi-iyi ubwa hiɛŋ bụ, Hwuwayɛ go nazhɛ aba duma iwɛ na tɛcaakwụ, shɛ ne eshi aba duma ya iwɛ o. 30Ti mepi ya hwuwayɛ go maa bi mepi iyi elele, ukekeshi te shi ya bụtụ be elele maa mo bu hoŋtono iwɛ o. Ni inɛ gɛ eti mepi ya maa no olugwo Agwatana abu banɛ.

31Ge Jisus heŋteni aŋ, bɛɛ hiɛŋ, Hwuwayɛ go hŋ nazhɛ ahiɛ tɛtanɛ ya rishe? 32Hioko ma aka e ci ba, aka ata du kaa tuwo, tɛ ɛ zhɛ ma hi garataga, maa bụtụ bụtụ u hwulo ujiyo ni ihwɛ ibwɛ maa hi n genji Ngooko. Ama tuba shɛ Ngooko, iwɛnɛ te Bishi namɛ ne mi. 33N hi mbishi inɛ gɛ iwɛ maa shɛmɛ shi hiŋ shi lemi ne mi. Hi zhɛ hia nda ụbaụta nu unyizo, ama ima ma isɛbwɛ, N lasawa unyizo.

Currently Selected:

JON 16: RBT

Highlight

Copy