JON 13

Ge Jisus Fwoci Shivwɛvwɛjɛ she Eseshi-iyi Ubwa

1Aka na ti Isene Tɛkashɛka te ci shi, ge Jisus kaa mwopwo maa aka ubwa na bɛɛ zhɛ ba ganga unyizo maa gwulo no ofwo Bishi i ci. Bu lubi kaa atwa ubwa a na namɛ nu unyizo, bu lubi aŋ kaa uuwa i ci uce.

2Ibiri kaa shiyono ahaŋsa na amɛ Judas Iskariot yɛu Saimon maa sanga Jisus ne tidere, tobwolo iyimɛyɛ ụrụmɛ te ci shi tiya o. 3Ge Jisus mepi maa Bishi pwonuo bu ukpahiŋ we elele, bee mepi kaa maa no olugwo Agwatana baa banɛ, pa Agwatana kaa du baa zhaananɛ. 4Ibɛ po bɛɛ ishijɛ no olugwo iyimɛyɛ ɛtɛ ụrụmɛ, bee tileni tugwuno tu bwa, bee suji tugwuno ti idurɛ baa rɛ ne embi ubwa. 5Nazhɛ bee zweni meni na abwaka, bee kwuni shivwɛvwɛjɛ she eseshi-iyi ubwa tufwata, bee kwuni shu du tuwafwaga no tugwuno ta ata ti idurɛ baa rɛ.

6Ti ge Jisus ci Saimon Pita, ga Saimon hiɛŋ bụ, Agwangwama, gabụ suu bi zhɛ ba fwata ɛvwɛvwɛjɛ mi?

7Ge Jisus jishijɛ bụ, bɛɛ hiɛŋ, Bi te mepi shi ijɛ Ama nda bana o, ama bi tɛ zhɛ ba mapa iŋ hwuŋ.

8Ga Pita hiɛŋ bụ, Shɛ gabụ kaa bi zhɛ ba fwata ɛvwɛvwɛjɛ mi kwukwuŋ!

Ge Jisus jishijɛ bụ, bɛɛ hiɛŋ, Yaa shɛ Ngee fwoci shi ɛvwɛvwɛjɛ bụ, asha bi zha shɛ ba sha ya biseshi-bi-iyi mi o.

9Nazhɛ ga Saimon jishijɛ bụ, bɛɛ hiɛŋ, Agwangwama, asha shɛ ɛvwɛvwɛjɛ mi kiri ɛbi zhɛ ba fwata o, asha fwata ti i'ɛlɛ mi, tu uhiuhiu mu du.

10Ge Jisus hiɛŋ bụ, Bụtụ na dulwa meni, ukekeshi te shi bu ya maa mama nyashɛnga o, semi ɛvwɛvwɛjɛ ubwa kiri#13:10 semi ɛvwɛvwɛjɛ ubwa kiri: Tɛjɛshɛrɛga tu ko ti cala tu zasa n-ndumwa ma ata o. bɛɛ zhɛ ba fwata ya, hi namwawaŋ shɛshɛshɛ, ama shɛ hwɛɛ hiŋ o. 11Iwɛnɛ ti ge Jisus mwopwo bụtụ ata na zhɛ ba sanga bu ne tidere, ibɛ po bɛɛ hiɛŋ, Shɛ hwɛɛ hiŋ hi namɛ shɛshɛshɛ o.

12Aka na ti ge Jisus hwuwi shivwɛvwɛjɛ sha aba tufwata, bee sugeneni tugwuno tu bwa bee urigeni, baa jɛjɛ sasana. Bee heŋteni aŋ, bɛɛ hiɛŋ, Hi mepi ijɛ Ngaa hi ndanɛ hŋ? #Luk 22:27 13Hi mɛ n hiɛŋ, Bimbisegeni keeni Agwangwama, hi teni kaa cɛŋ, gana ata ga kaa Ngaa shɛ. 14Yaa shɛ Gamba na n shɛ Agwangwama keeni Bimbisegeni hiŋ fwoci shivwɛvwɛjɛ shi hiŋ, asha hiɛ shɛ hi momo fwotonu du shivwɛvwɛjɛ. 15N njɛ ijɛ iwɛ maa hiɛ kwụbɛ, maa hi na mama ndanụ du gana na tu Ngaa hiɛ ndanɛ. 16Iwɛ-tɛkana Omo hi mbiso maa, bujama hwuri shi agwangwama ubwa o, butumwa kaa hwuri shi bụtụ na tumwanɛ bu o.#Mat 10:24; Luk 6:40; Jon 15:20 17Yaa shɛ ehi mepi ijɛ, ahia nda iŋ kaa, hi zhɛ hie gwoje.

18Shɛ iwɛ hiŋ kpaaŋ Ama duma o. M mepi atwa na Ngee teri. Ama gɛ Iwɛ ya Agwagwana na hiɛŋ, Bụtụ na ba ya iyimɛyɛ ne mi, shepi ushikwuru ubwa na azuba boo n to i sɛ.#Shɛzu 41:9 19Te kwuni na aka ga Mo hi mbiso tobwolo aka te ci shi o, iwɛ maa aka na yee ci hwuŋ, maa hiɛ tɛtana-rishe maa Gamba na. 20Iwɛ-tɛkana Omo hi mbiso maa, bụtụ na ba la bụtụ be elele na Ngɛɛ zhɛ ma tumwana, asha bu ma n la du, bụtụ na kaa ma n la, asha ba la du bụtụ ata n tumwanɛ.#Mat 10:40; Mak 9:37; Luk 9:48; 10:16

Ge Jisus Hiɛŋ Ga Judas Zhɛ ba Sanga bu ne Tidere

(Mat 26:20-25; Mak 14:17-21; Luk 22:21-23)

21Aka na ti ge Jisus jɛmɛ iwɛ ɛtɛ hwɛɛ, baa zhɛgɛda tebiye na amɛ na amɛ ubwa. Baa jɛmɛ kpataa, bɛɛ hiɛŋ, Iwɛ-tɛkana Omo hi mbiso maa, bụtụ bu ko na ashashɛ hiŋ zhɛ ma n sangana atwa ne tidere.

22Ibɛ po eseshi-iyi mama mbiyanganụ, iwɛnɛ te e mepi shi ijiji bụtụ na baa njɛ iwɛ ubwa. 23Biseshi-bi-iyi bu ko namba ge Jisus bo lubo, ubwa du jɛjɛ to dongonu Jisus. 24Ga Saimon Pita heŋteni Jisus na azhɛkwa iwɛ bụtụ na baa njɛ iwɛ ubwa.

25Nazhɛ bụtụ ata jɛjɛ to dongonu Jisus, heŋteni bu, bɛɛ hiɛŋ, Agwangwama, gaaba kwuuŋ?

26Ge Jisus jishijɛ bụ, bɛɛ hiɛŋ, Bụtụ be elele Ngee hwuneni hwayɛ uhiuhiu tɛga Ngee peni, asha ubwa gatata. Aka na ti ge Jisus hwuneni uhiuhiu ata tɛga, bee peni uŋ Judas Iskariot yɛu Saimon. 27Ti ga Judas leshiji uhiuhiu ata tɛga, ge Setan teni na amɛ ubwa.

Ge Jisus hiɛŋ bụ, Nda ijɛ aba nda kakayɛ. 28I zasa kaa bụtụ be elele na ashashɛ aba na gɛgajɛ nu uteburu ata mepi ecilo no po bee mbishi bu iwɛ ɛtɛ o. 29Iwɛbɛ po atwa oko heŋshi maa iwɛnɛ feye ti yaa shɛ ga Judas 'waŋnɛ arɛta ukwuribi upo ge Jisus hiɛŋ bụ ga sa iyi nɛ maa a 'yaga na aka Isene, kwo kaa maa ga pana feye okofwo iyi ike. 30Aka na ti ga Judas leshiji uhiuhiu ata tɛga, bee beni gunu ata, ụjita kaa shiwo na aka ata.

Unu Ufwo tụpana

31Aka na ti ga Judas beni, ge Jisus hiɛŋ, Yɛu Bụtụ 'yajɛ ya ụjɛrụma hwuwayɛ, Agwatana kaa du 'yajɛ ụjɛrụma tedure nu bwa. 32Yaa shɛ Agwatana 'yajɛ ụjɛrụma tedure nu bwa,#13:32 yaa shɛ Agwatana 'yajɛ ụjɛrụma tedure nu bwa: Kwo kaa na amɛ ubwa. Tɛjɛshɛrɛga tu ko ti cala tu zasa n-ndumwa ma ata o. asha Agwatana zhɛ a pana bụ du ụjɛrụma ata ni ikɛnyi ibwɛ, bi zhɛ kaa ba pana bụ uŋ gunu ata. 33A-miaụŋ mi mi, N ta namɛ ne hiŋ tugwo na aka ticwɛŋ. Gana na Ngee mbishi la Eju gana ata du Omo hi mbiso maa, Hi zhɛ hi ma n jalakaka, hi eri shi kaa hio to ofwo na Ngɛɛ zhɛ o.#Jon 7:34 34Unu ufwo Ama hi pana, maa no momo lubonu ma. Gana na ti Ngee hi lubi, ga shɛ gana ata du ohi momo lubonu.#Jon 15:12,17; 1 Jon 3:23; 2 Jon 5 35Ni inɛ ɛtɛ ibɛ atwa kpaaŋ zhɛ a mapa maa ahiɛba hiɛ shɛ eseshi-iyi mi, ti yaa shɛ ohi momo lubonu.

Ge Jisus Hiɛŋ ga Pita Zhɛ ba Tala Ashamanjɛ maa bu Mepi Shi bu o

(Mat 26:31-35; Mak 14:27-31; Luk 22:31-34)

36Ga Saimon Pita heŋteni bu, bɛɛ hiɛŋ, Agwangwama, Cee ɛbi zhɛɛ?

Ge Jisus jishijɛ bụ, bɛɛ hiɛŋ, Ofwo na Ngɛɛ zhɛ, bi te eri shi bu ma n 'wa hwuwyɛ o, ama bi tɛ zhɛ bu ma n 'wa hwuŋ.

37Ga Pita hiɛŋ bụ, Agwangwama, imbe po Ngee eri shi ma bu 'wa hwuwayɛɛ? N zhɛ kaa ma kala uhiuhiu mu iwɛ bụ.

38Ge Jisus jishijɛ bụ, bɛɛ hiɛŋ, Bi zhɛ ba kala uhiuhiu bu iwe mi hŋ? Iwɛ-tɛkana Ngɛɛ zhɛ mo bu mbiso maa, alụma zha shɛ a ugana hwayɛ kwukwuŋ tɛ bi zhɛ ba tala ashamanjɛ kpalụ tatụ maa bu m mepi shi.

Currently Selected:

JON 13: RBT

Highlight

Copy