ŊWED MBON GALATIA 5

Esɔŋ eda ke uwɔrɔ Ufin Emi Abasi Ɔnɔde Mbufo

1CHRIST okosio nnyin ke itie ufin, ete idi nditɔ-isɔŋ; esɔŋɔ eda ndien, ekuyak etɔŋɔ ntak ekɔmɔ mbufo ke ɔkpɔnɔ itie-ufin.

2Sese ami Paul ndɔhɔ mbufo nte, Edieke mbufo enade mbobi, Christ idifɔnke inɔ mbufo ke baba usuŋ kiet. 3Mmonyuŋ ntɔŋɔ ntak nsɔŋɔ ndɔhɔ owo ekededi eke anade mbobi nte, enye enyene ndinim ofuri ibet. 4Ama edi mbufo emi eyomde ndisaŋa ke ibet nnyene utebe-ikpe, ke emabahare mbufo ye Christ; mbufo emeduɔŋɔ ekpɔŋ mfɔn Abasi. 5Koro nnyin ida mbuɔtidem itie ke Spirit ibet edinen ido emi idoride enyin ndibɔ. 6Koro ke Christ Jesus erina mbobi ifɔnke ŋkpɔ erinyuŋ ntre ndina mbobi ifɔnke ŋkpɔ, edi mbuɔtidem emi anamde utom ke ima. 7Mbufo ekefefehe mbuba nte eyede ndise: anie ɔkɔwɔrɔ ɔkɔbiɔŋɔ mbufo ke usuŋ, ete, ekusuk ibuot enɔ akpanikɔ? 8Erisin emi esinde mbufo enam ntem itoho Abasi emi okotde mbufo. 9Ekpri leaven ananamk ofuri uyo ofut. 10Mmɔsɔŋɔ nnim ke akpanikɔ ke Ɔbɔŋ mbaŋa mbufo, nte esit mbufo idikpuhɔkere: edi owo eke otimerede mbufo eyebiom ubiom-ikpe esie, enye edi se ededi. 11Edi ama edi ami, nditɔ-ete, edieke nsuk ŋkwɔrɔde nte owo akpana mbobi, nsidi ntak eke esinde mi enyin naŋa? Se iyatde owo ke ikɔ cross iduhe aba ndien. 12Mmɔ eke etimerede mbufo ekpekam edianare idem efep.

13Nditɔ-ete, ekekot mbufo ete edidi nditɔ-isɔŋ; edi ekuda itie eyen-isɔŋ mbufo eyom ufaŋ enɔ obukidem, edi esaŋa utom enɔ kiet eken ke ima. 14Koro ofuri ibet oduk ɔdɔŋɔ ke ikɔ kiet, kpa ke ikɔ emi, Ma mbɔhiduŋ fo nte amade idem fo. 15Edi edieke mbufo edomde enyuŋ etade kiet eken, ekpeme mbak mbufo edisobo ke ubɔk kiet eken.

16Edi mmɔdɔhɔ mbufo nte, Esaŋa ke Spirit, ndien mbufo idinamke se idɔŋde obukidem. 17Koro obukidem ada udɔŋ esie aŋwana ye Spirit, Spirit onyuŋ ada udɔŋ Esie aŋwana ye obukidem; mmɔ mbiba ebiɔŋɔ kiet eken; man mbufo ekunam se mbufo eyomde ndinam. 18Edi edieke Spirit adade mbufo usuŋ, mbufo iduhe ke idak ibet. 19Ndien ubɔk-utom obukidem ayarare, oro edi use, ye mbubiam ido, 20ye obukpo ido, ye erikpono-ndem, ye eribre-idiɔŋ, ye usua, ye utɔk, ye ufup, ye iyaresit, ye ndomo-idem, 21ye ubahare, ye erisiak isio ŋka, ye udu, ye eriyuhɔ mmin, ye otime-otime ido ye mme ido eke etiede ntre; mmɔdɔhɔ mbufo, kpa nte mma ŋkebebem iso ndɔhɔ, nte, mmɔ emi enamde oruk ido eke etiede ntem ididaha Obio Ubɔŋ Abasi inyene. 22Edi mbuŋwum Spirit edi ima, ye idaresit, ye emem, 23ye ime, ye mfɔn-ido, ye eti ido, ye erinam akpanikɔ, ye ifure-ifure ido, ye mfara ke idem; baba ibet kiet ibiɔŋɔke oruk edu emi. 24Mmɔ emi edide ikɔt Christ Jesus ema ewot obukidem ke cross, ye udɔŋ ye idiɔk itɔŋ esie.

25Edieke nnyin idude uwem ke Spirit, eyak nnyin inyuŋ ida odudu Spirit isaŋa. 26Nnyin ikutaŋ idem, ikuyat kiet eken esit, ikunyuŋ ifibe ufup ye kiet eken.

Currently Selected:

ŊWED MBON GALATIA 5: ENA

Highlight

Copy