ŊWED MBON GALATIA 4

Paul Asua Ɔnɔ Mbon Galatia Onyuŋ Oduri mmɔ Utɔŋ Ete Ekufiak Ukuduk ke Ufin Aba

1EDI ndɔhɔ mbufo ntem nte, adaŋa ini nte eyen emi edi ediade ufɔk edide eyenɔwɔŋ, enye ikpuhɔkere ye ofin ke baba ŋkpɔ kiet, okposuk edi nte enye edide andinyene kpukpru ŋkpɔ: 2enye esine ke idak mme andikpeme ye mme akama-ukpɔhɔre, tutu osim ini eke ete esie ekebierede onim. 3Kpa ntre ŋko, ke adaŋemi nnyin ikedide nditɔwɔŋ, ema emum nnyin ekama ke ufin ke idak mme odudu emi ekarade ererimbot: 4edi ke adaŋemi ekemde uyɔhɔ ini, Abasi osio Eyen Esie ɔdɔŋ ŋwan aman Enye, Enye onyuŋ esine ke idak-ibet 5ete afak mmɔ emi edude ke idak ibet, man nnyin ikpɔbɔ itie nditɔ inyene. 6Ndien sia mbufo edide nditɔ, Abasi ama ɔdɔŋ Spirit Eyen Esie edidu nnyin ke esit ete, ikot Enye ite, Abba Ete. 7Ntre ke afo udige aba ofin, edi edi eyen; ndien edieke edide eyen, Abasi anam fi onyuŋ ada udeme enyene.

8Edi adaŋoro, sia mbufo mikɔfiɔkke Abasi, mbufo ekeduk ufin enɔ se midige Abasi ke uduot mmɔ; 9Edi ke emi mbufo ema ekefiɔk Abasi, ŋkpakam ndɔhɔ nte, ke emi Abasi ama ɔkɔfiɔk mbufo, nsinam mbufo efiakde ebine mmeme nditaha mme odudu oro, enyuŋ eyom nditɔŋɔ ntak nduk ufin nnɔ mmɔ? 10Mbufo ke enenim usen ye ɔfiɔŋ ye ini ye isua. 11Mmenyene ndik mbaŋa mbufo, nte ndusuk ŋkakpa utom ikpikpu ke idem mbufo.

12Mmekpe mbufo ubɔk, nditɔ-ete, ekabare etie nte ami ntiede, koro ami ŋko mmakabare ntie nte mbufo etiede. 13Mbufo ikanamke mi baba idiɔk ŋkpɔ kiet. Mbufo efiɔk ete ke okoto mmemidem mi ŋkwɔrɔ gospel nnɔ mbufo ke eritɔŋɔ; 14ndien se ikpedide ŋkpɔ iduɔ inɔ mbufo ke obukidem mi, mbufo ikesehe ke ndek, inyuŋ isinke; edi mbufo ekadara mi nte angel Abasi, nte Christ Jesus. 15Idaresit oro mbufo ekekopde enye? Koro ndi ntiense nnɔ mbufo nte, edieke usuŋ okpodude, mbufo ekpewubere enyin mbufo esio enɔ mi. 16Nte mmekabare ndi asua mbufo koro nsiande mbufo akpanikɔ? 17Mmɔ oro esin esit ekpek mbufo, edi mmɔ inamke ke eti esit; mmɔ eyom ndibahare mbufo ye nnyin, man mbufo ekpek mmɔ. 18Ɔfɔn owo esin esit ekpek mbufo ke eti utom, edi emi ekpedi kpukpru ini, ikpedige ke ini ndude ye mbufo ikpɔŋ. 19Ŋkpri nditɔ mi, emi ntɔŋɔde ntak ndu ke ubiak uman mbaŋa mbufo, tutu Christ oboro mbufo ke esit; 20ŋkpakam ndu ye mbufo ke emi, nnyuŋ ŋkpuhɔre uyo mi; koro esit oduyo mi abaŋa mbufo.

21Esian mi, mbufo emi eyomde ndidu ke idak ibet, nte mbufo ikopke ibet? 22Koro ewet ete Abraham ekenyene nditɔ-iren iba, kiet oto ofin aŋwan, kiet oto amana-isɔŋ. 23Eyen emi otode ofin aŋwan akamana nte ido obukidem edide, edi enye emi otode amana-isɔŋ akamana oto uŋwɔŋɔ Abasi. 24Ŋke odu ke esit oruk ŋkpɔ emi esine. Iban iba emi edi ediomi iba; kiet oto ke Obot Sinai, aman nditɔ esin ke ufin, emi edide Hagar. 25Koro Hagar oro edi Sinai, obot emi odude ke Arabia, Enye asaŋa ekekem ye Jerusalem emi odude ke emi; koro Jerusalem ye nditɔ esie etie ke ufin. 26Edi Jerusalem emi odude ke enyɔŋ edi amana-isɔŋ, onyuŋ edi enye edi eka nnyin; 27koro ewet ete,

Dara O ada emi mumanke eyen;

Bumere, fiori, afo emi mufiɔkke ubiak uman:

Koro nditɔ ikpɔŋ aŋwan ewak ekan nditɔ ŋwan ndɔ.

28Nditɔ-ete, mbufo edi nditɔ uŋwɔŋɔ nte Isaac ekedide. 29Edi kpa nte eyen emi amanade ke ido obukidem ɔkɔkɔbɔde eyen emi amanade ke ido Spirit ke eyo oko, kpasuk ntre ke edi ke emi. 30Edi ŋwed Abasi ɔdɔhɔ didie? ete, Bin ofin-aŋwan ye eyen esie duɔk: koro eyen ofin-aŋwan idinyeneke udeme ye eyen amana-isɔŋ. 31Ntem, nditɔ-ete, nnyin idige nditɔ ofin-aŋwan, edi idi nditɔ amana-isɔŋ.

Currently Selected:

ŊWED MBON GALATIA 4: ENA

Highlight

Copy