ŊWED MBON GALATIA 3

Eyebɔ Spirit Abasi Oto ke Mbuɔridem

1O MBON Galatia, emi enanade ibuot, anie ekebre esin mbufo ewɔŋɔre ekpɔŋ Jesus Christ; emi ekosiode ke iso mbufo nte owo emi ewotde ke cross? 2Emi edi ukure se nyomde mbufo esian mi; nte mbufo ekebɔ Spirit koro enamde utom ibet, mme koro mbufo ekopde ikɔ Abasi ye mbuɔtidem? Nte mbufo enana ibuot ntre? 3Ke ema eketɔŋɔ uwem ke Spirit, nte emɔŋ edinam mbufo efɔn ema ke obukidem? 4Nte ekokut uwak ukut ntem ke ikpikpu? edike edide ke ikpikpu ke akpanikɔ. 5Nte Enye, emi ɔnɔde mbufo Spirit, onyuŋ anamde mme utibe-ŋkpɔ ke otu mbufo, anam ntre koro mbufo enamde utom ibet, mme koro mbufo ekopde ikɔ ke mbuɔtidem? 6Kpa nte Abraham ɔkɔbuɔtde idem ye Abasi, ndien ebat oro enɔ enye ke edinen ido.

7Efiɔk ndien ete, mmɔ eke mbuɔtidem edi nditɔ Abraham. 8Edi ŋwed Abasi, sia ekebemde iso okut ete Abasi eyetebe mme Gentile ikpe ke ntak mbuɔtidem, ebem iso ɔkwɔrɔ ikɔ ufɔn ɔnɔ Abaraham ete, Oto fi ke kpukpru mme idut eyekut ufɔn. 9Mmɔdo ndien mmɔ eke mbuɔtidem etiene Abraham emi ɔkɔbuɔtde idem ekut ufɔn. 10Koro kpukpru mmɔ eke erinam utom ibet edu ke idak isuŋi: koro ewetde ete, Ɔdɔdiɔk ɔnɔ kpukpru owo emi miyireke ke kpukpru mme item eke ewetde ke ŋwed ibet, ite inim mmɔ. 11Edi otim ayarare ete ikpe itebeke baba owo kiet ke iso Abasi ke ntak erinim ibet: edi ete, Edinen owo edida mbuɔtidem odu uwem. 12Edi ibet isaŋake ŋkpɔ ye mbuɔtidem; edi, Owo eke onimde ibet edida ibet odu uwem. 13Christ akafak nnyin osio ke isuŋi ibet emi odorode nnyin, sia Enye amakabare edi ŋkpɔ isuŋi ke ibuot nnyin; koro ewetde ete, owo eke eyiride ke eto edi ŋkpɔ isuŋi Abasi; 14man oto do ufɔn eke Abraham okokutde okposim mme Gentile ke Christ Jesus; man nnyin ikponyuŋ ida mbuɔtidem ibɔ Spirit emi Abasi ɔkɔŋwɔŋɔde ndinɔ.

15Nditɔ-ete, ntiŋ ŋkpɔ nsin ke nde edu owo. Ke adaŋemi owo ɔsɔŋɔde ediomi, baba owo kiet ibiatke ediomi oro, inyuŋ idianke ŋkpɔ ke esit. 16Edi ekeŋwɔŋɔ mme uŋwɔŋɔ enɔ Abraham ye eyen emi enye edibonde. Idɔhɔke enye ete, Nditɔ emi afo edibonde, nte ŋkpɔ eke mmɔ edide ediwak; edi etiŋ nte owo etiŋ abaŋa owo kiet ete, Eyen emi afo edibonde; ndien Eyen oro edi Christ. 17Mmɔdɔhɔ ntem nte, Ibet, eke edide ke isua ikie inaŋ ye edip ye duop ema ekebe, ibiatke ediomi eke Abasi ekebemde iso ɔbɔp, inyuŋ isinke uŋwɔŋɔ Abasi ɔwɔrɔ ikpikpu. 18Koro edieke erida udeme nnyene asaŋade ye erinim ibet, isaŋake aba ye uŋwɔŋɔ: edi Abasi akada uŋwɔŋɔ emen ŋkpɔ emi ɔnɔ Abraham. 19Nso ke ikpɔdɔhɔ ndien ibaŋa ibet? Ekada ibet edisin, man ndudue owut idem, tutu Eyen oro ekeŋwɔŋɔde uŋwɔŋɔ enɔ Enye edidi; ekeda mme angel enɔ ibet, ke ubɔk owo emi esinede ke ufɔt. 20Edi esine-ufɔt oro isaŋake ŋkpɔ ye Eyen kiet oro; edi Abasi edi kiet. 21Nte ibet aŋwana ndien ye mme uŋwɔŋɔ Abasi? Idige ntre. Koro edieke ekɔnɔde ibet emi ekemede ndinam owo odu uwem, ke akpanikɔ edinen ido okpoto ke ibet oro. 22Edi ŋwed Abasi okokui kpukpru ŋkpɔ abaha esin ke idak idiɔk-ŋkpɔ, man ekpemen uŋwɔŋɔ, emi otode ke eribuɔt-idem ye Jesus Christ, enɔ mmɔ emi enimde ke akpanikɔ.

23Edi ke ini mbuɔtidem oro mika-idige kaŋa, ekesin nnyin ke itie-ukpeme ke idak ibet, ebaha nnyin enim do enɔ mbuɔtidem eke ediyararede. 24Ntem ke ibet ekedi andikpeme nnyin, emi adade nnyin ɔsɔk Christ, man enam ikpe etebe nnyin ke mbuɔtidem. 25Edi kini mbuɔtidem ama ekedi, nnyin iduhe aba ke idak andikpeme. 26Koro kpukpru mbufo edi nditɔ Abasi oto ke mbuɔtidem mbufo ke Christ Jesus. 27Koro kpukpru mbufo emi ekanade baptism ebe eduk ke Christ ememen Christ esine. 28Jew ye Greek ikemeke ndidu, ofin ye eyen-isɔŋ ikemeke ndidu, erenowo ye ŋwan inyuŋ ikemeke ndidu; koro kpukpru mbufo edi kiet ke Christ Jesus. 29Edi edieke mbufo edide eke Christ, mbufo enyuŋ edi nditɔ Abraham; nte uŋwɔŋɔ edide, mbufo edi mme ada-udeme nyene.

Currently Selected:

ŊWED MBON GALATIA 3: ENA

Highlight

Copy