ŊWED MBON GALATIA 6

Enyime Ndibiom Mbiomo Kiet Eken

1NDITƆ-ETE, edieke ekutde owo ke ndudue ekededi, mbufo, emi edide mbon spirit, esaŋa ke spirit ifure-ifure ido, eda enye efiak esin ke itie; nyuŋ kpeme idem, mbak edidomo fi ŋko. 2Ebiom mbiomo kiet eken; ntem ke mbufo edinim ibet Christ. 3Koro edieke owo abatde idem ke ŋkpɔ ke ini enye midige ŋkpɔ, enye ababiaŋa idem. 4Yak owo kiet kiet odomo utom esie ɔfiɔk, ekem enye eyenyene se enye oburede abaŋa ke idem esie ikpɔŋ, idibureke ke idem owo eŋwen. 5Koro owo kiet kiet enyene ndibiom mbiomo idem esie.

6Yak owo eke ɔbɔde ukpep-ŋkpɔ ke ikɔ Abasi ɔfɔn ido ye andikpep enye ke kpukpru nti enɔ. 7Ekuyak ebiaŋa mbufo; owo ikemeke ndibiaŋa Abasi: se ededi owo ɔtɔde, oro ke enye edinyuŋ ɔdɔk. 8Owo eke ɔtɔde ɔnɔ obukidem eyedɔk mbiara oto obukidem; edi owo eke ɔtɔde ɔnɔ Spirit, oto ke Spirit ke enye eyedɔk nsinsi uwem. 9Eyak ikukpa mba ke erinam eti ŋkpɔ; koro ke edikem ini nnyin iyedɔk mbuŋwum, edieke nnyin miyakke idem emem nnyin. 10Mmɔdo ndien, adaŋa nte ikutde ifet, eyak nnyin ifɔn ido ye kpukpru owo, akpan-akpan ye mmɔ emi etode ke ufɔk mme andinim ke akpanikɔ.

11Ese ikpɔ mbai ŋwed emi ŋwetde ke ubɔk mi nnɔ mbufo. 12Mmɔ emi eyomde ŋwut-idem ke obukidem eŋwaŋwana ndinyik mbufo ena mbobi; mmɔ enam mbak edisin mmɔ enyin ebaŋa cross Christ. 13Koro kpa mmɔ emi enade mbobi inimke ibet: edi mmɔ eyom mbufo ena mbobi man mmɔ ebure mbure ebaŋa obukidem mbufo. 14Edi nsa mi ndibure mbure, ibɔhɔke ke cross Ɔbɔŋ nnyin Jesus Christ, emi ekɔŋde ererimbot do ewot enɔ mi, enyuŋ ekɔŋde mi do ewot enɔ ererimbot. 15Mbobi idige ŋkpɔ, eritre ndina mbobi inyuŋ idige ŋkpɔ, edi erimana obufa edi ŋkpɔ. 16Emem ye mbɔm akpakam odoro kpukpru mme andisaŋa ke item emi ke idem, onyuŋ odoro Israel Abasi.

17Ɔtɔŋɔde ke emi baba owo kiet okutimere mi, koro mbiomde idiɔŋɔ Jesus ke idem nsaŋa.

18Mfɔn Ɔbɔŋ nnyin Jesus Christ akpakam odu ye spirit mbufo, nditɔ-ete. Amen.

Currently Selected:

ŊWED MBON GALATIA 6: ENA

Highlight

Copy