ŊWED MBON EPHESUS 6

Nditɔ Ekop Uyo Mme Ete ye Mme Eka Mbufo; Ikɔt Abasi Esine Kpukpru Ŋkpɔ Ekɔŋ Abasi ke Idem Mbufo

1NDITƆ ekop uyo mme ete ye mme eka mbufo ke Ɔbɔŋ; koro emi enende. 2Kpono usɔ ye uka (emi edi akpa ibet eke asaŋade ye uŋwɔŋɔ), 3man ɔkpɔfɔn ye afo, afo okponyuŋ odu uwem ebigi ke isɔŋ.

4Ndien mbufo mme ete, ekufiomo nditɔ mbufo; edi ekama mɔ ke ntunɔ ye item Ɔbɔŋ.

5Ifin, esuk ibuot enɔ mmɔ emi edide mme ete ufɔk mbufo ke obukidem, ke uteŋe ye nnyekidem ye ofuri esit, nte enam enɔ Christ. 6Ekunam utom enyin owo, nte mbon mbukpek, edi enam se Abasi amade ye esit kiet nte ifin Christ; 7eda erinyime esit enam utom, nte ŋkpɔ eke mbufo minamke inɔ owo, edi enamde enɔ Ɔbɔŋ. 8Koro mbufo efiɔkde ete eti ŋkpɔ ekededi eke owo anamde, kpa oro ke enye editɔŋɔ ntak ɔbɔ ke ubɔk Ɔbɔŋ, ye enye edide ofin ye enye edide eyen-isɔŋ.

9Ndien mbufo mme ete, enam kpa ntem ye mmɔ, enyuŋ etre nditiŋ ikɔ ndikhe; sia efiɔkde ete, Ete mmɔ ye eke mbufo odu ke heaven; Enye inyuŋ iteŋeke owo enyin.

10Nte akpatre ikɔ, esɔŋɔ idem ke Ɔbɔŋ ye ke ɔkpɔsɔŋ odudu Esie. 11Esine ofuri ŋkpɔ-ekɔŋ Abasi, man mbufo edikeme ndiŋwana ye ŋkari Satan. 12Koro nnyin miŋwanake eŋwan nnyin ye obuk ye iyip, edi iŋwana ye mbɔŋ, ye mme enyene-odudu ye mme andikara ekim ererimbot, ye udim mme idiɔk spirit eke edude ke enyɔŋ. 13Mmɔdo eda ofuri ŋkpɔ-ekɔŋ Abasi, man mbufo edikeme ndisɔŋɔ nda ke usen idiɔk, enyuŋ esɔŋɔ eda ke ema ekenam kpukpru ŋkpɔ. 14Esɔŋɔ eda ndien: eda akpanikɔ ebɔbɔ ke isin, enyuŋ esine edinen ido nte ukwak ikpanesit, 15enyuŋ eda mbeŋe-idem ndikwɔrɔ gospel emem esine nte ikpa-ukot; 16enyuŋ eda mbuɔtidem nte otu-ekɔŋ, emi edidade ekeme ndinime kpukpru enyim ikaŋ andidiɔk. 17Enyuŋ eyara erinyaŋa nte ndun ke ibuot, enyuŋ ekama ofut Spirit, emi edide ikɔ Abasi: 18eda kpukpru akam ye mkpe-ubɔk ebɔŋ akam ke Spirit kpukpru ini, enyuŋ ekpeme ndinam ntem, enyuŋ eda ofuri ifik ye mkpe-ubɔk ekpeme ndibɔŋ akam mbaŋa kpukpru ikɔt Abasi, nnyuŋ mbaŋa mi ŋko, 19man enɔ mi ukeme nditat inua ntiŋ ikɔ nyarare ndibe-ŋkpɔ gospel ye uko; 20emi ndide isuŋ esie ke ŋkpɔkɔbi; kpaŋ ŋkwɔrɔ enye ye uko nte odotde mi ndikwɔrɔ.

21Tychicus, edima eyen-ete ye ata isuŋ Ɔbɔŋ eyesian mbufo kpukpru ŋkpɔ, man mbufo efiɔk se ibaŋade mi ye nte ntiede. 22Ŋkɔdɔŋ enye edi ke ɔtɔ mbufo ke ntak emi, man mbufo efiɔk nte ŋkpɔ etiede ye nnyin, enye onyuŋ ɔdɔŋ mbufo esit.

23Emem ye ima eke asaŋade ye mbuɔtidem akpakam oto ke ubɔk Abasi Ete ye Ɔbɔŋ Jesus Christ etiene nditɔ-ete. 24Mfɔn akpakam odu ye kpukpru mmɔ emi emade Ɔbɔŋ nnyin Jesus Christ ye ima eke midibiarake.

Currently Selected:

ŊWED MBON EPHESUS 6: ENA

Highlight

Copy