ŊWED MBON EPHESUS 5

Mbufo Esaŋa Nte Nditɔ Uŋwana Enyun Ediaŋade Ekpɔŋ Kpukpru Mbubiam Ido

1MMƆDO edi mme andikpebe Abasi, nte ndima nditɔ 2enyuŋ esaŋa ke ima kpa nte Christ ŋko akamade mbufo, okonyuŋ ayakde Idem Esie ɔnɔ kibuot nnyin, nte enɔ ye uwa emi edade esɔk Abasi, emi osiode ufik eke enemde. 3Edi ama edi use, ye kpukpru mbubiam ido, mme erisin esit ke ŋkpɔ owo, ekuyak etiŋ ebaŋa ŋkpɔ oro ke otu mbufo, nte odotde ikɔt Abasi. 4Ekunyuŋ eyak etiŋ ndek-ndek ikɔ, mme ndisime ikɔ, mme ikɔ idiɔk mbubru, emi midotke mbufo: edi ekam enɔ Abasi ekɔm. 5Koro mbufo emetim efiɔk emi, ete baba anam use kiet, mme anam mbubiam ido, mme esin esit ke ŋkpɔ owo, emi edide okpono ndem, inyeneke udeme ke Obio Ubɔŋ Christ ye Abasi. 6Ekuyak owo ada ikpikpu ikɔ abiaŋa mbufo; koro ke ntak ido emi iyaresit Abasi etiene nditɔ ntut-utɔŋ. 7Ntre ekukabare ebuana ŋkpɔ ye mmɔ. 8Koro mbufo ekedi ekim totoko, edi emewɔrɔ edi uŋwana ke Ɔbɔŋ ke emi: 9esaŋa nte nditɔ uŋwana (koro mfri eke otode uŋwana esine ke kpukpru nti ido ye edinen ido ye akpanikɔ); 10edomo efiɔk se itimde inem Ɔbɔŋ esit. 11Ekunyene mbubehe ye mme utom ekim eke miŋwumke mfri, edi ekam eda mmɔ ewɔrɔ ke uŋwana: 12koro nditetiŋ mbaŋa se mmɔ enamde ke ndibe edi ŋkpɔ but. 13Edi eyarare ewut kpukpru ŋkpɔ eke edade ewɔrɔ ke uŋwana; 14koro sededi eke eyararede akabare edi uŋwana. Mmɔdo ɔdɔhɔde ete,

Demere, afo emi edede idap,

Nyuŋ set ke mkpa,

Ndien Christ eyeyama ɔnɔ fi.

15Mmɔdo etiŋ enyin ekpeme nte esaŋade: ekusaŋa nte ndisime, edi esaŋa nte mbon eti ibuot. 16Ededep ifet, koro mme usen ediɔkde. 17Mmɔdo ekudi mme ɔkɔi, edi etim efiɔk se Ɔbɔŋ amade. 18Ekunyuŋ ekpa mmin; oro ɔwɔrɔ otime -otime ido: edi eyɔhɔ ye spirit. 19Eda psalm ye hymn ye ikwɔ spirit eneme nneme ye kiet eken, ekwɔ enyuŋ enam edinem uyom ke esit mbufo enɔ Ɔbɔŋ. 20Enɔ Abasi Ete ekɔm kpukpru ini ebaŋa kpukpru ŋkpɔ, ke enyiŋ Ɔbɔŋ nnyin Jesus Christ.

21Esuk idem enɔ kiet eken ke uteŋe Christ.

22Iban, esuk idem enɔ mme ebe mbufo, nte enam enɔ Ɔbɔŋ. 23Koro ebe edi ibuot ɔnɔ ŋwan, kpa nte Christ edide Ibuot ɔnɔ ufɔk Abasi, ke emi Enye edide Andinyaŋa Idem. 24Edi nte ufɔk Abasi osukde idem ɔnɔ Christ, yak iban etie kpasuk ntre ye mme ebe mmɔ ke kpukpru ŋkpɔ.

25Mme ebe, ema iban mbufo, kpa nte Christ akamade ufɔk Abasi, okonyuŋ ayakde Idem ɔnɔ ke ibuot esie; 26man Enye akpada mmɔŋ ɔkɔrɔ ye ikɔ Abasi eyet ɔkɔp esie, 27anam enye asana; man akpada enye ɔnɔ Idem Esie nte ufɔk Abasi emi ɔyɔhɔde ye ubɔŋ, minyuŋ inyeneke ntɔi mme eriŋwine mme oruk ŋkpɔ eke etiede ntre; edi man enye asana onyuŋ anana ndo. 28Kpa ntre ke mme ebe ekpama iban mmɔ nte idem mmɔ. Owo eke amade ŋwan esie ama idem esie: 29koro akananam baba owo kiet isuaha obukidem esie, edi ɔbɔbɔk enye, onyuŋ otim ekpeme enye, kpa nte Christ anamde ye ufɔk Abasi: 30Koro nnyin idide ndido idem Esie. 31Ke ntak emi owo edikpɔŋ ete ye eka esie, edinyuŋ adadiana ye ŋwan esie; ndien mmɔ mbiba eyekabare edi obuk kiet. 32Akamba ndibe-ŋkpɔ edi emi; edi ntiŋ mbaŋa Christ ye ufɔk Abasi. 33Edi Yak owo kiet kiet ama ŋwan esiemɔ nte amade idem esie: ŋwan onyuŋ eteŋe ebe esie.

Currently Selected:

ŊWED MBON EPHESUS 5: ENA

Highlight

Copy