ŊWED MBON EPHESUS 4

Edidiana Kiet Emi Odude ke Ikpɔhidem Christ

1MMƆDO ami, emi ndide owo-ŋkpɔkɔbi ke Ɔbɔŋ, mmekpe mbufo ubɔk, nte, esaŋa nte odotde ikot emi ekokotde mbufo, 2ke kpukpru nsuk-idem ye ifure-ifure ido, ye anyan ime; 3eme ime ye kiet eken ke ima; esin ifik eda emem nte uruk ebɔp idem edian ɔtɔ kiet ke Spirit. 4Idem kiet odu, Spirit kiet onyuŋ odu, kpa nte ekekotde mbufo ke idori-enyin kiet emi asaŋade ye ikot mbufo; 5Ɔbɔŋ kiet onyuŋ odu, ye mbuɔtidem kiet, ye baptism kiet; 6Abasi kiet odu, kpa Ete kpukpru owo, emi akarade kpukpru owo, onyuŋ ɔyɔhɔde ke kpukpru owo, onyuŋ odu ke esit kpukpru owo. 7Edi ema enɔ kpukpru nnyin kiet kiet ŋkpɔ mfɔn eke nnyin, nte Christ ododomo ɔnɔ nnyin. 8Mmɔdo edɔhɔde ete,

Ke adaŋemi Enye ɔdɔkde ke enyɔŋ, Enye ada mbuotekɔŋ ɔnyɔŋ,

Ndien ɔnɔ owo enɔ.

9(Ikɔ emi, ete, Enye ɔdɔk ɔwɔrɔ didie? ɔwɔrɔ ete, Enye ama onyuŋ ɔsuhɔre edi mi ke ata idak isɔŋ? 10Enye emi ɔkɔsuhɔrede edi Enye emi ɔdɔkde, okoŋ akan kpukpru mme heaven, man Enye ɔyɔhɔ ke kpukpru ŋkpɔ) 11Ndien Enye ɔkɔnɔ ndusuk owo nte mme apostle; onyuŋ ɔnɔ ndusuk owo nte mme asiak-uduak Abasi, onyuŋ ɔnɔ ndusuk owo nte mme ɔkwɔrɔ-gospel, onyuŋ ɔnɔ ndusuk owo nte mme andikpeme ye mme anditeme; 12man oto do enam ikɔt Abasi efɔn ema, enyuŋ enam utom Abasi okut unen, enyuŋ enam Idem Christ ɔkɔri: 13Tutu kpukpru nnyin ikabare idi kiet ke mbuɔtidem ye ke ifiɔk Eyen Abasi, ikɔri ikpon iwɔrɔ owo, isim ofuri idaha uyɔhɔ Christ: 14man nnyin ikudi aba nditɔwɔŋ, emi ukpep-ŋkpɔ etode ke nsio-nsio edem ebara nte ofim emen etop eduɔk, eda nnyin ediyo ke ŋkari owo eke efiɔkde nditibi usuŋ abiaŋa; 15Edi man nnyin imum akpanikɔ ye ima ikɔri ke kpukpru ŋkpɔ, ikabare isim Enye emi edide Ibuot, kpa Christ; 16emi otode Enye ofuri Idem ada se kpukpru ikek otipde, nte idomo utom ndido kiet kiet edide, ɔsɔŋɔ akpaha adiana, ɔdɔdiɔŋ ɔkɔri adaha ada ke ima.

17Mmɔdɔhɔ ndien ntem, nnyuŋ nsɔŋɔ ntiŋ ke Ɔbɔŋ, nte mbufo ekusaŋa aba nte mme Gentile efen esaŋade, ke ikpikpu ekikere mmɔ; 18emi enyin esit okimde mmɔ; unana ifiɔk mmɔ ye nsɔŋesit mmɔ enyuŋ enamde mmɔ eda nsan-nsan ye uwem Abasi; 19sia esit mmɔ odorode ufiɔn, mmɔ eyak idem enɔ mbukpo ido, ndinam mbubiam ido ye okpum. 20Idige ntre ke mbufo ekekpep Christ; 21ŋkɔm mbufo ekekop ikɔ Esie enyuŋ ekpep ŋkpɔ ke Enye, kpa akpanikɔ eke odude ke Jesus; ete, esio akani owo eduɔk, 22emi ekemde ye ido uwem mbufo ke eyo oko, onyuŋ ɔdiɔŋde diɔŋ abiara oto ke eritiene eke mbufo etienede idiɔk itɔŋ eke ebiaŋade owo; 23Enyuŋ ekabare edi obufa ke spirit eke odude ke esit mbufo, enyuŋ emen obufa owo esine, 24emi ebotde ebiet Abasi ke edinen ido ye edisana ido akpanikɔ.

25Mmɔdo eduɔk nsu, mbufo kpukpru enyuŋ etiŋ akpanikɔ enɔ mbɔhiduŋ esie: koro nnyin idide mbak idem kiet eken. 26Eyat esit, ndien ekudue; ekuyak utin ɔsuhɔre edisim iyaresit mbufo: ekunyuŋ enɔ Satan ufaŋ. 27Owo eke esiyipde inɔ, okuyip aba; 28edi yak enye akam anam ɔkpɔsɔŋ utom, ada ubɔk esie anam eti utom, man enye enyene se adade ɔnɔ owo eke odude ke unana. 29Ekuyak ndek-ndek ikɔ ɔwɔrɔ mbufo ke inua, edi etiŋ se iŋwamde owo ndikɔri ke mfɔn, nte unana owo edide, man eda ufɔn enɔ mmɔ eke ekopde. 30Ekunyuŋ eyat Edisana Spirit Abasi esit, emi edi ke Enye ke ema efik mbufo idiɔŋɔ ebeŋe usen erifak. 31Esioŋo kpukpru ndot-ndot ekikere, ye ifuresit, ye iyaresit, ye utɔk, ye isuŋi efep ke otu mbufo, ye kpukpru oruk udu: 32enyuŋ efɔn ido ye kiet eken, enyuŋ enyene esit mbɔm, enyuŋ efen kiet eken, kpa nte Abasi okonyuŋ efende mbufo ke Christ.

Currently Selected:

ŊWED MBON EPHESUS 4: ENA

Highlight

Copy