ŊWED MBON EPHESUS 3

Iso Utom Emi Paul Akanamde ke Otu Mbon Idut

1KE ntak emi ami Paul, emi ndide owo-ŋkpɔkɔbi Christ Jesus mbaŋa mbufo mme Gentile— 2Ŋkɔm mbufo emekop ebaŋa ufɔn eke Abasi ekesinde mi ke ubɔk, ete nda ŋkama nnɔ mbufo; 3adaŋa nte akayararede ndibe-ŋkpɔ ɔnɔ mi, nte mma mbem iso ŋwet ibio-ibio: 4eke mbufo ekemede ndida ŋkot ŋkere, adaŋa nte ntimde mfiɔk ndibe-ŋkpɔ Christ: 5emi nditɔ owo mikɔfiɔkke ke mme eyo oko, nte Spirit ama ayarare enye ke emi ɔnɔ nti apostle ye prophet; 6ete, ke Christ Jesus, mme Gentile eyedi mme ebuana-udeme ye mme Jew, ye ndido idem kiet ye mmɔ, ye mme anditiene mmɔ mbuana ke uŋwɔŋɔ oto ke gospel: 7emi ekanamde mi isuŋ esie, adaŋa nte enɔ mfɔn Abasi emi Enye ɔkɔnɔde mi edide, asaŋa ekekem ye utom eke odudu Esie anamde.

8Ekenɔ mi, emi ŋkpride ŋkan ata andikpri ŋkan ke otu ikɔt Abasi, ufɔn emi, ete ŋkwɔrɔ nnɔ mme Gentile uwak inyene Christ, eke owo mikemeke ndiduŋɔre mma: 9nnyuŋ nnam aŋwaŋa kpukpru owo enyin nte Abasi akadade ayarare ndibe-ŋkpɔ Esie, emi ɔtɔŋɔde mme eyo odibe ke Abasi, emi edide Andibot kpukpru ŋkpɔ: 10Man oto do ke emi, ekpada ufɔk Abasi enam mme andikara ye mme enyene-odudu emi edude ke mme itie heaven efiɔk uwak-uwak ɔniɔŋ Abasi; 11nte asaŋade ekekem ye nsinsi uduak emi Enye akaduakde ke Christ Jesus Ɔbɔŋ nnyin: 12ke Enye ke nnyin inyuŋ inyene esit ndisaŋa ŋkpere Abasi ye uko, oto ke mbuɔtidem eke nnyin inyenede ye Enye.

13Mmɔdo mmebeŋe mbufo nte, ekuyak idem eyemere mbufo abaŋa ukut eke ŋkutde ke ibuot mbufo; koro ukut emi edide ubɔŋ ɔnɔ mbufo.

14Ke ntak emi ntɔŋɔ edɔŋ nnɔ Ete, 15emi esiode kpukpru ubon ke enyɔŋ ye ke isɔŋ enyiŋ ke Enye, 16nte, Enye akpakam ada Spirit Esie anam mbufo esɔŋɔ idem enyene odudu ke ukpɔŋ, nte ekemde ye uwak ubɔŋ Esie; 17Christ akpakam onyuŋ oduŋ ke esit mbufo oto ke mbuɔtidem; mbufo ekpekam enyuŋ emum ŋkam enyuŋ esɔŋɔ ewuhɔ ke ima, 18man mbufo ekeme nditiene kpukpru ikɔt Abasi ntim mfiɔk se idide ubom ye uniɔŋ ye ukoŋ ye utuŋɔ, nnyuŋ mfiɔk ima Christ emi ayaŋade ifiɔk; 19man mbufo eyɔhɔ esim ofuri uyɔhɔ Abasi.

20Enye emi ekemede ndinam ŋkpɔ awak akan se nnyin ibeŋede inyuŋ ikerede, nte odudu Esie eke anamde utom ke idem nnyin edide, 21yak ubɔŋ enyene Enye ke ufɔk Abasi ye ke Christ Jesus, ke kpukpru emana ke nsinsi nsinsi. Amen.

Currently Selected:

ŊWED MBON EPHESUS 3: ENA

Highlight

Copy