ŊWED MBON EPHESUS 2

Ke Mfɔn Ke Abasi Akanyaŋa Nnyin Oto ke Christ

1MBUFO nde ekenyuŋ ekpaŋa ke ndudue ye mme idiɔk-ŋkpɔ mbufo, 2emi mbufo esaŋade ke esit ke ini oko, nte ido eyo eke ererimbot emi edide, ekenyuŋ esuk ibuot enɔ ɔbɔŋ emi akarade edem ikpa-enyɔŋ, kpa spirit emi anamde utom kemi ke esit nditɔ ntut-utɔŋ. 3Kpukpru nnyin ŋko ikonyuŋ isaŋa ye mmɔ ke ini oko, idu uwem ke idiɔk itɔŋ obukidem nnyin, inam se idɔŋde obukidem ye ekikere nnyin, ikonyuŋ idi nditɔ iyaresit ke uduot nnyin, kpa nte mmɔ eken.

4Edi Abasi, emi enyenede uwak mbɔm, oto ke akwa ima eke Enye akamade nnyin, 5akanam nnyin emi ikakpaŋade ke mme ukwaŋkpɔ nnyin idu uwem ke Christ (ke mfɔn ke ema enyaŋa mbufo), 6okonyuŋ anam nnyin iset ye Enye, onyuŋ anam nnyin itie ke mme itie heaven ke Christ Jesus; 7kpaŋ ke mme eyo eke edidide Enye akpada mfɔnido eke Enye ɔfɔnde ido ye nnyin ke Christ Jesus, owut mfɔn Esie emi awakde akan. 8Koro ke mfɔn ke ema enyaŋa mbufo oto ke mbuɔtidem: erinyaŋa emi inyuŋ itoho mbufo; edi Abasi ɔnɔnɔ: 9itoho se mbufo enamde, mbak owo baba kiet edibure mbure. 10Koro nnyin idi se ubɔk Esie akanamde; ke Christ Jesus ke Enye okobot nnyin, ete nnyin inam nti utom, emi Abasi ekebemde iso onim ete, nnyin ikpasaŋa ke esit.

11Mmɔdo mbufo eti ete, mbufo ekedi mme Gentile ke obukidem ke eyo oko, emi mmɔ emi ekerede mme ana-mbobi-mbobi obukidem, emi edade ubɔk enim—ekokotde mbufo mme anana-mbobi; 12ete, mbufo ikasaŋake ŋkpɔ ye Christ ke ini oro, ikonyuŋ inyeneke udeme ke obio Israel, inyuŋ idi isen ye mme ediomi eke edade mme uŋwɔŋɔ Abasi edi; inyeneke idori-enyin, inyuŋ ifiɔkke Abasi ke ererimbot. 13Edi ke emi, ke Christ Jesus, ema enam mbufo, emi ekadade nsan-nsan ke ini oko, esaŋa ekpere ke iyip Christ. 14Koro Enye ke Idem Esie edi emem nnyin: Enye amanam nnyin mbiba (mme Jew ye mme Gentile) idi kiet, omonyuŋ owuri ibibene emi abaharede nnyin, kpa usua oro esinede ke ufɔt nnyin: 15Ke obukidem Esie ke Enye amabiat ibet emi esinede ke mme ewuhɔ ye mme item, kpaŋ ke Idem Esie Enye akpada nnyin ke edem mbiba obot ikabare idi obufa owo kiet, esin emem ntre; 16okponyuŋ ada cross Esie anam nnyin ke edem mbiba itie ke emem ye Abasi nte owo kiet, ke Enye ama akada cross owot usua oro kufɔt nnyin. 17Ndien Enye ama edi edikwɔrɔ emem ɔnɔ mbufo emi ekedude nsan-nsan, ye mmɔ emi edude mkpet-mkpet; 18koro oto Enye ke nnyin ke edem mbiba inyene usuŋ eke isaŋade ke Spirit kiet itiene Ete. 19Mmɔdo ndien mbufo idige aba isen ye oduduŋ, edi edi mbio-mbio kiet ye ikɔt Abasi, enyuŋ edi mbon ufɔk Abasi: 20ema ebɔp mbufo edori kenyɔŋ ukot-ufɔk emi edide mme apostle ye mme prophet, Christ Jesus ke Idem Esie onyuŋ edi akan itiat inuk: 21Ke Enye ke kpukpru ufɔk kiet kiet etim ekpaha ekɔri ewɔrɔ edi edisana temple ke Ɔbɔŋ. 22Ke Enye ke ekobɔp mbufo nde esin do, ete edi itie-iduŋ Abasi ke Spirit.

Currently Selected:

ŊWED MBON EPHESUS 2: ENA

Highlight

Copy