ŊWED MBON PHILIPPI 1

Paul Ɔkɔm Onyuŋ Ɔbɔŋ Akam Abaŋa Kpukpru Ikɔt Abasi

1PAUL ye Timothy, emi edide mme owo Christ Jesus, ewet ŋwed emi enɔ esɔk kpukpru ikɔt Abasi ke Christ Jesus emi edude ke Philippi, ye nyebiowo ye mme deacon: 2Mfɔn ye emem akpakam oto ke ubɔk Abasi Ete nnyin ye Ɔbɔŋ Jesus Christ osim mbufo.

3Ŋkɔkɔm Abasi mi ke kpukpru eriti eke ntide mbufo; 4nnyuŋ nnam kpukpru mkpe-ubɔk mi kabaŋa kpukpru mbufo kpukpru ini ye idaresit, 5koro mbufo ekebuanade ke utom usuan gospel toto ke akpa usen tutu osim emi; 6mmonyuŋ mbure mfiɔk ŋkpɔ emi, nte, Enye emi ɔkɔtɔŋɔde eti utom ke esit mbufo eyenam enye ɔfɔn ama ndien edisim usen Jesus Christ: 7kpa nte enende mi ndinyene utɔ ekikere emi mbaŋa kpukpru mbufo; mmum mbufo ke esit mi ŋkama, koro ke ŋkpɔkɔbi mi, ye ke eneni eke nnenide man gospel ɔsɔŋɔ ada, mbufo kpukpru esaŋa ntre ye ami ebuana mfɔn Abasi. 8Koro Abasi edi ntiense mi, ete, kpukpru mbufo edɔŋ mi ye mbɔm Christ Jesus. 9Ndien mmebeŋe ntem nte, ima mbufo akpakam ɔdɔdiɔŋ awak ke ifiɔk ye kpukpru ikike; 10man mbufo ekeme ndidomo mfiɔk se ifɔnde ikan, kpaŋ mbufo edi edideŋi ekunyuŋ enyene ndudue tutu osim usen Christ; 11enyuŋ eyɔhɔ ye mbuŋwum eti ido, emi otode Jesus Christ, enɔ Abasi ubɔŋ ye itoro.

12Edi nyom mbufo efiɔk, nditɔ-ete, ete se ikotibede inɔ mi akam akabare anam gospel asuana; 13oto do kpukpru mbon-ekɔŋ ke nna-ekɔŋ ɔbɔŋ ye kpukpru mmɔ eken eneŋere ekut ete, ema ekɔbi mi kabaŋa Christ; 14ŋkpɔkɔbi mi onyuŋ anam ediwak nditɔ-ete ke Ɔbɔŋ esɔŋɔ esit ekaha etiŋ ikɔ Abasi ye uko, enana ndik. 15Ke akpanikɔ ndusuk mmɔ ekwɔrɔ Christ ke esit ufup ye utɔk, ndusuk ŋko ekwɔrɔ ke eti esit: 16Ŋkaŋ kiet ekwɔrɔ oto esit ima, sia mmɔ ediɔŋɔde ete, ema enim mi ete ŋŋwana eŋwan gospel; 17ŋkaŋ eken ekwɔrɔ Christ ke esit ndomo-idem, idige esit akpanikɔ, eyom ndida ukut ntiene mi ke ŋkpɔkɔbi mi. 18Ɔwɔrɔ didie ndien? nte ededi, ye edide ke mbubik ye edide ke akpanikɔ, ke ekwɔrɔ Christ; ndien mmedat esit ke oro: 19ke akpanikɔ nyenyuŋ ndadara; koro mmɔfiɔk nte ŋkpɔ emi eyewɔrɔ erinyaŋa ɔnɔ mi, oto ke mkpe-ubɔk mbufo, ye Spirit emi Jesus Christ edinɔde mi: 20koro mmenyene mbuɔtidem ye idori-enyin nte, but idinamke mi ke baba ŋkpɔ kiet, edi ye ofuri uko, nte kpukpru ini, kpasuk ntre ke emi, Christ eyenyene ukpono ke idem mi, ekpedi ke uwem ekpedi ke mkpa. 21Koro ama edi ami, eridu uwem ɔwɔrɔ Christ ɔnɔ mi, erikpa mkpa onyuŋ ɔwɔrɔ udori. 22Edi edieke nsuk ndodu uwem ke obukidem, oro ɔkpɔwɔrɔ mfri utom ɔnɔ mi-ŋkaŋ eke ŋkpemekde ŋkemeke nditiŋ. 23Ekikere asiaha mi iba; ɔdɔŋ mi ndidaha nnyɔŋ ŋkodu ye Christ, koro edi oro otim ɔfɔn akan: 24edi kabaŋa ufɔn mbufo, akam ana nte nsuk ndu uwem ke obukidem. 25Ndien sia nnimde nte edi ntem, mmɔfiɔk nte nyesuk ndu uwem, nnyuŋ ndu ye mbufo kpukpru, man mbufo ekɔri enyuŋ edara ke mbuɔtidem: 26Man mbufo enyuŋ enam mbure uwak-uwak ke Christ Jesus ebaŋa mi, oto ke erifiak eke ndifiakde ndidu ye mbufo.

27Ekam edu uwem ke otu mbio-obio mbufo nte odotde ye gospel Christ, man ye ndidide ndise mbufo ye mmonyuŋ ndige, nyekop mbaŋa itie mbufo, nte, mbufo esɔŋɔ eda enyene spirit kiet, ke enyuŋ eda esit kiet eŋwana eŋwan ebaŋa mbuɔtidem emi odude ke gospel; 28mme asua mbufo ekusin mbufo ndik ke idem ke baba ŋkpɔ kiet: emi edinyuŋ edide idiɔŋɔ nsobo ɔnɔ mmɔ, edi edidi idiɔŋɔ erinyaŋa ɔnɔ mbufo; idiɔŋɔ oro onyuŋ oto Abasi. 29Koro eyak enɔ mbufo kabaŋa Christ, idige ndibuɔt idem ye Enye ikpɔŋ, edi ndinyuŋ ŋkut ndutuhɔ kabaŋa Enye; 30sia mbufo ke eŋwana kpa idem eŋwan eke mbufo ekekutde ye ami, enyuŋ ekopde ete ke osuk ododu ye ami.

Currently Selected:

ŊWED MBON PHILIPPI 1: ENA

Highlight

Copy