ŊWED MBON PHILIPPI 2

Christ Ɔsuhɔde Idem Ndien Abasi Ɔnɔ Enye Ubɔŋ

1EDIEKE odudu ndidemere mbufo odude ke Christ, edieke ima ekemede ndituk mbufo esit, edieke mbufo enyenede nsaŋa ye Spirit, edieke ima ye mbɔm odude mbufo ke esit, enam nnyene idaresit ɔyɔhɔ-ɔyɔhɔ. 2Yak mbufo edi mbon esit kiet, emi enyuŋ enyenede ima kiet, enyuŋ enyenede iwuk kiet, ye ekikere kiet. 3Ekunam baba ŋkpɔ kiet ke ndomo-idem mme ke ntaŋ-idem, edi yak owo kiet kiet ada nsuhɔre-esit abat ete, owo eŋwen ɔfɔn akan imɔ. 4Kuyak mbufo ese ŋkpɔ eke mbufo, edi ekam ese ŋkpɔ owo eŋwen. 5Yak mbufo enyene oruk esit emi okodude ke Christ Jesus. 6Okposuk edi nte enye ekedide mbiet Abasi, Enye ikabatke ndida ŋka-ŋka ye Abasi ke ŋkpɔ eke okpomumde akama: 7edi Enye akaŋwaŋa idem Esie, ada mbiet ofin, owut idem nte owo; ndien sia Enye ɔwɔrɔde edi ke ido owo, 8Enye ɔsuhɔre idem, akabare osuk ibuot tutu ɔsuŋɔ ke mkpa, kpa mkpa cross. 9Ke ntak oro Abasi ekemenere Enye onim ke enyɔŋ, onyuŋ ɔnɔ Enye enyiŋ emi okoŋde akan kpukpru enyiŋ; 10man ke enyiŋ Jesus kpukpru edɔŋ ekpetɔŋɔ enɔ Abasi, ye eke mme andidu ke heaven, ye eke mme andidu ke isɔŋ, ye eke mme andidu ke idak isɔŋ; 11kpukpru edeme ekponyuŋ enyime ete Jesus Christ edi Ɔbɔŋ, enɔ Abasi Ete ubɔŋ.

12Ntre, ndima mi, kpa nte mbufo ekam esukde ibuot enɔ uyo mi kpukpru ini, idige ke ini ndude ye mbufo ikpɔŋ, edi akpan-akpan ke ini mmenduhe ye mbufo, esaŋa ke ndik ye nnyek-idem enam erinyaŋa mbufo ɔwɔrɔ usuŋ; 13koro edi Abasi esine mbufo ke idem anam mbufo enyime enyuŋ enam, man eti uduak Esie ediwɔrɔ. 14Ke erinam kpukpru ŋkpɔ etre nsuk-uyo ye eneni; 15man mbufo ekunyene ubiom-ikpe, ekunyuŋ enyene ndudue, edi edi nditɔ Abasi eke enanade ndo ke ufɔt ŋkwakwaŋa ye idiɔk emana; emi mbufo ke eyayama ke otu mmɔ nte ntantafiɔŋ ke ererimbot, 16Emenere ikɔ uwem ewut owo, man ŋkpe-keme ndida mbufo nnam mbure ke usen Christ, nte, ŋkefeheke itɔk ikpikpu, ŋkonyuŋ nnamke utom ikpikpu. 17Edi edieke eŋwaŋade mi eduɔk ke enyɔŋ uwa eke mbuɔtidem mbufo adade ɔsɔk Abasi, ndat esit nnyuŋ ntiene kpukpru mbufo ndara; 18kpa ntre mbufo nde edat esit enyuŋ etiene mi edara.

19Edi mmodori enyin ke Ɔbɔŋ Jesus ndiwara ndɔŋ Timothy edi ke ɔtɔ mbufo, man mfiɔk mbaŋa mbufo, nnyuŋ nnyene nsɔŋ-esit. 20Koro nnyeneke owo eke ebietde enye, eke edikerede ŋkpɔ mbufo ke akpanikɔ. 21Koro kpukpru owo ke eyoyom ŋkpɔ idem mmɔ, idige ŋkpɔ Jesus Christ. 22Edi mbufo emefiɔk nte edomode enye ese ete, nte eyen asaŋade ye ete anam utom, ke enye ama asaŋa ye ami asuan gospel. 23Mmɔdo edi enye ke ndori enyin ndisio ndɔŋ edi ke ɔtɔ mbufo idem idahemi, ke mma mfɔfiɔk nte ŋkpɔ ediwɔrɔde ye ami.

24Edi mmonim ke Ɔbɔŋ nte ami ke idem mi nyewara ndi. 25Edi ŋkere nte ŋkposio Epaphroditus ndɔŋ ke ɔtɔ mbufo, emi edide eyen-ete mi ye nsaŋa utom mi ye nsaŋa mi ke ekɔŋ, onyuŋ edide isuŋ mbufo, onyuŋ anamde ŋkpɔ ɔnɔ mi ke unana mi. 26Koro mbufo kpukpru edɔŋde enye; enye okonyuŋ odu ke nnanenyin, koro mbufo ema ekop ete enye ɔdɔdɔŋɔ. 27Ke akpanikɔ enye ɔkɔdɔŋɔ ekpere ndikpa: edi Abasi atua enye mbɔm; inyuŋ ituaha enye ikpɔŋ mbɔm, edi atua mi mbɔm ŋko, mbak ndida mfuhɔ ŋkɔrɔ ye mfuhɔ. 28Ntem ke mmawara ndɔŋ enye ŋkan man mbufo edat esit ke ini etɔŋɔde ntak ekut enye, man mfuhɔ mi nde efere akan. 29Edara enye ndien ke Ɔbɔŋ ye ɔyɔhɔ idaresit, enyuŋ enɔ oruk owo emi ukpono; 30koro osuk esisit enye ndikpa ke erinam utom Christ, ikereke uwem esie, man enye anam se isuhɔde mbufo ndinam nnɔ mi ɔyɔhɔ.

Currently Selected:

ŊWED MBON PHILIPPI 2: ENA

Highlight

Copy