ŊWED MBON COLOSSAE 3

Ndidu Obufa Uwem Oto ke Christ

1EDIEKE ekanamde mbufo eset ye Christ ndien, eyom ŋkpɔ enyɔŋ, emi Christ odude do etie ke ubɔk nnasia Abasi. 2Esin esit ke ŋkpɔ enyɔŋ, ekusin ke ŋkpɔ isɔŋ. 3Koro mbufo ema ekpa ema, uwem mbufo onyuŋ odibe ye Christ ke Abasi. 4Ke adaŋemi Christ, emi edide uwem nnyin, edibiɔŋɔrede, adaŋoro ke mbufo ŋko eyebiɔŋɔre ye Enye ke ubɔŋ.

5Mmɔdo ewot mbak idem mbufo emi edude ke isɔŋ. Ekpɔŋ use, ye ndek-ndek ido, ye idiɔk udɔŋ, ye idiɔk itɔŋ, ye erisin esit ke ŋkpɔ owo, emi edide ukpono-ndem; 6mme ido emi eda iyaresit Abasi etiene nditɔ ntut-utɔŋ. 7Mbufo ŋko ekesaŋa ke ido oro ke eyo oko, ke ini mbufo edude uwem ke esit. 8Edi ke emi mbufo enyuŋ eduɔŋɔ kpukpru ido emi; esio iyaresit, ye ifuresit, ye udu, ye idiɔk ibaŋa, ye mbubiam ikɔ ke inua mbufo efep. 9Ekusu nsu enɔ kiet eken, koro mbufo ema ekesio akani owo ye utom esie eduɔk, 10ema enyuŋ esine obufa owo, emi ediɔŋde diɔŋ enam enye edi obufa, enyene mbiet Andibot enye, man enye ɔfiɔk ŋkpɔ; 11emi Greek mme Jew, mme ana mbobi me owo eke minaŋa mbobi, mme owo esit ikɔt, mme owo Scyntia, mme ofin mme eyen-isɔŋ miduhe ke enye, edi Christ edi kpukpru ŋkpɔ onyuŋ odu ke kpukpru ŋkpɔ.

12Nte mmɔ emi Abasi ekemekde, emi Abasi akanamde mmɔ esana onyuŋ amade, eda ndien esit mbɔm esine, ye mfɔn-ido, ye nsuk-idem, ye ifure-ifure ido, ye ime; 13eme ime ye kiet eken, enyuŋ efen kiet eken, edieke owo mbufo ekededi enyenede ikɔ ye owo; kpa nte Ɔbɔŋ ekefende mbufo, efen mmɔ eŋwen kpasuk ntre. 14Ndien ekɔrɔ ke kpukpru ŋkpɔ, esine ima, emi edide se ibɔpde uwem adiana inam ɔfɔn ama. 15Eyak emem Christ akara ke esit mbufo; ekekot mbufo eduk ke idem kiet, man enyene emem oro. 16Mbufo enyuŋ enyene esit ekɔm. Eyak ikɔ Christ odu ɔyɔhɔ-ɔyɔhɔ ke esit mbufo ke kpukpru eti ibuot; emen psalm ye hymn ye ikwɔ uwem spirit ekpep enyuŋ eteme kiet eken, ekwɔ itoro enɔ Abasi ye esit ekɔm. 17Sededi mbufo enyuŋ enamde ke ikɔ ye utom enam kpukpru ke enyiŋ Ɔbɔŋ Jesus, enɔ Ete ekɔm oto ke Enye.

18Iban, esuk idem enɔ mme ebe mbufo, nte odotde ke Ɔbɔŋ.

19Mme ebe, ema iban mbufo, ekunyuŋ esɔŋ ido ye mmɔ.

20Nditɔ esuk ibuot enɔ mme ete mbufo ye mme eka mbufo ke kpukpru ŋkpɔ, koro emi enemde Ɔbɔŋ esit.

21Mme ete, ekufiomo nditɔ mbufo, mbak esit ediduɔ mmɔ.

22Ifin, esuk ibuot enɔ mme ete-ufɔk mbufo ke obukidem ke kpukpru ŋkpɔ; ekunam utom enyin owo, nte mbon mbukpek, edi enam ye esit kiet ke uteŋe Ɔbɔŋ. 23Sededi eke mbufo enamde, enam ke ofuri esit, nte ŋkpɔ eke enamde enɔ Ɔbɔŋ, minamke inɔ owo; 24sia mbufo efiɔkde ete iyebɔ Ɔbɔŋ udeme nte utip mbufo. Mbufo enam utom enɔ Christ Ɔbɔŋ. 25Koro owo eke anamde se idiɔkde eyebɔ utip idiɔk ŋkpɔ oro enye akanamde; Abasi iteŋeke owo enyin.

Currently Selected:

ŊWED MBON COLOSSAE 3: ENA

Highlight

Copy