ŊWED MBON COLOSSAE 2

Ndikpa Edi Ododu Uwem ye Christ

1KORO nyom mbufo efiɔk ɔkpɔsɔŋ eŋwan eke ŋwanade mbaŋa mbufo, ye mmɔ emi edude ke Laodicea, ye kpukpru owo emi mikekwe iso mi ke enyin: 2man mmɔ ekpekam ekop nsɔŋ-esit, enyuŋ ekpep se ima edide. Mmɔ ekpekam esim ofuri uwak mbuɔtidem emi otode ke eritim mfiɔk ŋkpɔ. Mmɔ ekpekam ebure efiɔk ndibe-ŋkpɔ Abasi, oro edi Christ; 3emi ofuri inyene ɔniɔŋ ye ifiɔk edibede enye ke idem. 4Mmɔdɔhɔ emi mbak owo baba kiet edida nnem-inua abiaŋa mbufo. 5Koro okposuk edi nte mmenduhe ye mbufo ke obukidem, ami do ye mbufo ke spirit, nnyuŋ ndadara ndikut nte mbufo etimde edu uwem, mbuɔtidem mbufo onyuŋ ɔsɔŋɔde ada ke Christ.

6Nte mbufo ema ekɔbɔ Christ Jesus Ɔbɔŋ ndien, esasaŋa ke Enye; 7yak mbufo emum ŋkam, enyuŋ ekɔri edaha eda ke Enye, enyuŋ edɔdiɔŋ esɔŋɔ eda ke mbuɔtidem, kpa nte ekekpepde mbufo, enyuŋ enɔ Abasi ekɔm eti-eti.

8Ekpeme mbak owo ekededi edidu, eke adade ifiɔk owo ye ikpikpu abiaŋa eke esaŋade ye se owo ekpepde obume mbufo; nte asaŋade ekekem ye mme enyene odudu eke ekarade ererimbot, minyuŋ isaŋake ikekem ye Christ. 9Koro ofuri Uyɔhɔ Abasi ke ododuŋ Enye ke idem; mbufo enyuŋ enyene uyɔhɔ mbufo ke Enye; 10Enye onyuŋ edi Ibuot ɔnɔ kpukpru mme andikara ye mme enyene-odudu. 11Ke Enye ke ekenyuŋ enim mbufo mbobi eke midaha ubɔk owo inim, kpa mbobi eke edide erisio idiɔk udɔŋ obukidem mfep, kpa mbobi eke Christ onimde; 12mbufo ema ebuhɔ ye Enye ke baptism; ke enyuŋ eda baptism enam mbufo eset ye Enye, oto koro mbufo ebuɔtde idem ke odudu Abasi, emi akanamde Enye eset ke mkpa. 13Mbufo emi ekekpaŋade ke eribiat ibet, ye ke eritre ndina mbobi ke obukidem, kpa mbufo ke Abasi okonyuŋ anam edu uwem ye Enye: Enye emefen kpukpru eribiat ibet eke nnyin ikabiatde; 14Enye ɔmɔsɔhi ŋwed isɔn, emi esinede ke mme ewuhɔ ibet obiom nnyin ikpe; ɔkpɔnɔre enye efep, ɔkɔŋ enye adian ke cross Esie. 15Enye ama adianare mme andikara ye mme enyene-odudu ke Idem Esie efep onim nsan-nsan, ayarare mmɔ aŋwa-aŋwa, ada mmɔ nte mbuot-ekɔŋ ke cross Esie.

16Mmɔdo ekuyak baba owo kiet ekpe ikpe ɔnɔ mbufo ke se mbufo ediade, ye ke se mbufo eŋwɔŋde, ye ke ido eke mbufo enimde usɔrɔ ye obufa ɔfiɔŋ ye sabbath. 17Mme ŋkpɔ oro edi ukpɔŋ ŋkpɔ eke edidide; edi idem ŋkpɔ esaŋa ye Christ. 18Ekuyak baba owo kiet obiom mbufo ikpe nte enye amama, ke ikɔ nsuhɔre-idem, ye erituak ibuot nnɔ mme angel; oruk owo emi ebure mbure ke ŋkukut, enyuŋ ekohore idem ke ikpikpu ekikere obukidem; 19edi mmɔ isɔŋɔke iyire ye Ibuot, emi adade ikek ye osip ɔbɔk ofuri idem, omum enye akama adiana, anam enye ɔkɔri ŋkɔri uwem Abasi.

20Edieke mbufo ema ekakpa ye Christ, enyuŋ edianare ekpɔŋ mme enyene-odudu eke ekarade ererimbot, nsinam mbufo, nte mbufo edide mbon ererimbot kaŋa, esuk ibuot enyime ndinam mme item eke ekpepde, ete, 21Kumum, Kutabi, Kutuk, nte mme owo etemede enyuŋ ekpepde 22(koro oruk ŋkpɔ emi etahade, ke adaŋemi owo adade mmɔ anam ŋkpɔ)? 23Mme owo ebat oruk mme item oro ke ɔniɔŋ, sia mmɔ esaŋade ye erituak ibuot eke owo ke idemesie aduakde ndinam, ye nsuhɔre-idem ye ɔkpɔsɔŋ ntuk-idem; edi mmɔ inyeneke udori baba esisit; mmɔ ededek obukidem.

Currently Selected:

ŊWED MBON COLOSSAE 2: ENA

Highlight

Copy