ŊWED MBON COLOSSAE 1

Akam Ekɔm ye Ndibeŋe Abasi Spirit Ifiɔk

1PAUL, emi edide apostle Christ Jesus oto ke uduak Abasi, ye Timothy eyen-ete nnyin, 2ewet enɔ esɔk ikɔt Abasi ye nditɔ-ete ke Christ emi enamde akpanikɔ, emi edude ke Colossae: mfɔn ye emem akpakam oto ke Abasi Ete mnnyin etiene mbufo.

3Imɔkɔm Abasi Ete Ɔbɔŋ nnyin Jesus Christ kpukpru ini ke akam emi nnyin ibɔŋde ibaŋa mbufo; 4koro ima ikokop ibaŋa mbuɔtidem emi mbufo enyenede ke Christ Jesus, ye ima emi mbufo emade kpukpru ikɔt Abasi, 5emi otode ke idori-enyin emi ekenimde enɔ mbufo ke heaven, emi mbufo ekebemde iso ekop ebaŋa ke ikɔ akpanikɔ gospel emi okosimde mbufo; 6emi oŋwumde mfri onyuŋɔdiɔŋde diɔŋ ɔkɔri ke ofuri ererimbot, onyuŋ anamde ntre ke otu mbufo ŋko, toto ke usen emi mbufo ekekopde enyuŋ efiɔkde mfɔn Abasi ke akpanikɔ; 7Nte mbufo ekekopde ke inua Epaphras, emi edide edima nsaŋa-utom nnyin, onyuŋ edide anam-utom Christ ɔnɔ mbufo emi anamde akpanikɔ; 8edi enye okonyuŋ asian nnyin ima emi mbufo enyenede ke Spirit.

9Ke ntak emi, toto ke usen emi ikokopde ŋkpɔ emi, nnyin ŋko idopke ndibɔŋ akam mbaŋa mbufo, ndinyuŋ nnam mkpe-ubɔk ite, Abasi akpakam anam mbufo eyɔhɔ ye ifiɔk uduak Esie ke kpukpru eti ibuot ye ikike ke ŋkpɔ Spirit; 10man mbufo esaŋa ke ido nte odotde Ɔbɔŋ, enem Enye esit ke kpukpru usuŋ, enyuŋ eŋwum mfri ke erinam kpukpru nti utom, enyuŋ ekɔri ke ifiɔk Abasi: 11Abasi akpakam onyuŋ ada kpukpru odudu Esie ɔsɔŋɔ mbufo idem, nte asaŋade ekekem ye ukeme ubɔŋ Esie, man mbufo ekeme ndibiom kpukpru ŋkpɔ nnyuŋ mme anyan ime ye idaresit; 12mbufo ekpekam ekɔm Ete, emi akanamde nnyin idot ndibuana ke udeme nti owo ke uŋwana: 13emi okosiode nnyin ke odudu ekim, esin ke Obio Ubɔŋ Eyen Ima Esie: 14emi nnyin inyenede ubɔhɔ-ufin ke Enye, kpa erifen mme idiɔk-ŋkpɔ nnyin.

15Enye edi mbiet Abasi emi enyin owo mikwe; Abasi okobon Enye ete edi Akpan, ndien edibot ofuri ererimbot. 16Koro ke Enye ke ekebot kpukpru ŋkpɔ ke enyɔŋ ye ke isɔŋ, se enyin owo okutde ye se enyin owo mikwe, mme mmɔ edide ndidem, mme edide mbɔŋ, mme edide mme andikara, mme edide mme ada-idaha; ekebot kpukpru ŋkpɔ oto ke Enye, enyuŋ ebot kpukpru ŋkpɔ enɔ Enye. 17Ndien Enye ebem kpukpru ŋkpɔ iso odu, kpukpru ŋkpɔ enyuŋ ekpaha ediana ke Enye. 18Enye onyuŋ edi Ibuot ɔnɔ idem, emi edide ufɔk Abasi: sia Enye edide akpa, emi ekebemde iso amana ke otu mme akpa-mkpa: man Enye ekpedi ebe-iso ke kpukpru ŋkpɔ. 19Koro ofuri uyɔhɔ Abasi onyime ndiduŋ enye ke idem, 20nnyuŋ nnam kpukpru ŋkpɔ ekabare etie ke emem ye Abasi oto ke Enye (akada iyip cross Esie esin emem) nkɔm oto ke Enye, ye mmɔ edide ŋkpɔ eke edude ke isɔŋ, ye edide ŋkpɔ eke edude ke enyɔŋ.

21Ndien mbufo ke idem mbufo ema edianare ye Abasi ke ini oko, enyuŋ edi mme asua Esie ke esit mbufo ke erinam idiɔk-ŋkpɔ; 22edi ke emi Jesus akada mkpa Esie anam mbufo etie ke emem ye Abasi ke obukidem Esie, man Enye anam mbufo edi ndisana owo emi enanade ndo, emi owo minyuŋ ikemeke nditiŋ ŋkpɔ ndian, ada onim ke iso Esie: 23Edieke mbufo eyirede ke mbuɔtidem enyene iwuk enyuŋ esɔŋɔ eda, mindinyuŋ iyakke ŋkpɔ anam mbufo edianare ekpɔŋ idori-enyin gospel emi mbufo ekekopde; kpa gospel emi ekɔkwɔrɔde enɔ kpukpru owo ke idak ikpa-enyɔŋ: emi ekonyuŋ enɔde mi Paul ete ŋkwɔrɔ.

24Ke emi mmedat esit ke ndutuhɔ eke ŋkutde kabaŋa mbufo, nnyuŋ nnam se isuhɔde ke ukut Christ ɔyɔhɔ ke obukidem mi, man ɔfɔn ye idem Esie, oro edi ufɔk Abasi: 25emi ami mmaŋkabare ndi anam-utom ke enye, nte asaŋade ekekem ye itie akama-ukpɔhɔre emi Abasi ɔkɔnɔde mi, ete nda nse ŋkpɔ mbaŋa mbufo, nnyuŋ ŋkwɔrɔ ikɔ Abasi ɔyɔhɔ-ɔyɔhɔ; 26kpa ndibe-ŋkpɔ eke okodibede toto ke eritɔŋɔ eyo ye emana; edi ke emi Abasi ama ayarare enye ɔnɔ nti ikɔt Esie, 27Emi Enye onyimede ndisian mmɔ uwak ubɔŋ eke odude ke ndibe-ŋkpɔ emi ke otu mme Gentile, ete, Christ ke odudu ke esit mbufo nte idori-enyin ubɔŋ; 28Emi nnyin ikwɔrɔde, ida kpukpru eti ibuot iteme inyuŋ ikpep kpupru owo, man nnyin ida kpukpru owo inim ke iso Abasi nte efɔnde ema ke Christ. 29Mmonyuŋ ŋkpa utom mbaŋa ŋkpɔ emi, nda odudu Abasi, emi ɔsɔŋɔde anam utom ke idem mi, ŋwaŋwana ndinam.

Currently Selected:

ŊWED MBON COLOSSAE 1: ENA

Highlight

Copy