Marku 2

Yesu yawuka mukwa kalepa

(Tala nawa Mat 9:1-8; Luk 5:17-26)

1Kulutwe lia matangwa amwe, muze Yesu hanjila nawa mu Kafarnaume, atu yeevwa ngwo: “Mu zuwo ali.” 2Anji yaakunguluka, chocho kukwabwile nawa muhela, chibwe ku chikolo. Shimbu te Yesu machilongesa sango jenyi, 3amwe atu yeeza ni kumunehena mukwa kalepa. Atu awana te anamumbata. 4Alioze kahashile kukundama kuli Yesu mumu ha kwoka cha mbunga. Kashika afukwile fulumba talanganyi ni haze abwile Yesu. Mu chitutulu chize alokwele, yaasunwishina mo mukwa kalepa wakubombesa ha muhela wenyi. 5Muze hamona ufulielo wo, Yesu yambila mukwa kalepa ngwenyi: “Mwanami, milonga ye hiyakonekenewa.”

6Alioze amwe alongeshi a Shimbi te anatwama ko. Yaanyonga ngwo: 7“Kuchi mutu yono anahanjika chocho? Kanasaula Zambi! Iya mahasa kukonekena milonga? Zambi wika machihasa.” 8Hazehene Yesu yanyingika chize anyongene, yaahula ngwenyi: “Kuchi kevwe nuli ni manyonga wano? 9Chashi chika, shina kwambila mukwa kalepa ngwami: ‘Milonga ye hiyakonekenewa,’ hanji kwamba ngwami: ‘Katuka, anda muhela we, wende’? 10Alioze ngunazange nunyingike ngwenu, Mwana Mutu#2:10 mwana mutu: jina lilemu, lia Yesu wika mu Usendo Waha. chiyulo akwete hano hashi cha kukonekena milonga.” Mba yambila mukwa kalepa ngwenyi: 11“Ngunakwambe ngwami: Katuka, anda muhela we, yako kwe ku mahie!”

12Atu eswe yaamutala. Mutu yoze yakatuka, yanda muhela wenyi nikawashi, yatuhuka ku meso ja atu eswe. Ayo eswe yaalishimwoka kuhiana, yaalemesa Zambi ngwo: “Kanda tuchimona kama nilimwe tangwa!”

Yesu yatambika Levi

(Tala nawa Mat 9:9-13; Luk 5:27-32)

13Yesu yahiluka ku mbumbulu ya chitende cha Galilea#2:13 CHITENDE cha GALILEA, tala 1:16.. Mbunga yeezaza kuli iye. Neye yaalongesa. 14Muze te anendangana yamona Levi,#2:14 LEVI: jina likwo Mateu. Tala Mat 9:9. mwana wa Alfeu, te kanatwama mu zuwo lia kulambwishila lijimu. Yesu yamwamba ngwenyi: “Ngukaule.” Levi yakatuka, yamukaula.

15Mabwamuze Yesu yalia mu zuwo lia Levi. Akwa kulambwisa lijimu ni akwa lufuma mubi anji atwamine ku mesa hamwe ni Yesu ni tumbaji twenyi, mumu anji ngwe wano yaabutuka kumukaula. 16Alongeshi a Shimbi a ku mbunga ya Afariseu#2:16 afariseu: Yimwe mbunga ya Ayuda waze asele tachi kufunga Shimbi ja Mose ni Shimbi jikwo jize Ayuda te haanawezela ku Shimbi jize. yaamumona ni kulia hamwe ni akwa kulambwisa lijimu ni akwa lufuma mubi. Mba yaahula tumbaji twenyi ngwo: “Kuchi kevwe anali hamwe ni akwa kulambwisa lijimu ni akwa lufuma mubi?” 17Muze Yesu hachivwa yaamba ngwenyi: “Ali ni tachi keeshi kufupa mbuki, alioze shina waze akuyiza e akumufupa. Chejile mu kutambika akwa ululi, alioze akwa lufuma mubi.”

Chihula hakutwala ku kulitwamina kulia

(Tala nawa Mat 9:14-17; Luk 5:33-39)

18Limwe tangwa tumbaji twa Yoano ni twa Afariseu yaalitwamina kulia mu kuwayila Zambi. Hohene atu yeeza ni kuhula Yesu ngwo: “Tumbaji twa Yoano ni twa Afariseu kaakulitwamina kulia mu kuwayila Zambi, alioze kuchi kevwe tumbaji twe keeshi kuchilinga?” 19Yesu ngwenyi: “Masepa ja sandungi maahasa kulitwamina kulia shimbu sandungi uchili hamwe no, nyi? Ka! Shimbu lize lieswe sandungi uchili mukachi ko kaahashile kulitwamina kulia. 20Alioze tangwa mulikeza muze maakachiza sandungi, mba maakalitwamina kulia.

21“Mutu niumwe manuka hina likulu ni chando chaha, mumu nyi machilinga chando chaha muchitanuna hina likulu, ni chituwa muchibwa chinene, kuhiana chitangu. 22Niumwe malonga vinyu yaha mu tuku jikulu ja malambu kuchina vinyu yaha muyimengununa, tuku jikulu nejo mujifwa, ni vinyu muyimwangana.”

Chihula hakutwala ku tangwa lia kuhwima

(Tala nawa Mat 12:1-8; Luk 6:1-5)

23Ha limwe tangwa lia kuhwima, Yesu yabalika mu minda ya tiriku. Tumbaji yaabutuka kumakuna tiriku ku sesa lia jila. 24Kashika Afariseu yaamuhula ngwo: “Tala, kuchi kevwe analingi ha tangwa lia kuhwima chize kuchalitele ni Shimbi jetu.” 25Yesu ngwenyi: “Kunwatangile nilimwe tangwa chize alingile mwanangana David, iye mwene ni atu jenyi, muze evwile zala ni haahona yakulia, nyi? 26Muze Abiatare wabwile mwata wa mahako, David yanjila mu zuwo lia Zambi, yalia mbolo ja kutumbieka ku meso ja Zambi. Te kuchalitele ni Shimbi jetu kulia mbolo jize shina mahako a lutwe wika. Alioze David yajanda, yajaha nawa atu jenyi.” 27Yesu yaamba nawa ngwenyi: “Tangwa lia kuhwima liatangiwile mumu ha yiwape ya mutu; hi mutu ko watangiwile mumu ha tangwa lia kuhwima. 28Kashika, yami Mwana Mutu, nguli nawa Mwene wa tangwa lia kuhwima.”

Currently Selected:

Marku 2: CHK1970

Highlight

Copy