Marku 1

Yoano Chipapachisa yambujola

(Tala nawa Mat 3:1-12; Luk 3:1-18; Yoa 1:19-28)

1Uno we Ubutukilo wa Sango Jibema jize jinahanjikila Yesu Kristu, Mwana Zambi. 2Ngwe chize hichinasonewa mu mukanda wa mukwa munanyi wa Zambi, Izaya, ngwo:

“ ‘Achivwenu! Ngunatumu kanganda kami kulutwe lie

akakululikile jila.’ Chenacho anambe Zambi.

3Mutambi wa mutu yoze wakukololoka mu puya ngwenyi:

‘Lulikenu jila ya Mwene,

Lulamisenu yikoka yenyi.’ ”

4Chenacho Yoano Chipapachisa asolokele mu puya,#1:4 puya: Ku chitokelo cha lwiji Yordau ku norde ya chitende cha Kufwa. yambujola ngwenyi: “Alumukenu ku mbunge, anupapachise, mba Zambi manukonekena milonga yenu.” 5Chifuchi cheswe cha Yudea ni atu eswe a mu limbo lia Yerusaleme te kaakwiza kuli Yoano nikushikisa milonga yo. Neye kakwapapachisa mu lwiji Yordau.

6Yoano te kakuzala hina lia kulinga ni mona ja kashitu munene, kamelu, ni muya wa kubu mu zalilo yenyi. Te kakulia makumbi ni wuchi wa mu yambu. 7Yambujola ngwenyi: “Mutu meza kunyima liami; kananguhiana yami. Chatelele nichimwe kuhetama ni kujitula sapato jenyi. 8Yami hinanupapachisa ni meya, alioze iye makanupapachisa ni Mwiku wa Linanga.”

Yoano yapapachisa Yesu

(Tala nawa Mat 3:13-17; Luk 3:21-22)

9Ha matangwa waze, Yesu yakatuka ku limbo lia Nazare#1:9 Nazare: limwe limbo kilometro 26 ku chitokelo cha songo lia ku sude ya chitende cha Galilea. mu chifuchi cha Galilea,#1:9 GALILEA: ku norde mu Israele, haze Herode Antipase, mwana wa Herode Munene, ayulile. yeza kuli Yoano. Neye yamupapachisa mu Yordau. 10Shimbu lize te Yesu anatutuka mu meya, yamona lilu linazuluka ni tachi. Mwiku wa Linanga yiumuhulumukina ngwe liembe. 11No yeevwa liji mwilu ngwo: “Yena mwe Mwanami, nakukuzanga kuhiana, nakuwahilila ne.”

Sakwonga yeseka Yesu hanga amuvulumwise

(Tala nawa Mat 4:1-11; Luk 4:1-13)

12Hohene Mwiku wa Linanga yiumushinijika mu puya. 13Neye yabwa mu puya matangwa makumi awana. Sakwonga yamweseka. Yesu yabwa hamwe ni tushitu a mu yambu. Tunganda a mwilu yaamulingila.

Yesu yatambika akwa kutela yishi

(Tala nawa Mat 4:12-22; Luk 4:14-15; 5:1-11)

14Muze haasa Yoano mu zuwo lia lamba, Yesu yaya ku chifuchi cha Galilea nikwambujola Sango Jibema ja Zambi. 15Ngwenyi: “Tangwa hiliaheta. Wanangana wa Zambi hiwakundama! Alumukenu ku mbunge! Fulielenu je Sango Jibema!”

16Muze te Yesu anende ku mbumbulu ya chitende cha Galilea,#1:16 chitende cha Galilea: kusuhwa chacho kilometro 21, unene wacho kilometro 13. Chili ni meya abema. yamona Simone ni mwanakwo Andre. Kaanate Wanda mu meya mumu te akwa kutela yishi. 17Yesu yaamba ngwenyi: “Ngukaulenu yami, mba mungukanupwisa akwa kutela atu.” 18Hazehene yaahichika manda jo, yaamukaula. 19Muze hasenya kulutwe, yamona Tiangu (Jake) ni mwanakwo Yoano, ana ja Zebedeu, te manda jo analulieka. 20Hazehene yaatambika. No yaahichika tato Zebedeu ni ngamba mu wato, yaakaula Yesu.

Yesu yatuhwisa mwiku wa luchisa

(Tala nawa Luk 4:31-37)

21Yesu ni tumbaji twenyi yaaya ku limbo lia Kafarnaume.#1:21 Kafarnaume: ku mbumbulu ya chitende cha Galilea, ku norde ku chitokelo. Ha tangwa lia kuhwima, Yesu yanjila mu zuwo lia kuwayila lia Ayuda, yabutuka kulongesa. 22Atu waze amuvwile, yaalishimwoka kuhiana ha longeso lienyi.

Mumu kabwile ko ngwe alongeshi a Shimbi, alioze Yesu te kakulongesa ni chiyulo.

23Susumuku mutu wa mwiku wa luchisa yasoloka mu zuwo lia kuwayila. Yakololoka ngwenyi: 24“Kuchi yetu ni yena, Yesu Kanazare? Hiweza mu kutwonona, nyi? Ngunakunyingika kanawa, mwe Munangi yoze atumine Zambi.” 25Yesu yakalukila mwiku wa luchisa ngwenyi: “Hola! Tuhuka muli mutu yono!” 26Mwiku wa luchisa yiukololoka chikolo, mba yiumutuhuka. 27Atu yaalishimwoka kuhiana! Yaalihula ngwo: “Chino chika? Longeso liaha, Mumu chiyulo akwete. Chibwe mwiku wa luchisa muumwononokena!” 28Lufuma wa Yesu yafumana nikawashi mu chifuchi cheswe cha Galilea.#1:28 Galilea: tala 1:9.

Yesu yawuka mieji anji

(Tala nawa Mat 8:14-17; Luk 4:38-41)

29Yaatuhuka mu zuwo lia kuwayila. Hazehene yaanjila mu zuwo lia Simone ni Andre. Tiangu (Jake) ni Yoano yaaya no. 30Naye weno ya Simone te kanabombo ha muhela, kanayiji kachiki. Hazehene yaamwambulwila yo. 31Yesu yamukundama yamukwata ku kwoko, yamukatwisa. Kachiki yamuhwa. Neye yaalingila yakulia.

32Chingoloshi, muze tangwa hilianjila kulu, atu yaamunehena mieji eswe ni akwa mwiku wa luchisa. 33Limbo lieswe yaakunguluka ku chikolo cha zuwo. 34Yesu yawuka atu anji waze abwile ni misongo yeka ni yeka. Yatuhwisa mwiku wa luchisa unji. Katayijile mwiku wa luchisa kuhanjika, mumu wamunyingikine.

Yesu yalemba, yaya ni kwambujola

(Tala nawa Luk 4:42-44)

35Chichamene cheswe, shimbu kuchili milima, Yesu yahinduka, yatuhuka, yaya ha ukawenyi, yalembela ko. 36Simone ni waze abwile nenyi yaaya akamufupe. 37Muze haamuwana, yaamwamba ngwo: “Eswe kaanakufupu.” 38Alioze Yesu ngwenyi: “Tuyenu kweka ku membo akusulangana, hanga ngukambujole ko nawa, mumu ha chikuma chino nejilile.” 39Mba yaya ku chifuchi cheswe cha Galilea, yambujola mu mazuwo jo a kuwayila, yatuhwisa mwiku wa luchisa.

Yesu yabemesa mukwa mbumba

(Tala nawa Mat 8:1-4; Luk 5:12-16)

40Mukwa mbumba yeza kuli Yesu, yaliumba ha makungunwa ku meso jenyi ngwenyi: “Nyi unazange, muuhasa kama kungubemesa.” 41Yesu yamuvwila keke, yolola kwoko lienyi, ngwenyi: “Ngunazange, bwako mubema!” 42Hazehene misongo yiimuhwa, neye yabema. 43Yesu yamukatwisa hanga aye, yamwaha koki chikolo ngwenyi: 44“Unevu? Kanda ukambulwila niumwe, alioze yako ukalilweze kuli hako wa Zambi. Mba lambula mulambu uze ambile Mose ha kulweza eswe ngwe, hiwabema.” 45Alioze mutu yoze yatuhuka, yachinyingikisa kweswe ni kuchifumanyisa. Kashika Yesu kahashile ko kusoloka nawa ku meso ja atu mu membo alioze yabwa ha ukawenyi. Atu a ku sali ni sali yeezaza kuli iye.

Currently Selected:

Marku 1: CHK1970

Highlight

Copy