Marku 3

Mukwa kwoko liasosewa

(Tala nawa Mat 12:9-14; Luk 6:6-11)

1Yesu yanjila nawa mu zuwo lia kuwayila lia Ayuda. Yimubwa umwe mukwa kwoko liasosewa. 2Amwe atu yaalayila Yesu nyi mawuka mweji yoze ha tangwa lia kuhwima, hanga akamusume mulonga. 3Yesu yambila mukwa kwoko liasosewa ngwenyi: “Katuka, umane mukachi ka atu eswe.” 4Mba yahula waze amutalile ngwenyi: “Shimbi jetu kuchi jinatayiza kulinga ha tangwa lia kuhwima; kulinga yibema hanji kulinga yibi? Kulamwina mutu hanji kumwonona?” Alioze yaahola kuluu. 5Yesu yaatala eswe ni utenu, yevwa chinyengo kuhiana mumu ha kukala cha mbunge jo, yambila mwe mutu ngwenyi: “Olola kwoko lie.” Neye yaliolola mba yilibwa lingunu. 6Afariseu#3:6 AFARISEU: tala 2:16. yaatuhuka mu zuwo lia kuwayila nikulikungulula hazehene ni Aherode,#3:6 aherode: mbunga ya Ayuda waze azangile vungu lia Herode Munene ha kwayula, hi Karoma ko. yaamutwama punga hamuwika hanga amone chize maahasa kumushihisa.

Mbunga yeeza kuli Yesu

7Hohene Yesu yaya ku chitende hamwe ni tumbaji twenyi. Mbunga yinene yaamukaula. Haanakatuka ku chifuchi cha Galilea#3:7 Galilea: tala 1:9. ni cha Yudea, 8ni ku limbo lia Yerusaleme, ni ku chifuchi cha Idumea,#3:8 IDUMEA: chifuchi cha ku sude mu Israele. ni muze musali lia Yordau, ni ku chifuchi chize chasulangana ni membo ja Tiru ni Sidone.#3:8 Tiru ni Sidone: membo ja mavungu waze hi Ayuda ko ku mbumbulu ya kalunga lwiji Mediterane, ku norde ya chitende cha Galilea. Mbunga yino yinene yeeza kuli Yesu mumu te heevwa yuma yize alingile. 9Yesu yambila tumbaji twenyi ngwenyi: “Nguselenu wato, ngumane mo,” hanga mbunga keechi kumushinjeka. 10Yesu yamba chino, mumu wawukile atu anji, ni mieji yaamuzukukila. 11Tangwa lieswe muze miku ya luchisa te yakumumona, yakufulamana ku meso jenyi ni kukololoka ngwo: “Mwana Zambi yena!” 12Alioze Yesu yawaha koki chikolo ngwenyi: “Kanda ungusolola.”

Yesu yatongola tunganda kumi ni aali

(Tala nawa Mat 10:1-4; Luk 6:12-16)

13Yesu yakanduka ha mulundu, yatambika waze iye mwene apalile. No yeeza kuli iye. 14Neye yatongola kumi ni aali, yaaluka ngwenyi: “Tunganda.” Yaatongola, hanga akabwe nenyi, hanga akaatume ni kwambujola Sango Jibema, 15ni kwaha chiyulo cha kutuhwisa nacho mwiku wa luchisa. 16Kumi ni aali waze atongwele majina jo wano: Simone (yoze Yesu alukile jina likwo ngwenyi, Petulu), 17ni Tiangu (Jake), ni Yoano, ana a Zebedeu a malunga (Yesu yaaluka jina likwo Boanerjese, kulumbunuka ngwo, atu waze alifwa ni kukulunguza cha vula), 18ni Andre, ni Filipe, ni Bartolomeu, ni Mateu, ni Tomase, ni Tiangu (Jake) mwana wa Alfeu, ni Tadeu, ni Simone (mukwa kuzanga utuswilo wa chifuchi), 19ni Yudase Kakeriote (yoze wakunjikile Yesu kuli akwa kole jenyi).

Yesu ni Belzebu

(Tala nawa Mat 12:22-32; Luk 11:14-23; 12:10)

20Yesu yahiluka mu zuwo. Mba mbunga yaakundama nawa. Ha chino, Yesu ni tumbaji twenyi kaahashile chibwe kulia. 21Muze usoko wenyi haachivwa, yeeza akamukwate, mumu ambile ngwo: “Kanazaluka!”

22Alongeshi a Shimbi yaakatuka ku Yerusaleme, yeeza kwe kuze, yaamba ngwo: “Belzebu#3:22 BELZEBU: jina likwo lia Sakwonga, mwe mukwa lutwe wa miku ya luchisa. akwete!” Nawa ngwo:

“Mwata wa mwiku wa luchisa mwe unamwehe ndundo ja kutuhwisa najo mwiku uze.” 23Yesu yaatambika, yaatela yishima ngwenyi: “Ngwe kuchi Sakwonga mahasa kulituhwisa iye mwene? 24Nyi akwa wanangana maalihandununa ni kulitachika ene, wanangana uze muukabwa wahululu. 25Nyi akwa limwe jiko maalihandununa ene, jiko lize mulikafwa. 26Chenacho nawa, nyi Sakwonga malihandununa ni kulitachika iye mwene, wanangana wenyi kuuchi kalinduluka.

27“Mutu niumwe mahasa kunjila mu zuwo lia chitakame ni kwiya yuma yenyi, nyi hatangu kanda achimukasa. Muze hamukasa, mba mahasa kwiya yuma yeswe mu zuwo lienyi.

28“Chamwenemwene ngunanwambulwila ngwami, Zambi makonekena atu milonga yo yeswe ni kushililika cho cheswe. 29Alioze yoze mashililika Mwiku wa Linanga, Zambi kechi kwiza kumukonekena ndoo ku miaka yeswe.” 30Yesu yachamba mumu ayo ambile ngwo: “Mwiku wa luchisa akwete.”

Naye ni anakwo ja Yesu

(Tala nawa Mat 12:46-50; Luk 8:19-21)

31Naye ni anakwo ja Yesu yaaheta, yaamana haze, yaatuma liji ni kumutambika. 32Mbunga yaatwama nikumujingilika. Atu yaamwamba: “Ngwowe, noko ni anakwenu haze ali; kaanakufupu.” 33Yesu ngwenyi: “Mwe mama iya? Ni anakwetu aya?” 34Yatala sali ni sali hali waze amujingilikile. Mba yamba ngwenyi: “Talenu, mama ni anakwetu, enaa. 35Mumu yoze wakulinga upale wa Zambi, mwenawo mwe mwanakwetu, ni ndumbwami, ni mama.”

Currently Selected:

Marku 3: CHK1970

Highlight

Copy