Marku 4

Chishima cha chikuwa

(Tala nawa Mat 13:1-9; Luk 8:4-8)

1Yesu yabutuka nawa kulongesa ku mbumbulu ya chitende cha Galilea#4:1 CHITENDE CHA GALILEA: tala 1:16 Mbunga yinene yaamukunguluka. Kashika yanjila mu wato, yatwa ma mo. Wato te mu meya uli, ye mbunga yaamana ku mbumbulu. 2Neye yaalongesa yuma yinji ni yishima. Mu longeso lienyi yaamba ngwenyi: 3“Achivwenu! Umwe mutu watuhukile mu kukuwa. 4Muze te anakuwu mbuto, yimwe yiiholokela ku sesa lia jila. Tujila yeeza, yaayilia. 5Yikwo yiiholokela homa ha mawe haze kuhabwile ko mavu anji. Mbuto yiisoka nikawashi, mumu te kuheshi ndama ya mavu. 6Alioze muze tangwa hiliasasaminya, yibuta yilekama, yiyuma chau, mumu te kuyishi miji. 7Mbuto yikwo yiiholokela mukachi ka mingonga. Ye mingonga yiitatuka, yiikeketesa yibuta, kuyemine ko mihuko. 8Alioze mbuto yikwo yiiholokela ha mavu abema, yiisoka, yiitatuka, yiiyima mihuko: yimwe makumi atatu, yikwo makumi asambano, yikwo kulakaji.” 9Yesu yaweza ho ngwenyi: “Banjikenu kanawa, nyi nuli ni matwi!”

Chikuma chize Yesu atelele yishima

(Tala nawa Mat 13:10-17; Luk 8:9-10)

10Muze Yesu kabwile ko nawa ni mbunga yinene, amwe atu waze amujingilikile, hamwe ni tumbaji kumi ni aali yaamuhula ulumbunwiso wa yishima yize. 11Neye yaakumbulula ngwenyi: “Yenu hananwehe cho kunyingika chijimbikilo cha wanangana wa Zambi. Alioze akwo, waze ali haze, kaakwivwa maliji eswe ni yishima, 12hanga ngwo:

‘Maakatala kutala, hindu keechi kumona;

maakatala kubanjika, hindu keechi kunyingika;

Kuchina maahiluka kuli Zambi akaakonekene.’ ”

Yesu yalumbununa chishima cha chikuwa

(Tala nawa Mat 13:18-23; Luk 8:11-15)

13Yesu yaahula ngwenyi: “Chishima chino kuchanulumbunukinyine, nyi? Mba ngwe kuchi yishima yeswe yikwo muyinulumbunukina? 14Chikuwa kakukuwa liji lia Zambi. 15Atu akwo kaalifwa ngwe sesa lia jila, kuze kwakuholokela lie liji. Enoo akulivwa, alioze hazehene Sakwonga kakuchiza liji lize akuwile muli ayo. 16Chimuwika nawa, ni waze akutambula mbuto ha mawe. Kaakwivwa liji lia Zambi, ni hazehene kaakulitambula ni uwahililo. 17Hindu ye mbuto miji kuyishi kuya kusuku. Kaakunyongonona ha shimbu likepe, alioze muze lamba hanji yihungumiona yakwiza mumu ha lie liji, hazehene maatalinga. 18Akwo akutambula mbuto mukachi ka mingonga. Enoo akwivwa liji lia Zambi, 19alioze yibikalo ya mwono uno, kwonga cha ubite, ni usona wa yuma yeka ni yeka yakukeketesa lie liji. Kashika, kulishi kwima mihuko. 20Atu akwo kaakutambula mbuto ha mavu abema. Enoo akwivwa liji lia Zambi, akulitambula pundu, akwima mihuko: amwe makumi atatu, akwo makumi asambano, akwo kulakaji.”

Chishima cha ndeya

(Tala nawa Luk 8:16-18)

21Yesu yaahula nawa ngwenyi: “Atu kaakuneha ndeya ni kuyisa mushi lia kapaya, hanji kushi lia muhela, nyi? Keeshi kuyisa ha chikwachilo cha ndeya, nyi? 22Kukushi Chuma cha kuswama chize kuchichi kasoloka nawa. Chibwe kukushi Chuma cha kuhengeka chize kuchichi kasoloka mu pangu. 23Nyi umwe uli ni matwi, evwe kwenyi!”

24Neye yaambila nawa ngwenyi: “Kanyamenu ku yuma yize nwakwivwa. Yeseko yize nwakwesekela akwenu, Zambi makanwesekela yo kumakanuwezela yikwo nawa. 25Mumu yoze ukwete, maakamuwezela yikwo, alioze yoze keshi nacho, maakamuchiza chibwe chize ali nacho.”

Chishima cha mbuto yize yakutatuka ukawayo

26Yesu yamba nawa ngwenyi: “Wanangana wa Zambi walifwa ngwe chino. Umwe mutu unakuwu mbuto mu munda. 27Kakubomba ha ufuku. Muze hikwacha, kakuhinduka. Mbuto kuyakusoka, kuyakusuhwa, kunyingika ka kutatuka chayo. 28Mavu kaakusokesa mihuko ayo ene: hatangu mafwo, muyibwa muze mukungo, mba kukola cha mbuto ha mukungo. 29Muze mbuto hiyakola, mayibatula ni poko mumu tangwa hiliaheta.”

Chishima cha lunona wa chibuta cha mostarde

(Tala nawa Mat 13:31-32, 34; Luk 13:18-19)

30Yesu yamba nawa ngwenyi: “Ni Chuma chika mututakenya Wanangana wa Zambi? Hanji ni chishima chika mutuulumbununa? 31Kuwalifwa ngwe chino. Umwe mutu kanande lunona wa chimwe chibuta, mostarde. Muze akumutumba kali mukepe Wahiana nona jeswe ja hashi. 32Alioze muze kakutaka, chibuta chawo chakubwa chinene chahiana yibuta yeswe. Chakutanda mitango yinene yinene, ni tujila kakutunga yaswa mu chizulie chacho.”

33Ni yishima yinji ngwe yino, Yesu yaalongesa liji lia Zambi nikulita ni kuhasa cho. 34Yaalongesa shina ni yishima. Alioze muze abwile ha ukawo, yalumbununa yuma yeswe kuli tumbaji twenyi.

Yesu yaholesa kangonga wa tachi

(Tala nawa Mat 8:23-27; Luk 8:22-25)

35Ha tangwa lizeliene, muze tangwa hilianjila kulu, Yesu yambila tumbaji twenyi ngwenyi: “Tuzaukenu, tuye musali lia chitende.” 36Yaahichika mbunga. Mba tumbaji yaatwala Yesu mu wato uze te anatwama. Mato akwo nawa abwile hamwe no. 37Susumuku kangonga wa tachi yeza. Miavu ya meya yiinjila mu wato, wato yiubutuka kuzala. 38Alioze Yesu te kunyima lia wato ali, mu tulo, yashachila ha musau. Tumbaji yaamulawisa, ngwo: “Longeshi, nichimwe kuli yena, nyi? Tunafu!” 39Yesu yalaula, yakanda kangonga ni meya ni liji lia tachi ngwenyi: “Hola zungo! Bwako kuluu!” Fuji yiihola, yikubwa lume kuluu. 40Yesu yaahula ngwenyi: “Kuchi kevwe nunevu woma? Kanda nuchifuliela, nyi?” 41Tumbaji yeevwa woma unji, yaalihanjekesa ngwo: “Awu mwene iya? Chibwe fuji ni meya yakumwononokena!”

Currently Selected:

Marku 4: CHK1970

Highlight

Copy