Marku 5

Yesu yawuka mukwa mwiku wa luchisa

(Tala nawa Mat 8:28-34; Luk 8:26-39)

1Yesu ni tumbaji twenyi yaaheta musali lia chitende cha Galilea,#5:1 CHITENDE CHA GALILEA: tala 1:16 mu chifuchi cha Gadara. 2Muze Yesu hatuhuka mu wato, hazehene mukwa mwiku wa luchisa yatakana nenyi, mu yivwenge ya mafuka anakatuka. 3Mwenamo te akutwama. Mutu niumwe kahashile kumuhombola, chibwe ni ngoji ja utale ka. 4Yisuho yinji amukashile moko ni molu ni ngoji ja utale, alioze yajibatwola lume. Niumwe kahashile kumuzeyesa. 5Tangwa heswe, ufuku ni mwalwa, yendangana hakachi ka mafuka ni ha milundu, ni kukololoka ni kulilemeka ni mawe.

6Muze te anamono Yesu kusuku, yazomboka fuji, yafulamana ku meso jenyi, 7yakololoka chikolo ngwenyi: “Yesu Mwana wa Zambi Mwilu Mwahiana, kuchi yena ni yami? Ngunakulembe mu jina lia Zambi, kanda ungubinjisa kama!” 8(Yamba chino mumu Yesu yamwambamba ngwenyi: “Yena mwiku wa luchisa, tuhuka muli mutu yono!”) 9Mba Yesu yamba ngwenyi: “Jina lie, yena iya?” Iye ngwenyi: “Jina liami ‘Anji’; mumu tuli anji.” 10Mwe mukwa luchisa yaliumba kuli Yesu kuhiana ngwenyi: “Kanda uhanga mwiku wa luchisa ku chifuchi.”

11Achi kwabwile chendo chinene cha ngulu hehi ha mulundu, te kaanali. 12Mwiku wa luchisa yiuliumba ngwenyi: “Tutume kama kuli ngulu, hanga tunjile mo.” 13Yesu yautayiza. Hazehene mwiku wa luchisa yiutuhuka muli mutu, yiunjila muli ngulu. Chendo yaalundumuka ha mbongo, yaanjila mu chitende. Kwoka cho tununu aali. Eswe yaafwa mu meya.

14Tufunga twa ngulu yaachina, yaanwanga sango jize mu limbo ni ku minda. Hohene atu yaaya ni kutala chize chabwile. 15Yaaheta kuli Yesu, yaamona mutu yoze wabwile ni mwiku wa luchisa hatangu, kanatwama, hazala mahina, habwa ni manyonga a utu. No yeevwa woma. 16Waze achimwene yaambulula ngwe chize chabwile kuli mukwa mwiku wa luchisa ni kuli ngulu. 17No yaabutuka kuliumba ngwo, Yesu akatuke ku chifuchi cho.

18Shimbu Yesu machinjila mu wato, mutu yoze wabwile ni mwiku uze hatangu yaliumba kuli iye hanga akabwe nenyi. 19Alioze Yesu kamutayijile ko. Yamwamba ngwenyi: “Hiluka ku mahie, ku vungu lie, ni kwalweza yuma yinene yize Mwene hakulingila, ngwe chize akuvwilanga keke.” 20Mutu yoze yaya, yabutuka kuchinyingikisa mu Membo Kumi#5:20 membo kumi: membo ja mavungu waze hi Ayuda ko, ku sude ku chivumbuko cha chitende cha Galilea. yize yeswe Yesu amulingile. Atu eswe yaalishimwoka kuhiana.

Mwana wa Jairu ni pwo yoze wakwatchile ku hina lia Yesu

(Tala nawa Mat 9:18-26; Luk 8:40-56)

21Muze Yesu hazauka nawa musali, mbunga yinene yaakunguluka kuze ku mbumbulu ya chitende. 22Hohene umwe mukwa kuyula wa zuwo lia kuwayila lia Ayuda yeza, jina lienyi Jairu muze hamona Yesu, yafulamana ku molu jenyi. 23Yaliumba kuli iye kuhiana ngwenyi: “Mwanami mukepe wa pwo kanahuzu. Tweya kama umuse moko, hanga ahinduke, abwe ni mwono.” 24Yesu yaya nenyi. Mbunga yinene yaamukaula, yaamushinjeka.

25Pwo umuwika wabwile mo yoze te ukwete musongo wa kuhita manyinga miaka kumi ni yaali. 26Yamona lamba linji kuli mbuki anji waze azangile kumuwuka. Yamwanga ubite weswe abwile nawo, hindu kenu, yayiza chikolo kuhiana hatangu. 27Neye yevwa sango ja Yesu. Kashika, weijile kunyima lienyi mukachi ka mbunga, yakwata ku hina lienyi, 28mumu yalihanjekesa ngwenyi: “Chibwe ngukwate ku hina lienyi wika, mungubwa mungunu.” 29Hazehene kuhita cha manyinga yichibatuka, yalivwa mu mujimba wenyi ngwenyi, yikola yami hiyahwa. 30Hazehene Yesu yalivwa ngwenyi, ndundo hijamutuhuka, yatewuluka mukachi ka mbunga nikuhula ngwenyi: “Iya wangukwata ku hina?” 31Tumbaji twenyi yaamukumbulula ngwo: “Unamono mbunga kaanakushinjika, hindu unahula ngwe: ‘Iya wangukwata ku hina,’ nyi?”

32Alioze Yesu yatala sali ni sali hanga amone yoze wachilinga. 33Mwe pwo yakundama nikuchikima ni woma, mumu yanyingika chize habwa. Yafulamana ku meso ja Yesu, yamwambulwila umwenemwene weswe. 34Yesu yamwamba ngwenyi: “Mwanami, ufulielo we hiwakuwuka. Yako kwe ni uhwimino. Musongo we uhwe lume.”

35Shimbu te Yesu machihanjika, tunganda yeeza a ku zuwo lia mukwa kuyula, Jairu, nikwamba ngwo: “Mwane hafwa. Kuchi mba unaketeka nawa Longeshi?” 36Alioze Yesu, muze hevwa liji lize, yambila mukwa kuyula ngwenyi: “Kanda wivwa woma, fuliela lume.” 37Yesu katayijile mutu niumwe kuya nenyi, shina Petulu, ni Tiangu (Jake), ni mwanakwo Yoano. 38Yaaheta ku zuwo lia mukwa kuyula. Yesu yamona kulinyachinga cha atu. Anji anase choji ni kuyeka mbimbi chikolo. 39Neye yanjila mu zuwo, yaahula ngwenyi: “Kuchi kevwe nunalinyachinga chichize? Yika nunalilila? Mwana pwo kafwile ko, alioze mu tulo ali.” 40No yaamuseha. Alioze Yesu yaatuhwisa eswe, yatayiza shina tato, ni naye, ni tumbaji atatu waze abwile nenyi. Yaanjila kuma kuze abwile mwe mwana pwo. 41Yesu yakwata mwana ku kwoko, yamwamba ngwenyi: “Talita kumi,” kulumbunuka ngwo: “Mwana pwo, ngunakwambe ngwami, Hinduka!” 42Hazehene mwana pwo yahinduka, yenda (te habwa ni miaka kumi ni yaali). Muze atu hachimona yaalishimwoka kuhiana! 43Yesu yaaha koki chikolo ngwenyi: “Mutu niumwe kanda akachinyingika.” Mba yamba ngwenyi: “Mwehenu Chuma cha kulia.”

Currently Selected:

Marku 5: CHK1970

Highlight

Copy