Luka 5

Yesu yatambika tumbaji atangu

(Tala nawa Mat 4:18-22; Mar 1:16-20)

1Limwe tangwa Yesu yamana ku mbumbulu ya chitende cha Genezare#5:1 chitende cha Genezare: chitende cha Galilea, kusuhwa chacho kilometro 21, unene wacho 13. Chili ni meya abema. mbunga yaamukunguluka mu kwivwa maliji a Zambi. 2Yesu yamona mato aali ku mbumbulu ya chitende. Akwa kutela yishi te haatuhuka mo, te kaanakoso manda jo. 3Yesu yanjila mu wato uze te wa Simone, yaliumba kuli iye asosoloke ku mbumbulu. Yesu yatwama mu wato nikulongesa e mbunga.

4Muze hamanununa kuhanjika, yambila Simone ngwenyi: “Shinjika wato haze hasuku, mba yena ni masepa je sunwisenu manda jenu nukwate yishi.” 5Simone ngwenyi; “Mwata, twahondangananga ufuku weswe, kutwakwachile nichimwe. Alioze ha liji lie mungusunwisa manda.”

6Yaasunwisa, yaakwata yishi anji, mba manda jo yabutuka kutanwoka. 7Yaatekula masepa jo waze abwile mu wato ukwo hanga eze aakwase. No yeeza, yaazalisa mato aali ni yishi, e mato yaabutuka kushimbama. 8Ha kuchimona, Simone Petulu yafulamana ku molu ja Yesu nikwamba ngwenyi; “Mwene ngukatuke mumu nguli Chivulumunyi!” 9Yalishimwoka, ni waze eswe abwile nenyi, mumu ha yishi anji waze akwachile. 10Chimuwika nawa, masepa ja Simone, Tiangu (Jake) ni Yoano, ana a Zebedeu a malunga. Alioze Yesu yambila Simone ngwenyi: “Kanda wivwa woma, chize ku haliabwila muukatela atu.” 11Mba yaaneha mato jo ku mbumbulu, yaahichika yeswe, yaakaula Yesu.

Yesu yabemesa mukwa mbumba

(Tala nawa Mat 8:1-4; Mar 1:40-45)

12Muze Yesu abwile mu limwe limbo, kuma yimubwa umwe mutu wange ni musongo wa mbumba. Ha kumona Yesu, yafulamana ku molu jenyi, yaliumba ngwenyi: “Mwene nyi unazange muuhasa kama kungubemesa!” 13Yesu yolola kwoko, yamukwata nikwamba ngwenyi: “Ngunazange, bwako mubema!” Hazehene misongo yiimuhwa. 14Yesu yamwaha koki ngwenyi: “Kanda ukambulwila niumwe. Alioze yako ukalilweze kuli hako wa Zambi. Mba ukalambule mulambu uze ambile Mose wa kulweza eswe ngwe, hiwabema.” 15Alioze lufuma wa Yesu yamwangana kuhiana, mbunga ya mieji yaamukunguluka ni kumwivwa ni hanga awuke misongo yo. 16Alioze Yesu yayaya ukawenyi kuze te akulembela.

Yesu yawuka mukwa kalepa

(Tala nawa Mat 9:1-8; Mar 2:1-12)

17Limwe tangwa Yesu yabutuka kulongesa. Afariseu#5:17 afariseu: yimwe mbunga ya Ayuda waze asele tachi kufunga Shimbi ja Mose ni Shimbi jikwo jize Ayuda te haanawezela ku Shimbi jize. ni alongeshi a Shimbi yaatwama ko. Yaakatwoka ku membo eswe a mu Galilea,#5:17 GALILEA: tala 1:26. ni a mu Yudea, ni ku Yerusaleme. Ndundo ja Mwene Zambi yijimukwasa kuwuka mieji. 18Kuma amwe malunga yaamunehena mukwa kalepa, te kanabombo ha muhela. Yaazanga kumunjisa mu zuwo ni kumutumbika ku meso ja Yesu. 19Alioze kaahashile kumunjisa mumu ha kwoka cha mbunga. Mba yaanyina ha fulumba, yaalokola ho chitutulu, yaamusunwishina ha muhela wenyi mukachi ka mbunga ku meso ja Yesu. 20Ha kumona ufulielo wo, Yesu yambila mukwa kalepa ngwenyi: “Mukwetu, milonga ye hiyakonekenewa.” 21Alongeshi a Shimbi ni Afariseu yaabutuka kunyonga ngwo: “Iya mutu yono unasaula Zambi? Iya mahasa kukonekena milonga? Zambi wika mwe mahasa.” 22Yesu yanyingika manyonga jo, yaahula ngwenyi: “Kuchi kevwe nuli ni manyonga wano? 23Chashi chika, shina kwamba ngwami: ‘Milonga ye hiyakonekenewa,’ hanji kwamba ngwami: ‘Katuka, wende’? 24Alioze ngunazange nunyingike ngwenu, Mwana Mutu,#5:24 mwana MUTU: jina lilemu, lia Yesu wika mu Usendo Waha. chiyulo akwete hano hashi cha kukonekena milonga.” Mba yambila mukwa kalepa ngwenyi: “Ngunakwambe ngwami: Katuka, anda muhela we, yako ku mahie!” 25Hazehene mwe mutu yakatuka ku meso ja atu eswe, yanda muhela uze te abomba, yaya ku mahienyi nikuchichimieka Zambi. 26Eswe yaalishimwoka kuhiana, yeevwa woma unji, yaachichimieka Zambi nikwamba ngwo: “Musono hitwamona yipupu!”

Yesu yatambika Levi

(Tala nawa Mat 9:9-13; Mar 2:13-17)

27Mabwamuze Yesu yatuhuka yamona umwe mukwa kulambwisa lijimu, jina lienyi Levi#5:27 LEVI: jina lienyi likwo Mateu, tala Mat 9:9. te kanatwama mu zuwo lia kulambwishila lijimu. Yamwamba ngwenyi: “Ngukaule.” 28Levi yakatuka, yahichika yeswe, yamukaula.

29Hohene Levi yamulingila chiteleka chinene mu zuwo lienyi. Yimubwa mbunga yinene ya akwa kulambwisa lijimu ni atu akwo ku mesa hamwe no. 30Afariseu ni alongeshi a Shimbi a ku mbunga yo yaalinyenyeta hali tumbaji twa Yesu ngwo; “Kuchi kevwe nunali ni nunanu hamwe ni akwa kulambwisa lijimu ni akwa lufuma mubi?” 31Yesu yaakumbulula ngwenyi: “Ahinduka keeshi kufupa mbuki, alioze shina waze akuyiza enoo akumufupa. 32Chejile mu kutambika akwa ululi, alioze akwa lufuma mubi, hanga alumuke ku mbunge.”

Chihula hakutwala ku kulitwamina kulia

(Tala nawa Mat 9:14-17; Mar 2:18-22)

33Amwe atu yaambila Yesu ngwo: “Yisuho yinji tumbaji twa Yoano akulitwamina kulia mu kuwayila Zambi. Chimuwika nawa ni tumbaji twa Afariseu.#5:33 AFARISEU: tala 5:17. Alioze tumbaji twe kaakulialia ni kaakunwanwa.” 34Yesu ngwenyi: “Nunanyongo kwambila masepa ja sandungi kulitwamina kulia shimbu sandungi achili hamwe no, nyi? Ka! 35Alioze tangwa mulikeza muze maakachiza sandungi, mba maakalitwamina kulia.”

36Yesu yaatela nawa chishima chino ngwenyi: “Mutu niumwe matanuna chando cha hina liaha ni kuchinuka ha hina likulu. Mumu, nyi machilinga, hina likulu mulitanuka, ni chando cha hina liaha kuchichi kulita ni chikulu. 37Niumwe malonga vinyu yaha mu tuku jikulu ja malambu. Mumu, nyi machilinga, vinyu yaha muyimengununa tuku, nejo mujifwa, ni vinyu muyimwangana. 38Hi chocho ko, chatamba kulonga vinyu yaha mu tuku jaha! 39Niumwe mazanga kunwa vinyu yaha ni hanwa kulu yikulu. Mumu mamba ngwenyi: ‘Yikulu shinoho.’ ”

Currently Selected:

Luka 5: CHK1970

Highlight

Copy