Luka 4

Sakwonga yeseka Yesu hanga amuvulumwise

(Tala nawa Mat 4:1-11; Mar 1:12-13)

1Yesu nikuzala ni Mwiku wa Linanga, yakatuka ku Yordau, yahiluka. Mba Mwiku wa Linanga, yiumutwala mu puya.#4:1 puya: tala 1:80. 2Kwenako Sakwonga yamweseka matangwa makumi awana. Yesu kalile nichimwe. Kashika muze matangwa waze haabalika, Yesu yevwa zala.

3Mba Sakwonga yamwamba ngwenyi: “Nyi mwe Mwana Zambi yena, amba liwe lino lialumuke mbolo.” 4Yesu ngwenyi: “Hichinasonewa mu Mukanda wa Zambi ngwo: ‘Mutu kahashile kubwa ni mwono ku mbolo wika.’ ”

5Mba Sakwonga yamutwala helu kuhiana, yamulweza, ha shimbu likepe, mawanangana eswe a hashi. 6Yamwamba ngwenyi: “Mungukwaha chiyulo chino cheswe ni upichi wa mawanangana wano. Yize yeswe hanangukunjika yo ngunahase kuyihana kuli yoze ngunazange. 7Nyi muuzondama ha makungunwa unguwayile, ayize muyibwa niye.” 8Yesu ngwenyi: “Hichinasonewa mu Mukanda wa Zambi ngwo: ‘Ukawayile Mwene Zambi ye, ukamulingile iye wika!’ ”

9Sakwonga yamutwala ku Yerusaleme, yamutumbika ha kasonga ka zuwo lia Zambi lia Ayuda, nikwamba ngwenyi: “Nyi mwe Mwana Zambi yena, liechelele, uholoke hashi, 10mumu hichinasonewa mu Mukanda wa Zambi ngwo: ‘Zambi makambila tunganda twenyi a mwilu ha kukufunga.’ 11Nawa ngwo: ‘Maakakuzundula ha moko jo, hanga kuuchi kuhukana ku liwe.’ ” 12Yesu ngwenyi: “Mukanda wa Zambi unambe ngwo: ‘Kanda ukeseka Mwene Zambi ye.’ ” 13Muze Sakwonga hamanununa kweseka Yesu mu yuma yeswe, yamukatuka ndoo ku tangwa likwo.

Yesu yabutuka milimo yenyi

(Tala nawa Mat 4:12-17; Mar 1:14-15)

14Yesu yahiluka ku chifuchi cha Galilea,#4:14 GALILEA: tala 1:26. ni ndundo ja Mwiku wa Linanga. Lufuma wenyi yafumana mu chifuchi chize cheswe. 15Yalongesa mu mazuwo jo a kuwayila. Atu eswe yaamuchichimieka.

Akwa Nazare yaalituna Yesu

(Tala nawa Mat 13:53-58; Mar 6:1-6)

16Yesu yahiluka ku Nazare#4:16 NAZARE: tala 1:26. kuze akolelele. Ha tangwa lia kuhwima yanjila mu zuwo lia kuwayila lia Ayuda nikulita ni ndako yenyi. Yakatuka atange Mukanda wa Zambi. 17No yaamwaha mukanda wa mukwa munanyi wa Zambi, Izaya. Neye yavungulula chivungo cha mukanda uze, yawana muma muze mwasonewene ngwo:

18“Mwiku wa Mwene Zambi uli muli yami.

Hananguwayisa mu kwambujolela yiswale Sango Jipema, hanangutumu mu kunyingikisa utuswilo kuli funge,

mu kulawisa meso ja tupuputa,

mu kutusula waze akumona lamba,

19mu kunyingikisa mwaka wa utu wa Mwene Zambi!”

20Mba Yesu yavunga mukanda, yauhilwisa kuli kavumbi, yatwama. Eswe waze te anatwama mu zuwo lia kuwayila yaamuhulikila meso. 21Neye yabutuka kwaambila ngwenyi: “Chisoneko chino cha mu Mukanda wa Zambi, musono hichamanunuka, ha shimbu linoliene hinwachivwa.” 22Eswe yaashindakenya, yaalishimwoka ha maliji abema waze ahanjekele, yaahula ngwo: “Awu hi mwana wa Josefe ko, nyi?” 23Yesu ngwenyi: “Chamwenemwene munungutela chishima chino ngwenu: ‘Mbuki, liwuke yena mwene.’ Munungwamba nawa ngwenu: ‘Linga nawa chizechene kuno ku limbo lie chize twevwile ngwo, walingile ku Kafarnaume.’ ” 24Yesu yaweza ho ngwenyi: “Chamwenemwene ngwami, mukwa munanyi niumwe akutambula mu limbo lienyi mwene. 25Ngunanwambulwila ni umwenemwene ngwami, mapwo anji waze te haanafwisa malunga, abwile mu Israele ha matangwa ja Eliya muze vula kanokene ko miaka yitatu ni Chipinji. Zala yinji yabwile mu chifuchi cheswe. 26Alioze Zambi katumine ko Eliya kuli niumwe wa kuli ayo shina lume kuli twamishi wa pwo wa maha Sarepta ku kanda ya Sidone. 27Mu Israele yimubwa nawa akwa mbumba anji ha mwaka wa mukwa munanyi wa Zambi, Elisha. Alioze niumwe wa kuli ayo wabemene shina Namane, Kasiria.”

28Ha kwivwa maliji wano, eswe mu zuwo lia kuwayila yeevwa ufwatulo, 29yaakatuka, yaamumbila haze lia limbo, yaamutwala ha mungilingili wa mulundu haze atungilile lie limbo, hanga akamuniase ho. 30Alioze yasewunuka ko, yaya kwenyi.

Yesu yatuhwisa mwiku wa luchisa

31Yesu yaya ku Kafarnaume,#4:31 Kafarnaume: ku mbumbulu ya chitende cha Galilea, ku norde ku chitokelo. limbo lia mu Galilea. Kwenako alongeselele atu ha tangwa lia kuhwima. 32No yaalishimwoka kuhiana ha longeso lienyi, mumu te kakulongesa ni chiyulo. 33Mu zuwo lia kuwayila yimubwa mutu wa mwiku ubi wa luchisa. Yakololoka kuhiana ngwenyi: 34“Aa! Kuchi yetu ni yena, Yesu Kanazare? Hiuneza mu kutwonona, nyi? Ngunakunyingika kanawa, mwe munangi yoze atumine Zambi!” 35Yesu yakalukila mwiku wa luchisa ngwenyi: “Haa! Hola, tuhuka muli mutu yono!” Mwiku yiulimbwisa mwe mutu hashi ku meso ja eswe, yiumutuhuka; kuwamulemekene ko nichimwe. 36Atu eswe yaalishimwoka kuhiana, yaalihula ngwo: “Lino liji lika? Mutu yono kakwamba ni chiyulo ni ndundo kuli mwiku wa luchisa, newo muutuhuka!” 37Lufuma wa Yesu yafumana kweswe mu chifuchi chize.

Yesu yawuka mieji anji

(Tala nawa Mat 8:14-17; Mar 1:29-34)

38Yesu yakatuka mu zuwo lia kuwayila, yanjila mu zuwo lia Simone. Naye weno ya Simone te kanayiji kachiki munji. No yaamwambulwila yo. 39Yesu yamukundama, yamuzulamina, yakanjisa kachiki. Kachiki yamuhwa. Hazehene naye weno ya Simone yakatuka, yabutuka kwalingila yakulia.

40Muze tangwa hilianjila kulu#4:40 Muze tangwa hilianjila kulu: tangwa lia kuhwima hiliabalika, kashika atu te maahasa kumbata mieji jo ni kulinga nawa milimo. eswe waze abwile ni mieji a misongo yeka ni yeka yaatwala kuli Yesu. Neye yasa moko hali mutu ni mutu, yaawuka eswe. 41Mwiku wa luchisa yiutuhwoka muli mieji anji ni kukololoka ngwo: “Mwe Mwana Zambi yena!” Alioze Yese yaukanjisa, yawaha koki, mumu yiunyingika ngwo kali Chilamwina yoze Zambi alakenyene.

Yesu yambujola mu Yudea

(Tala nawa Mar 1:35-39)

42Muze kwilu hikwacha, Yesu yatuhuka mu limbo, yaya ha ukawenyi. Mbunga ya atu yaabutuka kumufupa. Muze haamuwana, yaamukinda ngwo, kanda aahichika. 43Alioze Yesu yaamba ngwenyi: “Changutamba kwambujola Sango Jibema ja Wanangana wa Zambi mu membo akwo nawa, mumu Zambi hanangutumu ha chikuma chino.” 44Kashika, yambujola mu mazuwo a kuwayila a mu chifuchi cha Yudea.

Currently Selected:

Luka 4: CHK1970

Highlight

Copy