Luka 3

Yoano Chipapachisa yambujola

(Tala nawa Mat 3:1-12; Mar 1:1-8; Yoa 1:19-28)

1Ha mwaka kumi ni wa muchitano wa kuyula cha mwanangana wa Aroma, Tiberiu.#3:1 TIBERIU: mwe mwanangana wa Aroma ha miaka 14-37. Ha mwaka wa kuyula chenyi kumi ni wa muchitano te ha mwaka 28 hanji 29. Ponteu Pilatu#3:1 ponteu Pilatu: Karoma, mukwa kuyula wa yifuchi ya Yudea, ni Samaria, ni Idumea mu wanangana wa Aroma ha miaka 26-36. te kali mukwa kuyula wa mu Yudea, Herode#3:1 Herode: Herode Antipase, mukwa kuyula yifuchi ya Galilea ni Perea. te kakuyula mu Galilea, mwanakwo Filipe#3:1 Filipe: mwana wa Herode Munene, mwe Filipe wayulile yifuchi ya Iturea ni Trakonitise ku norde ku chivumbuko cha wanangana. mu chifuchi cha Iturea ni cha Trakonite, Lisania te kakuyula chifuchi cha Abilinia. 2Anase ni Kaifa#3:2 anase Ni KAIFA: Anase te kali mwata wa mahako ha miaka ngwe 6-15; Ukwe wenyi Kaifa ha miaka ngwe 18-36. te miata ja mahako. Ha mwaka uze Zambi yatambika Yoano, mwana wa Zakaria, mu puya#3:2 puya: tala 1:80. 3Neye yendangana mu chifuchi cheswe cha kusulangana ni lwiji Yordau, nikwambujola ngwenyi: “Alumukenu ku mbunge, anupapachise, mba Zambi manukonekena milonga yenu.” 4Chenacho mukwa munanyi wa Zambi, Izaya asonekene mu mukanda wenyi ngwenyi:

“Mutambi wa mutu yoze wakukololoka mu puya ngwenyi:

‘Lulikenu jila ya Mwene,

lulamisenu yikoka yenyi!

5Mbongo jeswe mujikashikiwa,

milundu yeswe ni mindundena yeswe muyikanyikumuka.

Yikoka yahenga muyikalulama,

majila abi kumaakasalama.

6Akwa hashi eswe maakamona ulamwino wa Zambi!’ ”

7Mbunga te kaakwiza kuli Yoano hanga akaapapachise. Yoano yaamba ngwenyi: “Yenu vungu lia yihili, iya unakanulongesa kuchina ufwatulo wa Zambi uze muukeza? 8Lingenu yitanga yize muyisolola chize hinwalumuka ku mbunge. Kanda nubutuka kulisamba ngwenu: ‘Abrahama kali kashakulu ketu.’ Mumu ngunanwambe ngwami, Zambi mahasa kwalumuna mawe wano ni kwapwisa vungu lia Abrahama, 9Zambi hasa kulu njimbu ku miji ya mitondo. Mutondo weswe uze kuushi kwima mihuko yibema, maupakula ni kuumbila mu kahia.”

10Hohene mbunga yaamuhula ngwo: “Mba kuchi chatutamba kulinga?” 11Yaakumbulula ngwenyi: “Yoze uli ni yikuto yaali chamutamba kuhana chimuwika kuli yoze keshi nacho, ni yoze uli ni yakulia chamutamba kulinga chizechene.” 12Akwa kulambwisa lijimu yeeza hanga aapapachise, yaahula Yoano ngwo: “Longeshi, kuchi yetu chatutamba kulinga?” 13Neye yaakumbulula ngwenyi: “Kanda nulambwisa kuhiana chize Shimbi jinambe.” 14Tujita yaamuhula ngwo: “Ni yetu, kuchi chatutamba kulinga?” Yaamba ngwenyi: “Kanda nutambula mbongo kuli niumwe ni tachi hanji mbenga. Yukenu ni fweto yenu.”

15Atu yaabutuka kutalatala, yaanyonga ngwo, kota Yoano mwe Chilamwina yoze Zambi alakenyene. 16Kashika Yoano yambila eswe ngwenyi: “Yami, ngunanupapachisa ni meya, alioze umwe unanguhiana yami kumeza. Yami, chatelele nichimwe kujitula sapato jenyi. Iye makanupapachisa ni Mwiku wa Linanga ni kahia. 17Kali ni lwalo mu kwoko lienyi wa kufuza nacho mbuto. Makakungila tiriku mu chila yenyi, alioze yizungu makayocha mu kahia kaze kukeshi kujima nichimwe!”

18Yoano yashinjila nawa yuma yinji yikwo muze alongesele atu Sango Jibema. 19Alioze yakumika mukwa kuyula Herode#3:19 Herode: Herode Antipase, tala 3:1. mumu wambachile Herodia, pwo lia mwanakwo, ni mumu ha yitanga yinji yikwo yibi yize alingile. 20Mba Herode yawezela nawa chibi chikwo chahiana ha kusa Yoano mu zuwo lia lamba.

Yoano yapapachisa Yesu

(Tala nawa Mat 3:13-17; Mar 1:9-11)

21Muze hapapachisa atu eswe, Yoano yapapachisa nawa Yesu. Muze te analembe, lilu yiliazuluka, 22ni Mwiku wa Linanga yiumuhulumukina nikulifwa ngwe liembe. Yeevwa liji mwilu ngwo: “Yena mwe Mwanami, nakukuzanga kuhiana. Nakuwahilila ne.”

Tushakulu twa Yesu

(Tala nawa Mat 1:1-17)

23Yesu te habwa ni miaka ngwe makumi atatu muze abutwile milimo yenyi. Atu yaanyonga ngwo, kali mwana wa Josefe, mwana wa Heli, 24mwana wa Matata, mwana wa Levi, mwana wa Melichi, mwana wa Janai, mwana wa Josefe, 25mwana wa Matatiasa, mwana wa Amose, mwana wa Nahume, mwana wa Esli, mwana wa Nagai, 26mwana wa Maata, mwana wa Matatiasa, mwana wa Semene, mwana wa Joseke, mwana wa Joda, 27mwana wa Joanane, mwana wa Resa, mwana wa Zerubabele, mwana wa Shealtiele, mwana wa Neri, 28mwana wa Melki, mwana wa Adi, mwana wa Kozama, mwana wa Elmodama, mwana wa Ere, 29mwana wa Yoshua, mwana wa Eliezere, mwana wa Jorime, mwana wa Matata, mwana wa Levi, 30mwana wa Simone, mwana wa Yuda, mwana wa Josefe, mwana wa Jonana, mwana wa Eliakime, 31mwana wa Malea, mwana wa Mena, mwana wa Matata, mwana wa Natane, mwana wa David, 32mwana wa Jese, mwana wa Obede, mwana wa Boaze, mwana wa Salmone, mwana wa Nasone, 33mwana wa Aminadabe, mwana wa Admine, mwana wa Ami, mwana wa Esrone, mwana wa Pereze, mwana wa Yuda, 34mwana wa Yakoba, mwana wa Isake, mwana wa Abrahama, mwana wa Tera, mwana wa Nahore, 35mwana wa Seruge, mwana wa Reu, mwana wa Pelege, mwana wa Ebere, mwana wa Shela, 36mwana wa Kenane, mwana wa Arfashede, mwana wa Sheme, mwana wa Noa, mwana wa Lameke, 37mwana wa Matusela, mwana wa Enoke, mwana wa Jarade, mwana wa Malelele, mwana wa Kenane, 38mwana wa Enose, mwana wa Sete, mwana wa Samutu,#3:38 SAMUTU: tala Ubu 3:20. mwana wa Zambi.

Currently Selected:

Luka 3: CHK1970

Highlight

Copy