Luka 2

Kusemuka cha Yesu Kristu

(Tala nawa Mat 1:18-25)

1Ha matangwa waze, Mwanangana wa Aroma, Augustu,#2:1 Augustu: jina likwo lia Gayuse Octaviuse, mwe mwanangana wa Aroma, chize ku mwaka 27 muze te Yesu Kristu kanda achisemuka ndoo ku mwaka 14 muze te hasemuka kulu. yahana Shimbi ya kusoneka atu eswe waze te atwama mu chifuchi cha Aroma. 2Chino che Chisoneko chitangu muze te Kirinu ayulile mu Siria.#2:2 SIRIA: ha matangwa waze, chifuchi cha Israele te chili Chipinji cha chifuchi cha Siria mu wanangana wa Aroma. 3Atu eswe yaaya akaasoneke, mutu mweswe ku limbo lienyi.

4Josefe yakatuka ku limbo lia Nazare#2:4 Nazare: tala 1:26. mu chifuchi cha Galilea, yaaya ku Yudea, ku limbo lize analivuluka ngwo, Betleheme#2:4 Betleheme: kilometro 8 ku sude ya Yerusaleme.. Kwenako asemukinyine mwanangana David. Josefe yaya mumu te wa ku vungu lia David. 5Yaya akamusoneke hamwe ni pwo lienyi wakwambisa, Maria, te kafumbakaji. 6Muze abwile mu Betleheme, matangwa a kusema chenyi yaaheta. 7Yasema mwanenyi mutangu, wa lunga. Yamuvunga mu mahina, yamubombesa mu chililo cha yimuna, mumu kaabwile ko ni muhela mu zuwo lia ngeji.

Tufunga ni tunganda a mwilu

8Yikubwa tufunga mu chifuchi chize, te anafungu chendo cha mapanga jo mu yambu ha ufuku. 9Susumuku kanganda ka mwilu yamana hehi no. Uhenya wa Mwene Zambi yiuhenya hali ayo. No yeevwa woma unji. 10Alioze kanganda ka mwilu yaamba ngwenyi: “Kanda nwivwa woma, mumu ngunanwambulwila Sango Jibema jize mujikawahisa atu eswe. 11Ufuku unowene, mu limbo lia David,#2:11 limbo lia DAVID: Betleheme, tala 2:4. Chilamwina hanusemukina, iye Kristu mwe Mwene! 12Chino che chilayi: Munuwana mwe mwana kemba wakuvunga mu mahina, kanabombo mu chililo cha yimuna.”

13Susumuku yikubwa hamwe ni kanganda chizavu cha tunganda twa mwilu. Yaachichimieka Zambi ngwo:

14“Fumanyisenu Zambi Mwilu Mwahiana!

Hano hashi uhwimino hakachi ka atu waze akumuwahila!”

15Muze tunganda a mwilu akatukile ni kuhiluka mwilu, tufunga yaalihanjikisa ngwo: “Tuyenu haliabwila ndoo ku Betleheme, tutale Chuma chino hichabwa, chize Mwene Zambi hatunyingikisa.” 16No yaaya nikawashi, yaawana Maria ni Josefe, yaamona mwe mwana kemba, te kanabombo mu chililo cha yimuna. 17Ha kumumona, tufunga yaalumbununa yuma yize evwile yakutwala kuli mwe mwana. 18Eswe waze ayivwile, yaalishimwoka ha maliji waze tufunga aambulwilile. 19Alioze Maria yafunga yuma yino yeswe ni kuyizewula mu mbunge yenyi. 20Tufunga yaahiluka ni kufumanyisa ni kuchichimieka Zambi ha yuma yeswe yize heevwa ni yize haamona. Yuma yeswe yiilita ngwe chize tunganda twa mwilu aalwezele.

Yaamuluka jina ngwo, Yesu

21Ha tangwa lia muchinake, ha kumupwisa ngalami, yaamuluka jina ngwo, Yesu, lienalio amulukile kanganda ka mwilu muze te kanda achiseseka mu jimo lia naye.

Yaakunjika Yesu kuli Zambi

22Muze matangwa a kujilula, nikulita ni Shimbi ja Mose, haamanunuka, yaaneha Yesu ku Yerusaleme amukunjike kuli Mwene Zambi. 23Chenacho hichinasonewa mu Shimbi ja Mwene Zambi ngwo: “Mwana lunga mweswe malianga kusemuka maakamuvuluka ngwo, Munangi wa Mwene Zambi.” 24Yaalambula nawa mulambu nikulita ni Shimbi ja Mwene Zambi ngwo: “Ana a membe aali hanji tutele aali.”

25Mu Yerusaleme yimubwa umwe lunga, jina lienyi te Simone, mukwa ululi, mukwa kuwayila Zambi. Te kakushimbwila ulamwino wa Israele. Mwiku wa Linanga yiubwa muli iye. 26Newo yiumulweza ngwenyi, kechi kafwa ndoo makamona Chilamwina yoze Zambi alakenyene. 27Ku tachi ja Mwiku wa Linanga, Simone yanjila mu zuwo lia Zambi lia Yuda, shimbu yisemi anehene mwe mwana kemba Yesu, akamulinge nikulita ni ndako ya Shimbi, 28Simone yamutambula mu moko jenyi, yachichimieka Zambi ngwenyi:

29“Mwene Zambi, haliabwila chilakenyo che hichamanunuka.

Kavumbi ke mahasa kufwa ni uhwimino

30mumu meso jami haamona ulamwino we

31uze hiunalulika ku meso ja atu eswe.

32Ulamwino uno lie pangu lia kutemwina waze hi Ayuda ko,

we ulemu wa atu je Aisraele.”

33Tato ni naye yaalishimwoka ha yuma yize Simone ahanjikile hakutwala kuli Yesu. 34Simone yaawahisa, yalweza naye Maria ngwenyi: “Yono Zambi hanamuse ha kulimbwisa anji ni ha kuhindwisa anji mu Israele. Makabwa chilayi chize maakachihamikina, 35hanga askasolole manyonga a mu mbunge ja atu anji. Ewa, ni chinyengo ngwe mukwale unene muchikakutuwa mu mbunge ye.”

36-37Yikubwa nawa umwe pwo mukwa munanyi, Ana, mwana wa Fanwele, wa ku vungu lia Asere. Yabwa ku ulo miaka shimbiali, mba yatwama twamishi miaka makumi nake ni yiwana ndoo ku ushinakaji wenyi. Te keshi kukatuka mu zuwo lia Zambi, alioze yanyongonona mu kuwayile mwalwa ni ufuku, ni kulitwamina kulia, ni kuliumba. 38Neye yaheta ha ola yizeyene, yasakwila Zambi, yalumbununa yikuma ya mwe mwana kuli atu eswe waze te akusa mbunge ku ukule wa Yerusaleme.

Yaahiluka ku Nazare

39Muze te yisemi jenyi haamanununa yuma yeswe nikulita ni Shimbi ja Mwene Zambi, yaahiluka ku Galilea ku limbo lia Nazare. 40Mwe mwana yatatuka, yakola, yakula ni mana anji; ni Zambi yamuwahisa.

Mukweze Yesu mu zuwo lia Zambi lia Ayuda

41Yisemi ja Yesu te kaakuya mwaka ha mwaka ku Yerusaleme ha Chiwanyino cha Kubalika. 42Muze te Yesu habwa ni miaka kumi ni yaali, iye ni yisemi jenyi yaaya ku chiwanyino nikulita ni ndako yo. 43Muze chiwanyino hichahwa, yisemi yaahiluka, alioze mukweze Yesu yasala ku Yerusaleme. Yisemi jenyi te kaachinyingikine. 44Yaanyonga ngwo, Yesu mu chendo ali. Yeenda tangwa heswe lia muundu. Mba yaabutuka kumufupa mukachi ka usoko wo ni masepa jo, 45alioze kaamuwanyine mo. Hohene yaahiluka ku Yerusaleme ni kumufupa. 46Ha tangwa lia muchitatu, yaamuwana mu zuwo lia Zambi lia Ayuda. Te kanatwama mukachi ka alongeshi ja Ayuda, ni kwabanjika ni kwahula yihula. 47Eswe waze amuvwile, yaalishimwoka ha malinjekela jenyi ni yikumbululo yenyi. 48Muze yisemi jenyi haamumona, yaalishimwoka kuhiana. Naye yamwamba ngwenyi: “Aa mwanami, kuchi kevwe unakatulinga chize? Tatenu ni yami tunakevwa chinyengo kuhiana ha kukufupa.” 49Neye yaakumbulula ngwenyi: “Yika te nunangufupila? Kuma kunwanyingikine ngwenu, Changutamba kubwa mu zuwo lia Tata, nyi?” 50Alioze liji lia Yesu kuliaalumbunukinyine ko.

51Mba yahiluka no ku Nazare, yoononokena. Naye yafunga yuma yize yeswe mu mbunge yenyi. 52Yesu yatatuka mu mujimba, yakula ni mana, yabemena ku meso ja Zambi ni atu.

Currently Selected:

Luka 2: CHK1970

Highlight

Copy