Luka 6

Chihula hakutwala ku tangwa lia kuhwima

(Tala nawa Mat 12:1-8; Mar 2:23-28)

1Ha limwe tangwa lia kuhwima, Yesu yabalikila mu minda ya tiriku. Tumbaji twenyi yaabutuka kumakuna mitwe ya tiriku, yaayilakumwona mu moko jo, yaahaha. 2Amwe Afariseu yaahula ngwo: “Kuchi kevwe nunalingi ha tangwa ha kuhwima chize kuchalitele ni Shimbi jetu?” 3Yesu ngwenyi: “Kunwatangile chize alingile mwanangana David iye mwene ni atu jenyi muze evwile zala, nyi? 4Yanjila mu zuwo lia Zambi, yanda mbolo ja kutumbieka ku meso ja Zambi, yaha, yaha nawa atu jenyi. Alioze Shimbi jetu kujishi kutayiza shina mahako a Zambi wika kujilia.” 5Yesu yawezaho ngwenyi: “Yami Mwana Mutu#6:5 mwana mutu: tala 5:24. nguli Mwene wa tangwa ha kuhwima.”

Mukwa kwoko liasosewa

(Tala nawa Mat 12:9-14; Mar 3:1-6)

6Ha limwe tangwa likwo ha kuhwima, Yesu yanjila mu limwe zuwo ha kuwayila, yabutuka kulongesa. Yimubwa umwe mutu, kwoko lienyi ha chindume te kuliasosewa. 7Alongeshi a Shimbi ni Afariseu yaalayila Yesu nyi mawuka umwe ha tangwa ha kuhwima, mumu afupile chitela cha kumusumina nacho mulonga. 8Alioze Yesu yanyingika manyonga jo, yambila mukwa kwoko liasosewa ngwenyi: “Katuka, umane mukachi ka atu eswe.” Neye yakatuka, yamana mukachi. 9Mba Yesu yaahula ngwenyi: “Ngunanuhula ngwami: Shimbi jetu kuchi jinatayiza kulinga ha tangwa ha kuhwima? Kulinga yibema hanji kulinga yibi? Kulamwina mutu hanji kumwonona?” 10Yaatala eswe nee. Mba yambila mwe mutu ngwenyi: “Olola kwoko lie.” Neye yaliolola, hazehene yilibwa nawa lingunu. 11Alioze ayo yeevwa ufwatulo, yaabutuka kufupa mana hakachi ko chize maahasa kulinga Yesu.

Yesu yatongola tunganda kumi ni aali

(Tala nawa Mat 10:1-4; Mar 3:13-19)

12Ha matangwa waze Yesu yakanduka ha mulundu mu kulemba, yahwishila ko ufuku weswe ni kulemba Zambi. 13Muze hikwacha, yatambika tumbaji twenyi, yatongola kumi ni aali mukachi ko, yaaluka ngwenyi: “Tunganda.” 14Majina jo wano: Simone (yoze Yesu yamuluka jina likwo, Petulu), ni mwanakwo Andre, ni Tiangu (Jake,) ni Yoano, ni Filipe ni Bartolomeu, 15ni Mateu, ni Tomase, ni Tiangu (Jake) mwana wa Alfeu, ni Simone (mukwa kuzanga utuswilo wa chifuchi), 16ni Yudase mwana wa Tiangu (Jake), ni Yudase Kakeriote, yoze wakunjikile Yesu kuli akwa kole jenyi.

Yesu yalongesa mbunga, yawuka mieji

(Tala nawa Mat 4:23-25)

17Yesu yapalumuka ha mulundu hamwe no. Yamana hamwe homa hasalama, haze habwile mbunga yinene ya tumbaji twenyi. Yihabwa nawa mbunga Yinene ya atu a mu chifuchi cheswe cha Yudea, ni a mu Yerusaleme, ni a mu membo ja Tiru ni Sidone,#6:17 Tiru ni Sidone: membo ja mavungu waze hi Ayuda ko ku mbumbulu ya kalunga lwiji Mediterane, ku norde ya chitende cha Galilea. ku mbumbulu ya kalunga lwiji. 18Yeezaza ha kumwivwa ni hanga awuke ku misongo yo. Waze abinjishile kuli mwiku wa luchisa yaahindwoka. 19Atu eswe yaazanga kumukwata mumu ndundo yijimutuhwoka, yijiwuka eswe.

Yiwape ni lamba

(Tala nawa Mat 5:1-12)

20Yesu yatala tumbaji twenyi nee, yaamba ngwenyi:

“Kunwawaha yenu yiswale,

mumu Wanangana wa Zambi niwenu!

21“Kunwawaha yenu nwakwivwa zala haliabwila,

mumu munukakuta!

“Kunwawaha yenu nwakulila haliabwila, mumu munukaseha!

22“Yenu kunwawaha muze atu maanuvutwokela, muze maanulituna, muze maanuchoka, muze maanulelesa ngwe nuli abi, mumu hali yami Mwana Mutu.#6:22 mwana mutu: tala 5:24. 23Wahililenu muze yize yeswe muyikanuwana. Tumbwokenu ni uwahililo, mumu chawana chinene chinanutwaminyina mwilu. Mumu Chenacho tushakulu two ahungumionene akwa munanyi a Zambi.

24“Alioze lamba lienu yenu pichi,

mumu hinunawaha kulu.

25“Lamba lienu yenu nwakukula haliabwila,

mumu munukevwa zala!

“Lamba lienu yenu nwakuseha haliabwila,

mumu munukanenganyana, munukalila!

26“Lamba lienu muze atu eswe maanuchichimieka, mumu Chenacho tushakulu two achichimiekene akwa munanyi a mahuza.”

Zangenu akwa kole

(Tala nawa Mat 5:38-48; 7:12a)

27“Alioze yenu nwakungwivwa, ngunanwambe ngwami: zangenu akwa kole jenu, lingilenu yibema waze akunuvutwokela, 28wahisenu waze akunushinga, lembelenu waze akunuhungumiona. 29Nyi umwe makulamba ha tafu, mutewulwile nawa likwo. Nyi umwe makwanda mbinja ye (kazaku ke) mwechele nawa chikuto che. 30Hanenu kuli waze maanwita chimwe Chuma. Nyi umwe wakwanda Chuma che, kanda umuhula cho nawa. 31Lingilenu akwo chize nunazange ayo anulingile.

32“Nyi nwakuzanga lume waze akunuzanga, chawana chika nwakusa mbunge ha kutambula? Chibwe yivulumunyi kaakuzanga waze akwazanga! 33Nyi nwakulingila yibema shina waze akunulingila yibema, chawana chika nwakusa mbunge ha kutambula? Chibwe yivulumunyi no kaakulinga chizechene! 34Nyi nwakusondamisa shina waze nunase mbunge ha kunuhilwishila chawana, chika munukatambula? Chibwe yivulumunyi no kaakulilingila chizechene hanga akaahilwishile! 35Shinoho zangenu akwa kole jenu, alingilenu yibema, asondamisenu, hi kusa ko mbunge ha kunuhilwishila yo. Munukatambula chawana chinene. Munukabwa ana ja Zambi ya Mwilu Mwahiana, mumu kakulweza akwa kaleleso ni yingulungulu utu. 36Bwenu akwa keke ngwe chize abwa Tatenu.”

Kanda nuhisa akwenu

(Tala nawa Mat 7:1-5)

37“Kanda nubatwila akwenu, Zambi neye kechi kanubatwila. Kanda nuhisa akwenu, Zambi neye kechi kanuhisa. Konekenenu akwenu, Zambi neye makanukonekena. 38Ahenu akwenu, Zambi neye makanwaha: njongo yibema, yakukona, yakunyikumuna hamwe, yakusupwoke mu yikashi yenu. Mumu ni cheseko chize nwakwesekela nacho, che Zambi neye makanwesekela.”

39Yesu yaatela nawa chishima ngwenyi: “Kapuputa mahasa kusongwela kapuputa mukwo, nyi? Nyi machilinga, eswe aali keechi kuholokela mu wina nyi? 40Kambaji keshi kuhiana longeshi yenyi. Alioze kambaji mweswe, muze halilongesa, mabwa ngwe longeshi yenyi. 41Kuchi unatale kachiba kaze kali mu liso lia mukwenu, alioze kuushi kwalula mukambo uze uli mu liso lie? 42Ngwe kuchi muuhasa kwambila mukwenu ngwe: ‘Mukwetu, ngutayize nguchize kachiba mu liso lie,’ alioze kuushi kumona mukambo uze uli mu liso lia yena mwene? Chilembekese! Hatangu chiza mukambo uze uli mu liso lie, mba muumona zwalala ha kuchiza kachiba mu liso lia mukwenu.”

Mutondo ni mihuko yawo

(Tala nawa Mat 7:1-20; 12:33-35)

43“Mutondo Ubema kuushi kwima mihuko yibi, ni mutondo ubi kuushi kwima mihuko yibema. 44Mutondo weswe kanaunyingika ku mihuko yawo. Atu keeshi kuhela makuyu ku yibuta ya mingonga, keeshi kuhela uvwa ku mikalale. 45Mutu mubema kakutuhwisa yuma yibema mu mbunge yenyi yibema. Mutu mubi kakutuhwisa yuma yibi mu mbunge yenyi yibi. Mumu kanwa lia mutu mulihanjika yize yinalumbama mu mbunge.”

Tungi aali

(Tala nawa Mat 7:24-27)

46“Kuchi kevwe nwakunguvuluka ngwenu: ‘Mwene, Mwene,’ alioze kunushi kulinga yuma yize ngunanwambe? 47Yoze meza kuli yami, ni mevwa maliji jami, ni maalinga, mungunulweza yoze alifwa nenyi. 48Kalifwa ni mutu yoze watungile zuwo. Yafula Chipinji chisuku, yasa fundamentu ha liwe. Muze mihuji yejile, yilundumukina ha zuwo lize, kuyahashile kulinyikisa mumu yalitunga kanawa. 49Yoze Unevu maliji jami, alioze keshi kwalinga, kalifwa ni mutu yoze watungile zuwo lienyi ha mavu amokomoko, kulishi fundamentu. Muze mihuji yejile, yilundumukina ha zuwo lize, mba yilibuzuka. Kubuzuka chalio yichibwa chinene!”

Currently Selected:

Luka 6: CHK1970

Highlight

Copy