Luka 7

Yesu yawuka kavumbi ka mwata wa tujita

(Tala nawa Mat 8:5-13)

1Muze Yesu hamanununa kuhanjika maliji wano eswe kuli atu, yahiluka ku Kafarnaume.#7:1 KAFARNAUME: tala 4:31. 2Umwe mwata wa tujita twa Aroma yabwa ni umwe kavumbi kenyi mulemu. Kavumbi yoze yayiza, te himafwa. 3Muze mwata yoze hevwa hakutwala kuli Yesu, yamutumina amwe makulwana ja Ayuda ni kumulweza hanga eze awuke kavumbi kenyi. 4No yaaheta kuli Yesu, yaabutuka kumulembejeka ngwo: “Mwata, mutu yono kanatela umukwase, 5mumu kaakuzanga vungu lietu. Iye mwe watutungilile zuwo lia kuwayila.” 6Mba Yesu yaya hamwe no. Te haheta hehi ni zuwo, muze mwe mwata yatuma masepa jenyi ni kumwamba ngwo: “Mwene, kanda uliaha lamba, yami chatelele nichimwe yena unjile mu zuwo liami. 7Chibwe yami chatelele ngwize kuli yena. Alioze amba liji wika, mba kavumbi kami kumahinduka. 8Yami mwene nguli mu chiyulo cha miata jami, ni tujita nguli no mu chiyulo chami. Nakwambila umuwika ngwami: ‘Yako!’ mba maya; ni mukwo ngwami: ‘Tweya!’ mba meza. Nakwambila kavumbi kami ngwami: ‘Linga chino!’ mba machilinga.” 9Muze Yesu hevwa maliji wano yalishimwoka, yatewuluka ku mbunga waze te anamukaula, yaambila ngwenyi: “Ngunanwambe ngwami, kanda ngumona kama ufulielo ubwa haha, chibwe mu Israele ka!” 10Waze atumine yaahiluka ku zuwo lia mwata, yaawana mwe kavumbi hahinduka.

Yesu yahindwisa mukweze, mwana wa twamishi

11Ha matangwa waze Yesu yaya ku limwe limbo, jina lialio Naine. Tumbaji twenyi ni mbunga yinene yaaya hamwe nenyi. 12Shimbu machikundama ku chikolo cha limbo, kuma te atu mufu anatwala ku mafuka. Mukweze yoze te mwana umuwika lume kuli naye, pwo yoze te hanafwisa lunga. Mbunga yinene ya atu a mu limbo abwile ko hamwe ni mwe pwo. 13Muze hamumona, Mwene yamuvwila keke, yamwamba ngwenyi: “Kanda ulila.” 14Mba yakundama, yakwata mukango. Akwa kumbata yaamana. Yesu yamba ngwenyi: “Mukweze, ngunakwambe ngwami, hinduka!” 15Mufu yahinduka, yatwama, yabutuka kuhanjika. Yesu yamukunjika kuli naye. 16Atu eswe yeevwa woma, yaachichimieka Zambi ngwo: “Mukwa munanyi munene wa Zambi hasoloka mukachi ketu,” nawa ngwo: “Zambi haneza ni kulamwina atu jenyi!” 17Liji lino hakutwala kuli Yesu yilifumana mu Yudea mweswe ni yifuchi yeswe ya kusulangana.

Yoano Chipapachisa yatumina Yesu tumbaji

(Tala nawa Mat 11:2-19)

18Tumbaji twa Yoano yaamwambulwila yuma yize yeswe. Yoano yatambika aali hakachi ko, 19yaatuma kuli Mwene Yesu ni kumuhula ngwo: “Yena uli yoze chatamba kwiza, nyi? Hanji chatutamba kutalila weka?”

20Muze haaheta kuli Yesu, yaamwamba ngwo: “Yoano Chipapachisa hatutuma ha kukuhula ngwenyi: ‘Yena uli yoze chatamba kwiza, nyi? Hanji chatutamba kutalila weka?’ ” 21Ha shimbu lizeliene Yesu te kanawuku atu anji ku misongo yo, ni ku weji wo, ni kuli mwiku wa luchisa. Yalawisa meso ja tupuputa anji. 22Mba Yesu yakumbulula tumbaji twa Yoano ngwenyi: “Yeenu nukambulwile Yoano yize hinwamona ni hinwevwa, ngwenu, tupuputa kaanamono, yitonji kaanende, akwa mbumba kaanabeme, afwa matwi kaanevu, afu kaanahinduka, Sango Jibema kanajambujolela yiswale. 23Kawaha yoze keshi kuyambashana hakutwala kuli yami!”

24Muze te tunganda twa Yoano haaya, Yesu yabutuka kuhanjika ku mbunga hakutwala kuli Yoano ngwenyi: “Yika nwayile ni kutala mu puya? Te lumbungu unanyiki ni fuji, nyi? Ka. 25Mba yika nwayile ni kutala? Umwe mutu te unazala mahina a lefuna, nyi? Ka, waze akuzala mahina a uhenya kaakubwa ni ubite unji, kaakutwama mu mazuwo ja mianangana! 26Mba yika kevwe nwayile ni kutala? Umwe mukwa munanyi wa Zambi, nyi? Ewa, ngunamwambe ngwami, kanahiana chikolo mukwa munanyi wa Zambi. 27Mumu hakutwala kuli Yoano, Zambi, mu Mukanda wenyi, kanambe ngwenyi: ‘Talenu, ngunatumu kanganda kami kulutwe lie akakululikile jila.’ 28Ngunambe ngwami, mukachi ka waze akusemuka kuli mapwo wakuhi niumwe munene Wahiana Yoano. Alioze mukehe Wahiana mu Wanangana wa Zambi, kanamuhiana.”

29Akwa kulambwisa lijimu ni atu akwo ese yaamwivwa. No yaamba ngwo: “Zambi kali mukwa ululi.” Enoo Yoano apapachishile hatangu. 30Alioze Afariseu ni alongeshi a Shimbi yaalituna chize Zambi azangile kwalingila, yaalituna upapachiso wa Yoano.

31Yesu yamba nawa ngwenyi: “Ni aya mungutesa atu a mwakono? Ni aya analifu kama? 32Kaanalifu ni twanuke waze anatwama mu yitanda. Amwe kaanatambika akwo ngwo: ‘Twanwimbilanga ndembo, alioze kunwahanganyine! Twalilanga mbimbi, alioze kunwalilile!’ 33Mumu Yoano Chipapachisa haneza, kalile kwenyi mbolo ni kanwine kwenyi vinyu, hindu te nwakwamba ngwenu: ‘Mwiku wa luchisa akwete!’ 34Mwana Mutu#7:34 MWANA MUTU: tala 5:24. haneza, te kakulia ni kunwa, hindu nunambe ngwenu: ‘Talenu mutu yono chimbulungunya, mukwa kuzengewa, sepa lia akwa kulambwisa lijimu ni akwa lufuma mubi!’ 35Alioze eswe waze akutayiza mana ja Zambi kaananyingika ngwo, kaali amwenemwene.”

Yesu yalia mu zuwo lia Simone, Kafariseu

36Umwe Kafariseu#7:36 KAFARISEU: tala 5:17. yalakenya Yesu alie hamwe nenyi. Yesu yaya nenyi, yatwama ku mesa. 37Kuma te umwe pwo wabwile mu limbo lize, mukwa lufuma mubi. Muze te hevwa ngwo, Yesu kali ku mesa mu zuwo lia Kafariseu, yambata kasaji kakulinga ni mawe alemu atoma, te kanazala ni maji a vumba libema liahiana. 38Yamana kunyima lia Yesu ku molu jenyi, yalilalila, yasanyisa molu ja Yesu ni masoji jenyi, yaakusumuna ni kambu jenyi, yaambeja, yaawayisa maji. 39Muze Kafariseu, yoze walakenyene Yesu, hachimona, yalihanjikisa ngwenyi: “Yaa, nyi chamwenemwene mutu yono kali mukwa munanyi wa Zambi, kachi te manyingika pwo yono unamukwate, ni chize abwa. Kali mukwa lufuma mubi!” 40Yesu yambila Kafariseu yoze ngwenyi: “Simone, liji nguli nalio lia kukulweza.” Simone ngwenyi: “Longeshi, ambenu.” 41Yesu ngwenyi: “Atu aali asondamine mbongo kuli umwe mukwa kusondamisa. Mukwo yamusondama kulakaji jitano, mukwo makumi atano. 42Muze niumwe hakachi ko kahashile kumufweta, yajimuna kongo lio eswe aali. Iya hakachi ka wano aali mamuzanga kuhiana?” 43Simone ngwenyi: “Kota yoze asondamishine jinji, mwe mamuzanga kuhiana.” Yesu ngwenyi: “Kanawa wamba.” 44Mba yatewuluka kuli mwe pwo, yambila Simone ngwenyi: “Unamono pwo yono, nyi? Haanga chinanjililanga mu zuwo lie, kuwanguhele meya a kusanyisa molu jami, alioze iye hangusanyisa molu ni masoji jenyi, haakusumuna ni kambu jenyi. 45Kuwangutambwile ni kumbeja, alioze iye kalitwaminyine ko kumbeja molu jami chize kuze nanjilanga. 46Kuwawayishile mutwe wami ni maji, alioze iye hawayisa molu jami ni maji a vumba libema. 47Kashika ngunakwambe ngwami, zango lize linene halwezana linalumbunuka ngwo, milonga yenyi yinji hiyakonekenewa. Alioze kuli yoze hakonekena yikepe, mazanga yikepe.” 48Mba Yesu yambila mwe pwo ngwenyi: “Milonga ye hiyakonekenewa.” 49Waze abwile ku mesa hamwe nenyi yaabutuka kulihanjekesa ngwo: “Haa! Iya mwenawo Unahamuka ha kukonekena milonga?” 50Alioze Yesu yambila mwe pwo ngwenyi: “Ufulielo we hiwakulamwina. Yako kwe ni uhwimino.”

Currently Selected:

Luka 7: CHK1970

Highlight

Copy