Kịẹn-aḅịḅị 14

Tomi Ma Ḍuko-sụam

1Anịtẹso tomina-ogbo mẹmgba nwẹnị saakị owu pakama; tẹ tomi ma anị ḍin mẹ ḅụ tẹmẹ-la ḅara kẹ owum. 2Izirẹlị ḅe apụ mamgba mbụrụmbụrụ Mozizi na, Erọnị na pịrịm; bebe tomina-ogbo mẹ ịn ḅẹẹm, “Mimgbe wa Ijiputi ama mẹ ḅụ sime tẹ fị ịya! Anịanịa, mimgbe wa ịkpa mẹ ḅio sime tẹ fịị ya! 3KỊNỊNYANAḄỌ ḅe tiegotẹ wa kẹ mị ama mẹ ḅo, wa ḅo okologie ḅụ ḅịkị ḅẹ ḅara aro? Wamịna sime-ereme na, wamịna ḍọkọḍọkọ-awọmẹ na nwẹnị ḅo pẹị, pẹị aị sọ; anị iḅitẹịn ḅịa wa pịkịma-so Ijiputi mu?” 4Ịn nwẹnị jụmọ-jụmọ ḅẹẹ, “Ó yee wa gbọrụ sịḅịdaḅọ sẹlẹ-ọkị, tẹ pịkịma-so Ijiputi mu.”

5Anịtẹso Mozizi na, Erọnị na nwẹnị ịna tọrụkuḅu kẹ Izirẹlị ḅẹ atomi ma tomina-ogbo mẹ ḅẹ inweni-ogbo mẹ tọrọkọ ḅịkị-koro. 6Tẹ Jọsụwa, Nọnị owiḅọtụḅọ ḅe na, Kẹlẹbụ, Jefune owiḅọtụḅọ ḅe na tẹ inima tẹ ama mẹ ẹnyẹ-apụ ma ogbo-ḅio sime apụ ma nwẹnị ịna akapa kan, 7tẹ Izirẹlị ḅẹ tomina-ogbo mẹmgba ḅẹẹ, “Ama mẹ tẹ wamịnị mẹnjị-toluḅọrọ tẹ ẹnyẹ ama mẹ anie iḅi ḅụratẹ ama. 8Wa nwẹnị KỊNỊNYANAḄỌ ḅe ḅụụ-ḅẹlẹm ḅẹḅẹ, ọ̀ wa ọkị-ḅo mị ama mẹ ḅio suu ḅa, tẹ anị kẹ wa pịrị ḅa, anị ḅụụ-ḅẹlẹmatẹ iḅiọkụma fịye so-pakamarị amakiri mẹ. 9#Hib 3.16Ọmịnị rẹ paa sịḅị-kụrọma KỊNỊNYANAḄỌ ḅe pịrị ma, tẹ ama mẹ ḅẹ atomi ma ḍiki-ḅalafa ma, kẹ gotẹ ọkọ ḅẹẹarị, ini anie sime wa pịrị fịye; ịna ḅụụ-ḍikiḍikiye mẹ ịna aḅụụ ḅụ sikima tẹ, anịsakị KỊNỊNYANAḄỌ ḅe wamịnị na emi; ọmịnị ịn ḍiki-ḅalafa ma.” 10Kụma tomina-ogbo mẹmgba nwẹnị ḍụḅarị kẹ in gbin ḅẹ ḍuko. Anịtẹso KỊNỊNYANAḄỌ ḅe ebube nwẹnị Kobiri Akpụrụ-warị mẹ ḅụ ḅịya paka Izirẹlịapụ mamgba pịrị.

Mozizi Tẹkẹ Tomi Ma Pịrịm

11KỊNỊNYANAḄỌ ḅe nwẹnị Mozizi ḅẹẹ, “Mịna atomi ma ì ḍiki-sima mu tọ-sakị la ḅẹ? Yẹrị ini ogbo-ḅio ḅụ mịẹ tẹ ḅụụ-gbiripuma elekima mamgba ḅụ sọ, mu tọ-sakị la tẹrẹmẹ mịna atomi ma ì minini ḅẹ? 12Àrị ama gbaịn obi kẹ in fomu, tẹ ịn ḅaa fama ḅa, anịsakị arị ị́ ḅụụ ḅụ gburo-gburo pịkị kụrọ nyanatẹ ḍụḅa ịn nẹngị gbọrụ opu sịẹ pakama ḅa.”

13 # Pks 32.11-14 Kụma Mozizi nwẹnị KỊNỊNYANAḄỌ ḅe ḅẹẹ, “Anị sakị mẹ ḅụ Ijiputi-ḅẹ-apụ ma anị naa ḅa, kẹ gotẹ ọkọ ḅẹẹarị, ị́ nyana kụrọ ḅụ mie ị́ mịna atomi ma ọkị-ḅo ye; 14anịsakị ịn ḍuko mị ama mẹ nyana apụ ma pịrị ḅa. Ịn naa tẹ mịnẹ Yei KỊNỊNYANAḄỌ ị́yẹrị mịna atomi ma ogbo-ḅio emi, kẹ gotẹ ọkọ ḅẹẹarị, Yei KỊNỊNYANAḄỌ, ị́yẹrị tọrụ kẹ ini na dama-dama tẹ ẹrịya tẹ, tẹ í oḅuto ini ọgọnọ-jụ ḅụ sịẹsimem, tẹ eneḅaka ḅụ ị́yẹrị oḅuto kpo ḅio ịn kẹ tọrọkọ-tarịm, anịsakị ḍin ḅụ kọrị-fịnị. 15Mịọkụ, ị́yẹrị nwẹnị gbọrụ tomḅọ ḅaa ḅara kẹ mịna atomi ma ḅaa, ḅaa, anịrẹ opu asịẹ ma tẹ ị́ ereso mẹ naa tẹ apụ ma ḅẹẹ ḅa, 16‘KỊNỊNYANAḄỌ ḅe ḅarị inetẹ mịna atomi ma ọkị-ḅo ama mẹ tẹ ọ̀ kẹ ịn pịrị ḅẹ ye karị ḅara kẹ ḍuko ama mẹ lama-a ẹrẹsị; anịẹrẹsị ori ịn ḅaa tẹ ịkpa mẹ ḅio. 17Anịsakị mịọkụ arị ị́ tẹkẹm, yee KỊNỊNYANAḄỌ ḅe kụrọ mẹ gburo-gburo sime, ị́ wẹrịtẹ minini tẹ ḅara tẹ ḅẹẹm, 18#Pks 20.5,6; 34.6,7; Dit 5.9,10; 7.9,10KỊNỊNYANAḄỌ ḅe ọ̀ nwana-nwanama ịganị ịganị-a, tẹ jike-a ḅẹlẹma ọ̀ ḅụụ emi, tẹ mịẹ-irima na oloko kan na wẹrịsoarị. Kụma ò gotẹ ḅẹrẹ-ḅarasii-ḅọ mẹ wẹrịso ḅẹ ye ofori, tẹ ḍapụ-na-iyingiapụ-na mịẹ asi ma gotẹ fomu-ḅara kẹ ịna awọmẹ na, taa-awọmẹ na, ile-awọmẹ na ọgọnọ gbanarị.’ 19Mịna atomi ma mịẹ-irima mẹ wẹrịsoo, arị ị́ tẹkẹm, í jike-a ḅẹlẹma mẹ wẹrịtẹ gburo-gburo la ḅara na, ị́ wẹrịtẹ si-wẹrịso mịna apụ ma pịrị la ḅara na ḅụ Ijiputi ḅụ so ọkị nwenii ḅo mịọkụ la.”

20Anịtẹso KỊNỊNYANAḄỌ ḅe nwẹnị ḅẹẹ, “ị́ ẹkwẹn-ḅịḅị mẹ wẹrịtẹ sime-ḅara ḅụ, à wẹrịso tẹ. 21#Hib 3.18Kụma tụkụma ḅara ḅụ, à ḍumo-sime wararị ogbo tẹ KỊNỊNYANAḄỌ ḅe ebube tomikiri mẹmgba ḅin ḅarị ḅara ḅụ, 22tomi ma tẹ ì ebube mẹ na, ị̀ elekima ma tẹ arị Ijiputi ḅụ na, ịkpa mẹ ḅio na kọrị aị ma ẹrị, tẹ anịsọ mịna oyi asakị ma kẹ ị̀ daaḍiki, tẹ ị̀ pọkọ poki tẹ mịẹ-a apụ ma ḅẹ gbọrụḅọ sọ, 23ama mẹ tẹ à kẹ ịna aḍapụ pịrị ḅẹ tẹ ye karị ḅara kẹ ḍuko ama mẹ ẹrị ḅẹ ḅọ ofori anịsakị inima tẹ ì ḍiki-sima apụ ma ḅụ gbọrụḅọ sọ anị ẹrị ḅịa. 24#Jọs 14.9-12Kụma ị̀ fịrịmẹnjịḅọ Kẹlẹbụ, ọ̀ sụa tẹmẹ kịrịm, tẹ ḅintẹ ḅara kẹ ì ḍukamẹnjịm ẹrẹsị, arị ori ọkị-ḅo ama mẹ ḅio suu ḅa, ama mẹ tẹ ọ̀ sọ-mu ama mẹ, anịsakị ọ̀ ḅụụ ḅụ paka-ḅo apụ anị nyana ḅa. 25Mịọkụ, Amalẹkị ḅẹ apụ ma na, Kenanị ḅẹ apụ ma na tụndụ ogboku ma ḅụ angarị nwẹn ḅẹẹ sakị, ene-ḅaa ḅụ ó vuunma pịkị tẹ mẹnjị Awụ Tọrụ mẹ muarị etela mẹ ḅụ ọ́ saakị mẹnjị ịkpa mẹ muu.”

KỊNỊNYANAḄỌ Ḅe Tomi Ma Ịna Ḅụụ-ḅẹlẹ-a Ye Ḍuko Ye Gotẹ Fomu-ḅara Kẹ Ịn Pịrịm

26KỊNỊNYANAḄỌ ḅe nwẹnị Mozizi na, Erọnị na ḅẹẹ, 27“Mie si-sịḅịḅio-sụa tomina-ogbo sime tẹ mbụrụmbụrụ ị̀ pịrị mu tọ sakị la ḅẹ? Izirẹlịapụ ma kọn-arị mbụrụmbụrụ ma à nwẹn naa tẹ, arị mbụrụmbụrụ ma tẹ ịn kọn ị̀ pịrị aị ma. 28Ḍuko ịn pịrị yẹrị mẹẹ: ‘à ḍumo-sime wararị ogbo, à naarị ḅara tẹ in ḍuko ye mẹ anie à kẹ ịn mịẹ ḅarị ye: 29#Hib 3.17ọmịna fịtẹ oju akpakpa ma mị ịkpa mẹ ḅio ḅịkị sara ḅa; anịsakị kịẹn-ḅịḅị ḅụ ọ́ la ḅara mamgba ḅụ, kịẹn mu si kụra sịḅị ḅụ ḅọrọtẹ apụ ḅụ saakị iwo tẹ mbụrụmbụrụ ị̀ pịrị apụ ma ḅụ, 30Kẹlẹbụ, Jefune owiḅọtụḅọ ḅe na, Nọnị owiḅọtụḅọ Jọsụwa ḅe na sikima, kpọkpọ gbọrụḅọ-sọ ama mẹ tẹ à ye karị ḅara kẹ ḅẹẹm àrị ọ́ mịẹtẹ ó ḅo anga ḅa nwẹn ḅẹẹ anga mẹ sọ-ḅo ḅịa. 31Kụma àrị ọmịna ḍọkọḍọkọ-awọmẹ ma tẹ ọ́ ḅẹẹm ḅo kun pẹị, pẹị anama sọ ḅa nwẹn ḅẹẹ apụ ma ọkị-ḅo ama mẹ tẹ ó ḍiki-sima ama mẹ ḅio suu tẹ ini anị nimi ḅa. 32Kụma ọmịnị kụma, ọmịna fịtẹ oju akpakpa ma mị ịkpa mẹ ḅio ḅịkị sara ḅa. 33#Fịr 7.36Anịsakị ọmịna awọmẹ ma ịkpa mẹ ḅio kụra amesi kẹ anana ḍikiḍikiapụ sọ ḅa, tẹ ọ́ nyana-a minini gotẹ tọrụsiẹrị ḅa, nwenii ọmịna fịtẹ oju akpakpa ma ḅẹ kunoma ye ịkpa mẹ ḅio ḅịkị-koro ḅa. 34Ene ma tẹ ọ́ kẹ mu ama mẹ ẹnyẹ ene ma wẹrịtẹ la ḅara, ḍin amesi ma, gbọrụ ḍin gbọrụ kụra, gbọrụ kụra ọ́ nwẹn kẹ ọmịna mịẹ-irima mẹ dogi ḅa, anie kụra amesi, tẹ ọmịnị ị̀ ḅụụ-ḅẹlẹ-a ye mẹ nimi ḅa.’ 35Yẹrị KỊNỊNYANAḄỌ ḅe anị ḍuko tẹ; tụkụma ḅara ḅụ, miemẹ anie à kẹ mie si-sịḅịḅio-sụa tomina-ogbo mẹ tẹ kobiri gboloma tẹ ị̀ da-pakarị apụ mamgba mịẹ ḅarị ḅara; mị ịkpa mẹ ḅio mie ịn gbọrsịḅị ḅo kunoma tẹ ye, anịsakị anịjụ mie ịn fịị ḅarịye.”

36Anịsakị owiapụ ma, inima tẹ Mozizi fịrịma pakama mu ama mẹ ẹnyẹ, tẹ pịkịma-ḅo tẹ siye ọkị-ḅo ḍuko ama mẹ ẹngbẹsẹ tẹ tomina-ogbo mẹmgba mịẹtẹ ini mbụrụmbụrụ ọ̀ pịrị apụ ma, 37owiapụ ma tẹ ama mẹ ḅụ ḅẹ siye ọkị-ḅo ḍuko apụ ma KỊNỊNYANAḄỌ ḅe tọrọkọ ḅụ ini obi fomu-ḅara ḅụ fịịm. 38Kụma arị owiapụ ma tẹ paka-mu ama mẹ ẹnyẹ-apụ ma ḅụụ, Nọnị tụḅọ Jọsụwa na, Jefune tụḅọ Kẹlẹbụ na anie ye ḅụụ laa ḅara kẹ ḍumo-sime yee.

Ini Ḅẹ Tarị Sakị Kẹ Mu Ama Mẹ Gbaịn

(Dit 1.41-46)

39Mozizi mịna ẹkwẹn-aḅịḅị mamgba ḍuko Izirẹlịapụ ma pịrị famam, tẹ tomi ma gburo-gburo ḅara kẹ kururum. 40Ịn nwẹnị dede-funfun ḅụ saakị tẹ tụndụ ọgọnọ ḅẹ opu sịẹ mẹ ḅẹ gele yọ mẹ kpọlị iwo tẹ ḅẹẹ, “Ḍikii, wa mịanga emi, wa iwo mu ye-yọ mẹ tẹ KỊNỊNYANAḄỌ ḅe kẹ wa karịma tẹ yọ mẹ muarị, gbala wa si mịẹ tẹ ẹrẹsị.”

41Kụma Mozizi nwẹnị ḅẹẹ, “Ó tiegotẹ mịọkụ KỊNỊNYANAḄỌ ḅe tọn ye mẹ kan-arị? Kẹ gotẹ ọkọ ḅẹẹarị, aniemẹ iḅi ḅịa. 42Ọmịnị iwo mu ma, anieofori ọmịnị na fịya-a apụ tọrọkọ ịn ḅofa ó fomu, fomu gbin fama, gbala KỊNỊNYANAḄỌ ḅe ọmịna ogbo-ḅio ofori ẹrẹsị. 43Kẹ gotẹ ọkọ ḅẹẹarị, anịjụ mie Amalẹkị ḅẹ apụ ma na, Kenanị ḅẹ apụ ma na ọmịna tọrọkọ simearị ye, anịsakị ịna okologie ḅụ ọ́ ḅịkị fama ḅa, gbala KỊNỊNYANAḄỌ ḅe ḍukamẹnjị ḅụ ọ́ pịkị ọḅụ da tẹ. KỊNỊNYANAḄỌ ḅe ori ọmịnị na sime ḅịa.”

44Kụma ini ịna aḅụụ kẹ ini inetẹ mịẹ ḅẹ ḅara ọkị tẹ iwo tụndụ ọgọnọ ḅẹ opu sịẹ mẹ ḅẹ gele mẹ kpọlị ḅẹ ḅara mịẹm KỊNỊNYANAḄỌ ḅe Ọḅọkụ Igbe mẹ-o, Mozizi sọ ịn kobiri sime anga mẹ ḅụ mẹnjị paka-a ḅara ḅụ. 45Anịtẹso Amalẹkị ḅẹ apụ ma na, Kenanị ḅẹ apụ ma na tẹ anị tụndụ opu sịẹ mẹ ḅụ anga apụ ma nwẹnị ideri-ḅo tẹ ịn nẹngịma, tẹ ịn ḍuka ma-ḅo ịn kẹ Họma nwẹn-sịn anga sọ lam.

Currently Selected:

Kịẹn-aḅịḅị 14: KBTP

Highlight

Copy