Kịẹn-aḅịḅị 13

Ama Ẹnyẹ-apụ Ma

(Dit 1.19-33)

1KỊNỊNYANAḄỌ ḅe nwẹnị Mozizi ḅẹẹ, 2“Owiapụ fịrịmaa ịn mu Kenanị ama mẹ ẹnyẹm, tẹ ama mẹ tẹ à kẹ Izirẹlịapụ pịrị ama mẹ ḍikii ịna aḍapụ ma afuro ḅụ furo gbọrụ owiḅọ, gbọrụ owiḅọ ị́ nwẹn fịrịma ḅa, ọrụḅọ-ọrụḅọ mḅọ furo mẹ ḅẹ tọrọkọ-tarịḅọ.” 3Mie ḅụ Mozizi KỊNỊNYANAḄỌ ḅe tọn ḅara ḅụ Peranị ḅẹ ịkpa mẹ ḅio sime tẹ ịn fịrịma pakamam, inimgba owiapụ tẹ Izirẹlịapụ ma asịḅịdapụ. 4Anịsakị mịna ẹrẹ ma anie ịna ẹrẹ: Rubẹnị furo mẹ ḅụ, Samuha, Zakọ owiḅọtụḅọ ḅe; 5Simiyọnị furo mẹ ḅụ, Sẹfati, Ori owiḅọtụḅọ ḅe; 6Juda furo ḅụ, Kẹlẹbụ, Jefune owiḅọtụḅọ ḅe; 7Ịsaka furo ḅụ, Igalị, Josẹfụ owiḅọtụḅọ ḅe; 8Iferemu furo ḅụ, Hosiya, Nọnị owiḅọtụḅọ ḅe. 9Benijamịnị furo ḅụ, Paliti, Refu owiḅọtụḅọ ḅe 10Zẹbulọnị furo ḅụ, Gadiyẹlị, Sodi owiḅọtụḅọ ḅe; 11Josẹfụ furo anie Manasẹ furo ḅụ, Gadi, Susi owiḅọtụḅọ ḅe; 12Danị furo ḅụ, Amịyẹlị, Gẹmali owiḅọtụḅọ ḅe 13Asa furo ḅụ, Sitọ, Mayịkẹlị owiḅọtụḅọ ḅe; 14Nafutali furo ḅụ, Nabi, Vofisi owiḅọtụḅọ ḅe 15Gadi furo ḅụ, Gẹhuyẹlị, Maki owiḅọtụḅọ ḅe. 16Mịna ẹrẹ ma anie owiapụ ma tẹ Mozizi fịrịma pakamam mu ama mẹ ẹnyẹ nwẹn ḅẹẹ owiapụ ma ẹrẹ. Mozizi nwẹnị Nọnị owiḅọtụḅọ Hosiya mẹ ḍima tẹ Jọsụwa kẹ ọ̀ sịn.

17Mozizi ịn fịrịma pakamam ịn mu Kenanị ama mẹ ẹnyẹ tẹso, ọ̀ nwẹnị ịn ḅẹẹ, “Ó muu, tẹ iwo mu Kenanị suku-jụ laa, tẹ ọgọnọ-jụ ḅụ iwo tụndụ sịẹ mẹ muu, 18tẹ ama mẹ sime-ḅara ẹrịị, tomi ma tẹ anị yọ ḅụ angarị apụ ma ini ịnyọ nyana na, ini ịnyọ nyana-a na; ịn boowa ḅoto, anịanịa ini tọnwa apụ ḅoto; 19ama mẹ tẹ ini angarị ama ḅio iḅim, anịanịa, siinm; pịkị opu ama ma tẹ ini angarị anga ma finjitẹ tomi warị nama-nama tẹ angarị, anịanịa onu gbori-ikelema wararị kụrọtẹ ḅụụ ḅọị anga ḅoto; 20ama mẹ ḅẹ kiri mẹ iḅi tẹ iḅiọkụ fịye pakama ḅara sime na, sime-a na; sịn emi na, sịn ofori na. Ọmịnị iḅi ḅiokpọ nyana tẹ ama mẹ ḅio ḅẹ sịnmgbọlụ ọkị-ḅoo.” Mị sakị mẹ anie girepu nwẹn-sịn asịnmgbọlụ ma kụra mẹ ḅụ tarị ḅịya-ḅịya sakị.

21Mie ḅụ ini iwo mu tẹ ama mẹ ẹnyẹm Zini ḅẹ ịkpa mẹ ḅụ ọkị mu Rehobu ḅụ mẹnjị Ematị muarị anga mẹ kpeki la. 22Ịn tarị-tarị mẹnjị mu Kenanị suku-jụ lam, tẹ anịjụ ḅọrọ Hẹbụrọnị lam. Hẹbụrọnị ḅụ simearị apụ anie Anakị ḅẹ nonji-atomi ma: Ahimanị na, Sesahị na Talịmayị na — Hẹbụrọnị paka tẹ sọnọma akụra ḅọrọ tẹrẹmẹ Ijiputi ḅụ Zohanị pakam. 23Tẹ in ḅo Ẹsịkọlị ḅẹ Tụndụ Ogboku lam, tẹ anịjụ gbọrụ lịkalị ngẹrị sụa wararị girepu nwẹn-sịn sịnmgbọlụ mẹ ḅẹ gbọrụ ịkpangị pẹlẹ koromam, tẹ gbọrụ nangwọtẹ sịn ikiḅa ọgọnọ ḅụ ini maa apụ anị dogi tẹ anị ịna ogboku emi, ini omburo na, ịla na sọ ọkị-ḅom. 24Anị ye-yọ mẹ ini anị sịnm Ẹsịkọlị ḅẹ Tụndụ Ogboku, anị yọ ḅụ ịn lịkalị mẹ tẹ owiapụ ma pẹlẹ ye mẹ pẹlẹm ẹrẹsị.

25Ḍin amesi ḅọrọ tẹso, ini ama mẹ ẹnyẹ mẹ ḅụ pịkịma-ḅom. 26Ịn nwẹnị Mozizi na, Erọnị na, Izirẹlịapụ ma tomina-ogbo mẹmgba ḍọkụma-ḅo Kadẹsị ḅụ Peranị ḅẹ ịkpa mẹ ḅio; ịn ḅịḅị da ḅo ḍuko ini na, tomina-ogbo mẹmgba na pịrịm, tẹ ama mẹ ḅẹ sịnmgbọlụ mẹ kẹ ịn ḍiem. 27Ịn nwẹnị ḍuko Mozizi pịrị, “Ama mẹ tẹ ị́ wa kẹ fịrịma ama mẹ wa mum, tẹ ẹrịm ye-yọ mẹ anie ḅụụ-ḅẹlẹmatẹ iḅiọkụma fịye so-pakamarị amakiri, anịsakị mie anị ḅẹ asịnmgbọlụ. 28Kụma tomi ma tẹ ama mẹ ḅio angarị apụ ma ini ịnyọ nyana wararị, anịsakị opu ama ma ḍụḅa-ḍụḅa lama wararị, tẹ ini ọmụ-aị kẹ arị mịẹ-mịẹ kụrọma wararị. Arị aị ma sikima, wa pịkị Anakị ḅụụ ḅụ paka-ḅo ḍụḅa-ḍụḅa tomi nẹngị-nẹngịtẹ nonji-atomi ma sọ ẹrịm anịanga. 29Amalẹkị ḅẹ apụ ma Kenanị suku-jụ mẹ ḅio angam; Hitahiti apụ ma na, Jebusayịtị apụ ma na, Amọrayịtị apụ ma na tụndụ ọgọnọ ḅe sịẹ mẹ ḅio angam; anịsakị Kenanị ḅẹ apụ ma Mẹdịterenanị Opu Tọrụ mẹ akaka ḅụ na Jodanị Tọrụ mẹ na ḅụ angam.”

30Kụma Mozizi tọrọkọ ḅụ Kẹlẹbụ nwẹnị tomi ma mịẹtẹ ịn yaụ-sime, tẹ ọ̀ nwẹnị ḅẹẹ, “Ó yee wa gbọrsịḅị mu tẹ anị ọkị tẹ anga; kẹ gotẹ ọkọ ḅẹẹarị, wa ịnyọ nyana tẹ inetẹ anị nẹngịma ḅa.”

31Kụma tomi ma tẹ ori na mu apụ ma nwẹnị ḅẹẹ, “Wa ịnyọ nyana tẹ iwo mu tomi ma na owu sọ ḅịa; kẹ gotẹ ọkọ ḅẹẹarị, ịn kụrọ wa nẹngịm.” 32Mie ḅụ ịn nwẹnị ama mẹ tẹ ịn mu ẹnyẹ ye mẹ ḅụ siye dogi-ḅo ḍuko Izirẹlịapụ ma pịrị tẹ ḅẹẹ, “Ama mẹ tẹ wa ẹnyẹ tolu-ḅọrọ ama mẹ anie anị ḅio angarị apụ gulugulumarị ama; anịsakị tomi tẹ wa anị ḅio ẹrị apụ gburo-gburotẹ opu atomi. 33#Suk 6.4Anịjụ wa ịn kẹ Nẹfilimu sịn-arị apụ, anie Anakị owiapụ-awọmẹ tẹ gele-na-ḍụḅa-na tẹ apụ ẹrịm. Wa wamịna-aḅụụ ḍiki tẹ kẹ ini na tọnma sakị, wa ịkpakpa kịkam ịna aḅụụ. Anị ḅara anie ini sọ kẹ wa ẹrị ọkụ.”

Currently Selected:

Kịẹn-aḅịḅị 13: KBTP

Highlight

Copy