Kịẹn-aḅịḅị 12
12
Mirihamụ Fomu-ḅara Da Tẹ
1Mirihamụ na, Erọnị na, Mozizi na tụḅụrụ ẹkwẹn kọn ọ̀ pịrịm Kusi ḅẹ ẹrẹḅọ arị ma tẹ ò sime tẹ ḅọ ma ẹrẹsị, gbala ò Kusi ḅẹ ẹrẹḅọ na sime tẹ gotẹ; 2tẹ ịn nwẹnị ḅẹẹ, “KỊNỊNYANAḄỌ ḅe karakarama tẹ Mozizi ngẹrị-ngẹrị ḅụụ ḅụ mie ọ̀ ḅọrọ tẹ ẹkwẹn kọn tẹ ye? Wamịna aḅụụ sọ ọ̀ ḅarị ḅọrọ tẹ ẹkwẹn kọn-a?” KỊNỊNYANAḄỌ ḅe nwẹnị anị naa. 3Mịọkụ, Mozizi nwẹn sin owiḅọ ḅe anie dein lamatẹ tomḅọ, dein owiapụ mamgba tẹ tomikiri tọrụ mẹ ḅụ sime owiapụ mamgba nẹngị ḅọ.
4Bẹkẹ-ḅara-ḅụ, KỊNỊNYANAḄỌ ḅe nwẹnị Mozizi na, Erọnị na, Mirihamụ na ḅẹẹ, “Ọmịnị tẹra apụ ma ọ́ paka Kobiri Akpụrụ-warị mẹ ḅoo.” Tẹ ini tẹra apụ ma paka-ḅom. 5KỊNỊNYANAḄỌ ḅe nwẹnị oḅuto kpo ḅio tuuideri ḅo, tẹ Akpụrụ-warị mẹ ḅọkọ ḅụ sịẹsime, tẹ Erọnị na, Mirihamụ na sịn; ini maa apụ ma nwẹnị mẹnjị tọrọkọ ḅo. 6Ọ̀ nwẹnị ḅẹẹ, “Ọmịnị ị̀ ẹkwẹn-aḅịḅị naa, ọmịna ogbo-ḅio ịkịankoroḅọ emi-emii, Yẹrị KỊNỊNYANAḄỌ ḅe ịkịan ẹrị ḅara ḅụ, ị̀ mịẹfinji mḅọ pịrị tẹ mḅọ ì nimim, ḍawọ-jụ ḅụ arị mḅọ na ẹkwẹnm. 7#Hib 3.2Ị̀ fịrịmẹnjịḅọ Mozizi ḅụ anị ọkọ sime-a; ì bebe warị mẹmgba à kẹ ọ̀ ḅara sụam. 8Àrị ori na ḅịḅị kẹ dama-dama tẹ ẹkwẹnm, giregire ḅara ḅụ, sịḅịḅio pikirima gbaịntẹ ẹkwẹn ḅara ḅụ-a; anịsakị ọ̀ pịkị KỊNỊNYANAḄỌ ḅe simearị ḅara ḍikim. Ó tiegotẹ anịtẹrẹmẹ ḅalafa-a ẹkwẹn tụḅụrụma ị̀ fịrịmẹnjịḅọ Mozizi pịrị ḅụ?”
9KỊNỊNYANAḄỌ ḅe ịganị mẹ kẹngẹma ịn da-pakam tẹ ò som; 10tẹ oḅuto mẹ Akpụrụ-warị mẹ ọgọnọ-jụ so tẹso, Mirihamụ oju ḅụ sofịnị-obi paka tẹ arị eene-mgbọ pịna ḅara kẹ peema ḅịyam. Erọnị tọrụ-pịkị Mirihamụ ḍiki tẹ ẹrịm sofịnị-obi árị oju paka tẹso, 11ọ̀ nwẹnị Mozizi ḅẹẹ, “Paa-sisi, ị̀ nyanaḅọ, wa oḅori-sọ ḅara kẹ si mịẹ tẹ ẹrẹsị fomu-ḅara kẹ wa pịrị ma. 12Yee á fịtẹ ḅọ sime-ḅara sime ma, anị ḅọ mẹ tẹ mḅọ amịna iyingiḅọ furo ḅio paka-ḅo sakị meni mẹ ḅẹ gbọrụ pakịrị fịtẹ ḅọ ḅara sime mẹ.”
13Mozizi nwẹnị owu KỊNỊNYANAḄỌ ḅe pịrị, “yei Tamụnọ, arị ị́ tẹkẹm, á gwọọ.”
14 #
Kịẹ 5.2,3 Kụma KỊNỊNYANAḄỌ ḅe nwẹnị Mozizi ḅẹẹ; “Á ḍa nwẹnị fịla kẹ á tọrụkuḅu sara kụma, á sọnọma aḍin kẹ anị ḅẹ ḅụụ-jịrị nyana ḅịa? Yee á sọnọma aḍin kẹ kobiri-ogbo mẹ ḅio paka tẹ ịkasị tẹ sime, anịsakị aniemẹ ḅọrọ sakị, ọ́ pịkị inetẹ sin arị ọkị-ḅo suu ḅa.” 15Mie ḅụ ịn Mirihamụ pakamam kobiri-ogbo mẹ ḅio tẹ sọnọma aḍin kẹ arị ịkasị tẹ simem; tẹ tomi ma saakị mẹnjị-a nwenii ịn sin Mirihamụ ọkị-ḅo suum. 16Anie mẹ ḅọrọ tẹso, tomi ma Azirọtị ḅụ saakị mẹnjịm, tẹ mu Peranị ḅẹ ịkpa mẹ ḅio akpụrụ-warị pike tẹ kobiri simem.
Currently Selected:
Kịẹn-aḅịḅị 12: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
