Kịẹn-aḅịḅị 15

Agbamịẹ Gboloma Oloko Ma

1KỊNỊNYANAḄỌ ḅe nwẹnị Mozizi ḅẹẹ: 2Izirẹlịapụ ma ḅẹẹ, “Ọ́ sọ ḅo ama mẹ tẹ à kẹ ọ́ pịrị tẹ ọmịnị anga ḅẹ ama mẹ la sakị, 3tẹ ọmịnị ọmịna opu anama ogbo, anịanịa anana na oḅori na ogbo ḅụ agbamịẹye ọkị-ḅo tẹ kẹ ịlọ suma, anịanịa tọn ḅụụ pịrị agba, anịanịa ọ́ tọn tẹ sakị, sakị ḅụ fịarị alalị ma ḅẹ fịnị ḅụ mịẹ agba, anịanịa dọkịma-agba, anịanịa agba mịẹ KỊNỊNYANAḄỌ ḅe pịrị tẹ kẹ KỊNỊNYANAḄỌ ḅe ḅụụ-ḅẹlẹarị kụnụ agba mịẹ ḅẹ sakị, 4anị sakị ḅụ ori ḅe tẹ amịna agbamịẹye ọkị-ḅo ḅọ ḅe olivu pulo karama ikiḅa pembeye kẹ pikiritẹ iḅiọkụ gbẹẹtẹ iḅi fịlawa akpa pembeye kẹ oyia akiri ḍiya ḅẹ gbọrụ kiri kẹ mgbọlụ agba mịẹ KỊNỊNYANAḄỌ ḅe pịrị ḅa, 5na kẹ iru agba mịẹ ḅẹ iru karama ikiḅa na. Ó mie mẹ tẹlẹma ḅa dọkịma-agba, anịanịa agba mịẹ ḅẹ gbọrụ anana, anịanịa gbọrụ oḅori sịḅị goyegoye ḅụ. 6Gbọrụ ejimina kẹ agba mịẹ ḅụ ọ́ kẹ mgbọlị agba mịẹ ḅẹ tẹlẹma ḅarịye anie olivu pulo maa akarama kẹ tẹra kiri ḍie ḅẹ gbọrụ kiri kẹ pikiritẹ iḅiọkụ gbẹẹtẹ iḅi fịlawa akpa kẹ oyia akiri ḍie ḅẹ maa akiri; 7anịsakị kẹ iru agba mịẹ ḅẹ ye anie iru maa akarama kẹ tẹra kiri ḍie ḅẹ gbọrụ kiri; anie KỊNỊNYANAḄỌ ḅe ḅụụ-ḅẹlẹarị kụnụ. 8Ọmịnị owi-nambulo tẹlẹma tẹ kẹ dọkịma-agba, anịanịa agba, anịanịa ịlọ suma agba, anịanịa dein agba mịẹ KỊNỊNYANAḄỌ ḅe pịrị ḅẹ sakị, 9anị sakị gbọrụḅọ kẹ owi-nambulo ḅe na sụa mgbọlụ agba mịẹ ḅarịye anie olivu pulo gbọrụ karama kẹ pikiritẹ iḅiọkụ gbẹẹtẹ iḅi fịlawa akpa kẹ oyia akiri ḍiya ḅẹ tẹra kiri, 10anịsakị ọ́ kẹ iru agba mịẹ ḅarịye anie iru gbọrụ karama, fịnị kẹ mịẹ agba ḅara ḅụ, KỊNỊNYANAḄỌ ḅe ḅụụ-ḅẹlẹarị kụnụ.”

11“Mị-ḅara mẹ mie anị mịẹ owi-nambulo sịḅị-sịḅị, anịanịa ejimina sịḅị-sịḅị, anịanịa anana sịḅị-sịḅị, anịanịa oḅori sịḅị-sịḅị pịrị ḅarị ḅara. 12Nama ma tẹ ọ́ tẹlẹma aị ma kịẹn-ḅịḅị wẹrịtẹ la ḅara, mie ọ́ pịkị ịna kịẹn-ḅịḅị ḅụ gberie-gberie mịẹ ḅarị ḅara. 13Ama-kuḅu ḅẹ apụ nwẹn ḅẹẹ apụ mamgba mị ḅara kẹ mịna aị ma mịẹ ḅa, fịnị ḅụ agba mịẹ ḅụ KỊNỊNYANAḄỌ ḅe ḅụụ-ḅẹlẹarị kụnụ agba mịẹ ḅụ 14Igoniḅọ ọmịnị na emi tẹ angarị, anịanịa, ọmịna ogbo-ḅio kịnị emi, tẹ ḅụọ-fa-ḅụọ-paka ọmịnị na emi, tẹ mḅọ fịnị ḅụ mịẹ KỊNỊNYANAḄỌ ḅe pịrịarị kụnụ agba mẹ mịẹ ḅẹ ḅii lamarị ḅẹḅẹ, ọ́ mịẹ ḅara mḅọ nwẹn mịẹ ḅa. 15Kẹ gotẹ ọkọ ḅẹẹarị, kẹẹ-koro wararị gbọrụ oloko mie sime kobiri-ogbo mẹ anie ọmịnị ịna, igoniḅọ mẹ tẹ ọmịnị na angarị ḅọ mẹ pịrị ḅarịye, sime mu ḅẹẹ-sakị ḅẹẹ-sakị, ḅụọ-fa-ḅụọ-paka la ḅarị kẹẹ-koro wararị oloko; ọmịnị KỊNỊNYANAḄỌ ḅe tọrọkọ sime-ḅara, anie igoni kẹ ḅo bịan ḅọ mẹ sọ sime ḅarị ḅara. 16#Lẹv 24.22Gbọrụ oloko na, kụrọ ḅara-ḅio simearị ḅọ ḅe tọn gbọrụ ye mẹ na sime ọmịnị na igoniḅọ mẹ tẹ ọmịnị na angarị ḅọ mẹ na pịrị ḅa.”

17KỊNỊNYANAḄỌ ḅe nwẹnị Mozizi ḅẹẹ: 18Izirẹlịapụ ma ḅẹẹ, “Ó ḅo ama mẹ tẹ à gotẹ ọmịnị ọkị-ḅo ama mẹ ḅio sọ tẹso, 19tẹ ama mẹ ḅẹ fịye mẹ fị, tẹ agbamịẹye kẹ ḅo KỊNỊNYANAḄỌ ḅe pịrị ḅẹ sakị; 20ịwọma ọ́ tarị ọkị-ḅo tẹ tẹlẹma tẹ fị ḅarị fịye ḅụ ọ́ kịkị mịẹ tẹ kẹ agba mịẹ KỊNỊNYANAḄỌ ḅe pịrị ḅa; mgbọlị sẹlẹ kiri mẹ ḅẹ agbamịẹye ḅara mie ọmịnị anị kẹ agba mịẹ ḅarịye. 21Ọmịna ḅụ ḅụọ-fa-ḅụọ-paka ọmịna tarị ịwọ fịye ḅụ ọmịnị agbamịẹye kẹ agba mịẹ KỊNỊNYANAḄỌ ḅe pịrị ḅa.”

22“Kụma ọ́ nwẹnị nimi tẹ mịẹ-a ḅara ḅụ mịna tọn-aị mamgba tẹ KỊNỊNYANAḄỌ ḅẹ ḍuko Mozizi pịrị tẹ aị ma kẹ elekima sụa-a ḅẹḅẹ, 23arị aị mamgba tẹ KỊNỊNYANAḄỌ ḅe Mozizi ḅụ ḅọrọtẹ tọn ọ́ pịrị aị ma anị ene mẹ tẹ KỊNỊNYANAḄỌ ḅe saakị tọn ene mẹ ḅụ mu ọmịna ḅụ ḅụọ-fa-ḅụọ-paka la; 24anị sakị ḅụ nimi tẹ mịẹ-a ḅara ḅụ, tomina-ogbo mẹ nimi-a ḅara ḅụ, tomina-ogbo mẹ nimi-a ḅara kẹ mie mẹ mịẹm ḅẹḅẹ, tomina-ogbo mẹmgba asambịrịma gbọrụ owi-nambulo kẹ dọkịma-agba mịẹ ḅa, KỊNỊNYANAḄỌ ḅe ḅụụ-ḅẹlẹarị kụnụ, anị ḅẹ mgbọlụ agba (anịanịa fịye agba) na, anị ḅẹ iru agba na kẹ anị ḅụ sụa, kụrọ ḅara-ḅio simearị ḅọ ḅe wẹrịtẹ tọn ḅara ḅụ, tẹ pịkị gbọrụ oḅori kẹ si sin agba mịẹ ḅa. 25Anịsakị agbamịẹḅọ ḅe nwẹnị si-wẹrịso pịrị ḅẹrẹ fama Izirẹlị ḅẹ tomina-ogbo mẹmgba pịrị ḅa; tẹ ịn si-wẹrịso pịrị nyana ḅa; gbala miemẹ anie nimi-a ḅara ḅụ mịẹ tọkọrọma ye, tẹ ịn pịkị ịna agbamịẹye ọkị-ḅo tẹ, fịnị ḅụ KỊNỊNYANAḄỌ ḅe tọrọkọ ḅụ mịẹ agba, na pịkị ịn nimi-a ḅara ḅụ mịẹ tọkọrọma ye mẹ gotẹ KỊNỊNYANAḄỌ ḅe tọrọkọ si sin agba mịẹ tẹ ẹrẹsị. 26Izirẹlị ḅẹ tomina-ogbo mẹmgba si-wẹrịso pịrị nyana ḅa, igoniḅọ ḅe tẹ ịna ogbo-ḅio simearị ḅọ ḅe sọ; gbala bebe ama mẹ ḅio sime apụ mamgba mịẹ tọkọrọma mẹ ḅio sọm ẹrẹsị.”

27 # Lẹv 4.27-31 “Gbọrụ tomḅọ nwẹnị nimi-a ḅara ḅụ si mịẹ-mịẹ, mḅọ gbọrụ ịyọrọ oḅori kẹ si sin agba mịẹ ḅa. 28Anịsakị agbamịẹḅọ ḅe nwẹnị KỊNỊNYANAḄỌ ḅe tọrọkọ si-wẹrịso pịrị ḅẹrẹ fama anị tomḅọ mẹ tẹ nimi-a ḅara ḅụ mịẹ tọkọrọma ḅọ mẹ pịrị ḅa; mḅọ nimi tẹ mịẹ-a nwẹn ḅẹẹ sakị, si wẹrịso pịrị ḅẹrẹ fama mḅọ pịrị, tẹ mḅọ si-wẹrịso pịrị nyana ḅa. 29Izirẹlị ḅẹ ama ma ama-kuḅu mẹ ḅẹ ḅọ na, igoniḅọ tẹ ịna ogbo-ḅio angarị ḅọ na tẹ nimi-a ḅara ḅụ ḅẹẹye-ḅẹẹye mịẹ tọkọrọma ḅọ tọkọrọma ḅọ gbọrụ oloko mie sime ọ́ pịrị ḅarịye.”

30“Kụma tomḅọ tẹ nimi tẹ opu amịẹaị mịẹ ḅara kẹ ḅẹẹye-ḅẹẹye mịẹ ḅọ, mịẹ ḅọ, mḅọ ḅọrọ ama-kuḅu ḅẹ ḅọ-o, igoniḅọ-o, mḅọ KỊNỊNYANAḄỌ ḅe kẹ inene sịịnm, anịsakị anị tomḅọ mẹ, mḅọ atomi ogbo-ḅio ḅụ ini mḅọ pẹlẹ-siin ḅa. 31Gbala mḅọ KỊNỊNYANAḄỌ ḅe ẹkwẹn-ḅịḅị mẹ ḍiki-sima tẹ, tẹ ọ̀ tọn ye mẹ kan tẹ; anị tomḅọ mẹ ịn gbọrsịḅị mḅọ pẹlẹ-siin ḅa, anịsakị mḅọ mịẹ-irima mḅọ ọgọnọ sime ḅa.”

Ịnyọsara-Ene Mẹ Kan Owiḅọ Ḅe

32Izirẹlịapụ ma ịkpa mẹ ḅio simearị ogbo ịn nwẹnị Ịnyọsara-Ene mẹ ḅụ fịnị kọn-arị gbọrụ owiḅọ ḍọkị-ẹrị. 33Inima tẹ ọ̀ fịnị mẹ kọn-arị tẹ ọ̀ ḍọkị-ẹrị apụ ma nwẹnị ori ọkị-ḅo Mozizi na, Erọnị na, tomina-ogbo mẹmgba na pịrị. 34Ịn nwẹnị ọ̀ kẹ kịnị kun ịkasị anga ḅụ wẹrị, gbala kẹ ọ̀ mịẹ na-iḅi ye amụ paka-ḅo giregire-a ẹrẹsị. 35KỊNỊNYANAḄỌ ḅe nwẹnị Mozizi ḅẹẹ, “Owiḅọ ḅe ọmịnị ọ̀ ḅaa ḅa; kobiri-ogbo mẹ ḅio ọmịnị ọ̀ pakama etela-ogbo ḅo ḅa, tẹ tomina-ogbo mẹmgba ḍụḅarị kẹ ọ̀ gbin ḅa.” 36Tẹ tomina-ogbo mẹ kobiri-ogbo mẹ ḅio ọ̀ pakama etela-ogbo ḅo, tẹ KỊNỊNYANAḄỌ ḅe wẹrịtẹ tọn Mozizi pịrị ḅara ḅụ ḍụḅarị kẹ ò gbin ḅaam.

Ịsaram Gboloma Oloko Ma

37KỊNỊNYANAḄỌ ḅe nwẹnị Mozizi ḅẹẹ: 38#Dit 22.12Ẹkwẹn Izirẹlịapụ ma pịrịị, ini ịsaram kẹ ịna akapa ma ḅẹ asuku na akaka na ḅụ sụa, ịna aḅụọ ma ḅụ ọkị mu ḅụọ-fa-ḅụọ-paka la. In bulo-bulo ḍigi kẹ akaka ḅụ simearị ịsaram ma pono-pono kpọọ-kpọ gbolomaa; 39anịsakị arị nwẹnị ọmịnị ẹrị tẹ KỊNỊNYANAḄỌ ḅe tọn ọ́ pịrị aị mamgba kẹ ḅiokoroma tẹ arị mịẹ ḅẹ ịsaram sọ ọ́ pịrị ḅa, tẹ ḅarị ye kẹ ḅiokoroma-a ḅara kẹ ọmịna aḅioḅẹngbọ tọn-ye tọn-ye na, ọ́ tọrụngbọ kẹ ẹrị-ye ẹrị-ye sọlịma tẹ arị ḍukamẹnjị ḅịa. 40Mie ḅụ ọmịnị à tọn aị mamgba kẹ ḅiokoroma tẹ arị mịẹ ḅa, tẹ fịafịa sime ọmịna Tamụnọ pịrị ḅa. 41Yẹrị anie KỊNỊNYANAḄỌ ọmịna Tamụnọ ḅe tẹ Ijiputi ama mẹ ḅio ọ́ pakama-ḅo ḅọ ḅee, ọmịna Tamụnọ sọ ḅẹ ḅara ḅụ. Yẹrị anie KỊNỊNYANAḄỌ ọmịna Tamụnọ ḅee.

Currently Selected:

Kịẹn-aḅịḅị 15: KBTP

Highlight

Copy