Kịẹn-aḅịḅị 16

Kora Na, Detanị Na Abiramu Na Sịḅị-kụrọ Mẹ

1 # Jud 1.11 Mịọkụ Livayị owiḅọtụḅọ Kohatị, Owiḅọtụḅọ Iza, owiḅọtụḅọ Kora ḅe na, Detanị na Abiramu na Rubẹnịye Ẹlịyabụ owiapụ-awọmẹ ma na, pịkị Rubẹnịye Pẹlẹti owiḅọtụḅọ Ọnị ḅe na, 2nwẹnị owiapụ ọkị; tẹ Izirẹlịapụ ma kịẹn-ḅịḅị ḅụ tomina-ogbo mẹ ḅẹ tọrọkọ-tarịapụ ma ḅụ kobiri-ogbo mẹ iḅiọkụ nimi lamatẹ kịnị oyia asi, mesi oyi finji sẹlẹ-ọkị ịna aḅụụ sụa, tẹ nwẹnị Mozizi tọrọkọ virikama saakị 3tẹ ịna aḅụụ kobiri gboloma tẹ Mozizi da-paka, pịkị Erọnị na tụḅụrụ tẹ ịn ḅẹẹ, “Ó mu anga ala ḅaka tẹ! Kẹ gotẹ ọkọ ḅẹẹarị, tomina-ogbo mẹ ḅio simearị ḅọ goḅọ-goḅọ, inweni-mgba pilema-a ḅara ḅụ fịafịa wararị, anịsakị KỊNỊNYANAḄỌ ḅe pịkị ịna ogbo-ḅio emi, ọ́ nwẹnị anịtẹrẹmẹ tiegotẹ ọmịna aḅụụ saakị-gelema KỊNỊNYANAḄỌ ḅe kobiri-ogbo mẹ nẹngịmarị?”

4Mozizi anị naa tẹso, ọ̀ nwẹnị ọ̀ tọrụkuḅu kẹ ḅịkị kiri koro, 5tẹ ọ̀ nwẹnị Kora na ori ogbo ḅẹ apụ mamgba na ḅẹẹ, “Dede-ḅio ḅụ KỊNỊNYANAḄỌ ḅe oriḅe tẹ sime ọ̀ pịrị ḅọ na, oriḅe tẹ pilema-a tẹ fịafịa wararị ḅọ na ḍie-pakama ḅa, tẹ mịẹtẹ mḅọ sọma ò kpeki ḅa. 6Miemẹ mịẹ: Kora na ori ogbo ḅẹ apụ mamgba na: ọmịnị anyịmgbọ tan apanị ọkịị, 7tẹ ḅaa ḅẹ eneḅaka ḅụ ku-ku-kụma kọrịarị anyịmgbọ tan arị ḅio sụa, tẹ KỊNỊNYANAḄỌ ḅe tọrọkọ ḅụ kụnụaị kẹ arị ḅio sụa, anịsakị, tomḅọ ḅe tẹ KỊNỊNYANAḄỌ ḅe sẹlẹ-ọkị ḅọ mẹ anie pilema-a ḅara ḅụ fịafịa wararị ḅọ. Livayị owiapụ-awọmẹ, ọ́ sẹkị-sẹkị-mọrụụ!”

8Mozizi nwẹnị pịkị Kora ḅẹẹ, “Ọmịnị Livayị owiapụ-awọmẹ, mịọkụ ó pokii, tẹ naa! 9Mịnẹ Izirẹlịapụ tẹkẹarị Tamụnọ ḅe Izirẹlị ḅẹ tomina-ogbo mẹ ḅụ ó sikima, tẹ ọmịnị ọkị-ḅo ọ̀ ḅụụ kpekima mịẹtẹ ọ́ KỊNỊNYANAḄỌ ḅe Ọḅọkụ-Igbe koko Akpụrụ-warị mẹ ḅio fịrị mẹnjị ịn pịrị mẹ anie ọmịna aḅụụ ịrụ ḅaka ye arị iruo; 10mịnẹ ori ọmịnị na, ọmịna mịnapụ Livayị owiapụ-awọmẹ ma na kẹ ọmịna aḅụụ sụa ọkị-ḅo ọ̀ ḅụụ kpekima ye mẹ mụnọọ? Tẹ ọ́ pịkị agba mịẹ kiri mẹ sọ dogi ọkị kọrị ḅẹ ḍọkịarị? 11Ọkọ ẹrẹsị KỊNỊNYANAḄỌ ḅe mie ị́yẹrị na, í ogbo ḅẹ apụ mamgba na kobiri pịrị tẹ da-pakarị ḅọ. Erọnị anie tiye mịẹarị ḅọ tẹ ọmịnị mbụrụmbụrụ ọ̀ pịrịarị?”

12Anịtẹso Mozizi nwẹnị fịrịma Ẹlịyabụ owiapụ-awọmẹ Detanị na, Abiramu na sịn ḅẹ mu kụma ịn nwẹnị ḅẹẹ, “Wa ḅo ḅịa. 13Ḅụụ-ḅẹlẹmatẹ iḅiọkụma fịye so-pakamarị amakiri mẹ ḅio ị́ wa pakama-ḅo tẹ kẹ ịkpa ḅio ḅaa ḅẹ ḅo ye mẹ amụ paa iḅi-a, mịnẹ ị́ pịkị ị́ ḅụụ kẹ sịḅịdaḅọ sọma wa pịrị ḅẹ? 14Anie mẹ sikima, amụ ị́ wa ọkị-ḅo tẹ kẹ ḅụụ-ḅẹlẹmatẹ iḅiọkụma fịye so-pakamarị amakiri mẹ so suu-a, pịkị wa ḍuu fị ḅara kẹ nyana ḅẹ aḍụọ na, girepu-aḍụọ na kẹ wa pịrị-a. Mịna owiapụ ma atọrụngbọ ma ị́ sọkị-sọkị siin ḅẹ? Wa ḅo ḅịa.”

15Mozizi nwẹnị ịganị lama, tẹ KỊNỊNYANAḄỌ ḅe ḅẹẹ, “Ịna agba ọkị ma. Gbọrụ yedogi-nama kịngẹ sọ ịna ḅara amụ arị ọkị-a, anịsakị amụ à pịkị ye kẹ ịna aḅụụ ḅẹ gbọrụḅọ-sọ lama-a.”

16Mozizi nwẹnị Kora ḅẹẹ, “Ḅaa ḅẹ eneḅaka ḅụ, ị́yẹrị na, í ogbo ḅẹ apụ mamgba na, ọ́ KỊNỊNYANAḄỌ ḅe tọrọkọ ḅo tẹ simee, ị́yẹrị na ini na, pịkị Erọnị na; 17anịsakị yee ọmịna aḅụụ ọrụḅọ-ọrụḅọ amịna anyị tan ye ọkị, tẹ kụnụaị kẹ anị ḅio sụa, tẹ ọmịna aḅụụ ọrụḅọ-ọrụḅọ amịna anyị tan panị kẹ KỊNỊNYANAḄỌ ḅe tọrọkọ ḅoo, anyị tan apanị oyia asi mesi oyi finji; ị́yẹrị sọ, pịkị Erọnị sọ, ḅụọ-ḅụọ, amịna anyịmgbọ tan panị kẹ ḅoo” 18Mie ḅụ ọrụḅọ-ọrụḅọ amịna anyị tan panị ọkịm, tẹ ịn nwẹnị ku-ku-kụma kọrịarị anyịmgbọ kẹ arị ḅio sụa, tẹ kụnụaị kẹ arị ọgọnọ gbana, tẹ ịn nwẹnị Mozizi na, Erọnị na ḅụụ sọ tẹ mẹnjị Kobiri Akpụrụ-warị mẹ sọ-muarị ḅọkọ mẹ ḅụ sịẹsime. 19Anịtẹso Kora nwẹnị ini na tụḅụrụ ḅara kẹ tomina-ogbo mẹmgba sịn kobiri mẹnjị Kobiri Akpụrụ-warị mẹ sọ-muarị ḅọkọ mẹ ḅụ. Tẹ KỊNỊNYANAḄỌ ḅe ebube mẹ nwẹnị ḅịya paka tomina-ogbo mẹmgba sarama. 20KỊNỊNYANAḄỌ ḅe nwẹnị Mozizi na Erọnị na ḅẹẹ, 21“Mị tomina-ogbo mẹ ḅụ ọmịnị ọmịna aḅụụ sikima ḅelemaa, mịẹtẹ gbọrụ sakị kịngẹ ḅụ àrị ịn ḅaa guluguluma ḅarị ḅara.”

22Kụma Mozizi na Erọnị na nwẹnị ịna atọrụ-kuḅu kẹ ḅịkị kiri koro tẹ ḅẹẹ, “yei, Tamụnọ, oju-meni mamgba ḅẹ atẹmẹ ma ḅẹ Tamụnọ, kpọkpọ gbọrụ tomḅọ mịẹ si ḅụ ị́ ịganị nyana bebe tomina-ogbo mẹ pịrị ḅẹ?”

23Tẹ KỊNỊNYANAḄỌ ḅe nwẹnị Mozizi ḅẹẹ, 24“Tomina-ogbo mẹ ḅẹẹ, ịn Kora na, Detanị na Abiramu na simearị anga mẹ ikelema-koro ḅụ sikimaa.”

25Anịtẹso Mozizi saakịm, tẹ nwẹnị mẹnjị Detanị na, Abiramu na, dama-mu; tẹ Izirẹlị ḅẹ omongiapụ ma ò ḍuka-mum. 26Tẹ ọ̀ nwẹnị tomina-ogbo mẹ ḅẹẹ, Àrị ọ́ tẹkẹm, mịna si-sịḅịḅio-sụa atomi ma akpụrụ-awarị ma ḅụ ọ́ ḅụụ ḅelema-a, tẹ ḅara kẹ sime ịn pịrị kpọkpọ gberie-sọ lama ma, anieofori ó ḅofa ịna asi mamgba na ḅụ sọ tẹ ọfịn so. 27Mie ḅụ ịn Kora na, Detanị na, Abiramu na angarị anga na kpeki anga koroma-som.

Detanị na, Abiramu na nwẹnị ịna sime-ereme na ịna awọmẹ na, ịna ḍọkọḍọkọ-awọmẹ na kẹ ịna aḅụụ sụa tẹ paka-ḅo ịna akpụrụ-awarị ḅọkọ ḅụ sịẹsime. 28Tẹ Mozizi nwẹnị ḅẹẹ, “Mịanga ḅụ mie ó nimi ḅarịye mịnẹ KỊNỊNYANAḄỌ ḅe mie ị̀ fịrịma ye à mịna akọrịnama mamgba kọrịị, yẹrị ì soku na arị kọrị-a. 29Mịna atomi ma nwẹnị tomi mamgba kọn-kọn so-fị ḅara kọnm, anịanịa so ḅụ sime tomi mamgba pịrị-pịrị fietẹ-ḅoye sime ịn pịrịm ḅẹḅẹ, anịrẹ KỊNỊNYANAḄỌ ḅe ḅarị ị̀ fịrịma-a. 30Kụma KỊNỊNYANAḄỌ ḅe nwẹnị ịwọye mịẹ pakama, tẹ kiri mẹ amịna ḅịḅị finji, tẹ ini na, sime ịn pịrị aị mamgba na kẹ ini na sụa mẹnị-ọkị, tẹ ịn fịị-a ḅara ḅụ ḍumo wararị ogbo ideri ḍuḅu ḅio mum ḅẹḅẹ, anịrẹ mie ó nimi ḅarịye mịnẹ, mịna atomi ma KỊNỊNYANAḄỌ ḅe ḍiki-sima tẹ.”

31Ọ̀ paa mịna ẹkwẹn mamgba kọn fama gbọrụ sakị, kiri mẹ nwẹnị ịna suku-ḅio ḅụ puu sara; 32tẹ kiri mẹ amịna ḅịḅị finji tẹ ini na, ịna bebe awarị-suku ma na, tomi tẹ sime Kora pịrị apụ mamgba na, ịna ngọ mamgba na kẹ ịna aḅụụ sụa mẹnịm. 33Mị-ḅara mie ini na, sime ịn pịrị aị mamgba na fịị-a ḅara ḅụ ḍumo wararị ogbo ḍụẹịn sọ-mu ḅara, kiri mẹ nwẹnị ịna ọgọnọ ḅụ kpireima-gbaịn, tẹ ịn kobiri-ogbo mẹ ogbo-ḅio ḅụ fịị-faam. 34Izirẹlị ḅe apụ tẹ anga in ikelema-koro apụ mamgba ịna owu-apọkọ ḅụ ḍumo-mangị kọnm gbala ini mẹẹ, “Kiri mẹ ḅofa wa mẹnị-ọkị.”

35KỊNỊNYANAḄỌ ḅe nwẹnị kọrị-fịnị kẹ fịrịma tẹ kụnụaị dọkịma-agba mẹ mịẹ kịrị oyia asi, mesi oyi finji ma dọkịma ḅaa.

Anyịmgbọ Tan Apanị Ma

36Anịtẹso KỊNỊNYANAḄỌ ḅe nwẹnị Mozizi ḅẹẹ, 37“Ḍuko Erọnị, agbamịẹḅọ ḅe owiḅọtụḅọ Ẹlịyeza pịrị, kọrịarị fịnị mẹ ḅio anyịmgbọ tan apanị ma pakama-ḅoo; kẹ gotẹ ọkọ ḅẹẹarị, arị fịafịa wararị tẹ fịnị mẹ wasama gala-galama ḅelemaa. 38Mịna atomi ma tẹ si mịẹ, tẹ kẹ amịna aḍumo fama apụ ma anyị tan apanị ma ọkị, yee arị amana kẹ ḅakụ, ḅakụ, mịẹ ẹfẹrẹ so, tẹ arị sime agbamịẹ-anga mẹ gbaịn pịrị; kẹ gotẹ ọkọ ḅẹẹarị, KỊNỊNYANAḄỌ ḅe tọrọkọ mie ini agba mẹ mịẹ ye ọkọẹrẹsị arị fịafịa wararị. Mị-ḅara ḅụ arị elekima sọ Izirẹlịapụ ma pịrị ḅa.” 39Mie ḅụ agbamịẹḅọ Ẹlịyeza ojo anyịmgbọ tan aị ma tẹ inima tẹ dọkị apụ ma kẹ agba mịẹ aị ma ọkịm; tẹ ini arị ḅakụ tẹlẹma tẹ kẹ agbamịẹ-anga mẹ gbaịn aị mịẹm; 40anị ye kẹ kịnị ḅiokoromaye sọ Izirẹlịapụ ma pịrị ḅarị ḅara, mịẹtẹ agbamịẹḅọ-a tomḅọ, Erọnị furo ḅụ paka-ḅo-a ḅọ, sọma mu agbamịẹ-anga mẹ kpeki, tẹ KỊNỊNYANAḄỌ ḅe tọrọkọ agba dọkịma ḅịa ḅara, anieofori mḅọ ḅofa ḅo Kora na ori ogbo ḅẹ apụ na sọ KỊNỊNYANAḄỌ ḅe wẹrịtẹ Mozizi ḅụ ḅọrọ tẹ kẹ Ẹlịyeza ḅẹẹ ḅara.

Erọnị Tomi Ma Ḅọrọmam

41Kụma ene-ḅaa ḅẹ eneḅaka ḅụ Izirẹlịapụ ma ḅẹ tomina-ogbo mẹmgba nwẹnị mbụrụmbụrụ Mozizi na, Erọnị na pịrị, tẹ ḅẹẹm, “Ọ́ KỊNỊNYANAḄỌ ḅe atomi ma ḅaa tẹ.” 42Tẹ tomina-ogbo mẹ kobiri tẹ Mozizi na, Erọnị na da-paka tẹso, ịn nwẹnị tọrụ pịkị Kobiri Akpụrụ-warị mẹ da tẹ ẹrị mịnẹ oḅuto anị gbaịn wararị, tẹ KỊNỊNYANAḄỌ ḅe ebube mẹ nwẹnị ḅịya paka. 43Mozizi na Erọnị na nwẹnị ḅo Kobiri Akpụrụ-warị mẹ ḅẹ ḅọkọ mẹ tọrọkọ ḅụ sịẹsime, 44tẹ KỊNỊNYANAḄỌ ḅe nwẹnị Mozizi ḅẹẹ, 45“Mị tomina-ogbo ogbo-ḅio ó sikimaa, mịẹtẹ gbọrụ sakị kịngẹ ḅụ arị ịn ḅaa guluguluma ḅarị ḅara.”

Ini maa apụ ma nwẹnị ịna atọrụ-kuḅu kẹ ḅịkị kiri koro. 46Tẹ Mozizi nwẹnị Erọnị ḅẹẹ, “Ị́ anyịmgbọ tan panị ọkịị, tẹ agbamịẹ-anga mẹ ḅụ ku-ku-kụma kọrịarị anyịmgbọ tan sụa tẹ kụnụaị kẹ anị ọgọnọ gbanaa, tẹ anị dogi tẹ kẹ fọnya tomina-ogbo mẹ muu, tẹ si-wẹrịso pịrị ḅẹrẹ fama ịn pịrịị; kẹ gotẹ ọkọ ḅẹẹarị, kụrọ ịganị KỊNỊNYANAḄỌ ḅe ḅụ paka-mu ịn la tẹ, obi fomu-ḅara mẹ saakị tẹ.” 47Anie ḅụ Erọnị, Mozizi ḅẹẹ ḅara ḅụ anị ọkịm, tẹ mangị kobiri-ogbo mẹ ogbo-ḅio sọ-mum tẹ ḍiki ḅẹ saakị, obi fomu-ḅara mẹ tomi ma ogbo-ḅio saakị tẹ; tẹ ọ̀ kụnụaị ma kẹ sụa, tẹ si-wẹrịso pịrị ḅẹrẹ fama tomi ma pịrịm. 48Ọ̀ fịtẹ-apụ ma na ḍumo wararị apụ ma na ogboku sịẹsimem; tẹ obi fomu-ḅara mẹ nwẹnị daasịẹ. 49Mịọkụ, Kora amịẹaị ḅụ fịị apụ sikima, inima tẹ obi fomu-ḅara mẹ ḅụ fịị apụ kịnị puku, ini ẹndẹ fa si, na kịnị jeia si na (14,700). 50Obi fomu-ḅara mẹ daasịẹ tẹso, Erọnị pịkịma-so Kobiri Akpụrụ-warị mẹ ḅe mẹnjị-sọmu anga ḅẹ ḅọkọ mẹ ḅụ Mozizi ḍọkụma-mum.

Currently Selected:

Kịẹn-aḅịḅị 16: KBTP

Highlight

Copy