Malakayị 3
3
1 #
Mat 11.10; Mak 1.2; Luk 1.76; 7.27 Kụrọmamgba nyana KỊNỊNYANAḄỌ ḅe pakịrịm, “Àrị ì oku-mẹnjịḅọ kẹ fịrịma tẹ ori ì etela tẹlẹma ị̀ pịrị ḅa. Anịtẹso KỊNỊNYANAḄỌ ḅe tẹ ọ́ ḍọkịarị ḅọ ḅe ḅiotọn-a ḅara kẹ ọ̀ fịafịa-warị mẹ sọ-ḅo ḅa. Ọmịnị ẹrị ḅẹ tẹ ḅio-sẹsẹarị oku-mẹnjịḅọ ḅe ḅo ḅa, tẹ ị̀ ọḅọkụ mẹ ḍuko wasama ḅa.”
2 #
Jow 2.11; Mịẹ 6.17 Kụma tụḅọ inetẹ inema ḅẹ mọọ, ò ḅo sakị? Tụḅọ inetẹ sịẹsime ḅẹ mọọ, ò tolu paka-ḅo sakị? Ò ye-sịkịrị fịafịamarị ọsọn na pịkị ojo fọị fịafịamarị fịnị na kịka ḅa. 3Ò ḅo ḅẹrẹkọn ḅa, gbala seleḅa mịẹ tẹ anị fịafịarị ḅọ ḅara. Ikulele-tẹmẹḅọ seleḅa na golu na mịẹ fịafịamarị ḅara, anie KỊNỊNYANAḄỌ ḅe oku-mẹnjịḅọ ḅe ḅo tẹ agbamịẹapụ ma mịẹ-fịafịama ḅarị ḅara, mịẹtẹ ịn karakara ḍiepịrị-aị ọkị-ḅo KỊNỊNYANAḄỌ ḅe pịrị ḅẹ ḅara. 4Anịtẹso Juda na Jeruselemu na ḅẹ apụ ma ọkị-ḅo KỊNỊNYANAḄỌ ḅe pịrị ḅarị ḍiepịrị-aị ma ò ḅioḅẹlẹma aị sọ ḅa, ḅọrọtẹ sakị ḅụ arị mịẹ-mịẹ ḅara.
5Kụrọmamgba nyana KỊNỊNYANAḄỌ ḅe ḅẹẹm, “À ḅẹrẹkọnḅọ ḅara kẹ ọmịna ogboku tolu-sịẹ ḅa, tẹ anị-gbọrụ-kirikiri ḅẹrẹ ḍuko majịkị-mịẹapụ na, sẹfị-apụ na, ḅẹrẹ-siri ḅụ iruoye ḍukoarị ogbo-sịẹapụ na, fịrị kẹ ọkọ-apụ inomarị apụ na, diapụ-fịtẹ-ereme na ḍapụ-na-iyingiapụ-na-fịtẹ-awọmẹ na igoniapụ na tọrụ-pọnjịarị apụ ọgọnọ gbana ḅa — inimgba tẹ ị̀ mangịma-a apụ ma.”
Nyana-oyi-ḅụụ-gberie Gbẹẹ Mẹ
6“Yẹrị anie KỊNỊNYANAḄỌ ḅe, tẹ à ḍima-ḍima-a. Miemẹ ẹrẹsị, ọmịnị Jekọbụ furo-ḅẹ-apụ ma, amụ ọ́ paa gbọrsịḅị fịị-faa-a. 7Ọmịna elemu aḍapụ ma tẹ ọmịna tọrọkọ paka apụ ma kịka ḅụ, ọmịnị ì oloko ma ḅụ pịkị-so tẹ ḅarị arị koko-a. Ọ́ pịkịma ị̀ dama-ḅoo, tẹ à tọrụ-pịkị ọ́ da ḅa. Kụma ó gbelarị, ‘Ndẹẹ wa mịẹ na-iḅi ye, pịkịma ị̀ dama-ḅo ḅụ?’ 8Àrị ó gbelarị, miemẹ kuraye, tomḅọ mingirima ḅara ḅụ Tamụnọ nye furu ọkị mẹ? Karakara-ḅara-ḅụ ọkọ sime ye ofori, anịsọ ọmịnị mingirima ḅara ḅụ ìnye furu tẹẹ. Ó gbelarị, ‘Tọ ḅara ḅụ?’ Ọ́ nyana-oyi-ḅụụ-gberie kẹ ị̀ pịrị na agba kẹ ị̀ pịrị na ḅụ. 9Wori-nume ọmịnị-mgba ọgọnọ gbana wararị, bebe sịẹ mẹ ì mingirimarị ye mẹ ẹrẹsị. 10#Lẹv 27.30; Kịẹ 18.21-24; Dit 12.6; 14.22-29; Neh 13.12Ọmịnị ọ́ nyana-oyi-ḅụụ-gberie mẹ kịra-gbasị ḅara kẹ Tamụnọ-warị ḅoo, mịẹtẹ ị̀ warị ḅio fịye ḅin ḅẹ ḅara. Ọmịnị ị̀ daaḍikii, tẹ ọmịnị ẹrị ḅa mịnẹ à So-ḅio ḅẹ ikiḅa-aḅọkọ ma finji tẹ tọn-a ḅara kẹ kịrị-kịrị iḅi-aị ọsụma ọmịna ọgọnọ sara ḅa. 11À ḍụkụ tẹ fịaị fị ḅaa aị ọmịna ḍiḅi-aị ma guluguluma ḅịa, tẹ ọmịna girepu-aḍụọ ma tọnwa asịnmgbọlụ sụa sara ḅa. 12Anịtẹso sịẹ-sịẹ ma ḅẹ atomi ma ḅioḅẹlẹarị apụ kẹ ọ́ sịn ḅa, ọmịna amakiri mẹ anie tomi anga na-iḅi amakiri ẹrẹsị.”
Tamụnọ Ọkụrụkụrụ Nyana Mininim
13KỊNỊNYANAḄỌ ḅe ḅẹẹm, “Ọ́ ḅalafama aị ḍuko tẹẹ ị̀ ḅụụ ḅụ. Kụma ọ́ gbelarị, ‘wa ị̀ ḅụụ ḅụ tiye ḍuko tẹ?’ 14Ọ́ ḅẹẹm, ‘Fịrịmẹnjị Tamụnọ pịrị ḅụ ye ofori. Ò ḅiiarị ye mịẹ, anịanịa ḅụụkụrọma tẹ kẹ Kụrọmamgba nyana KỊNỊNYANAḄỌ ḅe ḍie mịnẹ wa wa mịẹtẹ aị gotẹ kururuarị ye mẹ ḅụ tọ sọye emi? 15Wa ẹrịarị ḅara ḅụ, ḅụụ-gelemarị atomi anie ḅioḅẹlẹarị apụ ma. Si atomi loloarị ngẹrị-a, kụma ịn pịkị Tamụnọ ḅe ye-inema daaḍikiarị ịna si-amịẹaị ḅụ, tẹ gberie-sọ ịn la-a.’ ”
16Anịtẹso KỊNỊNYANAḄỌ ḅe mangịmarị atomi ma ẹkwẹn jụmọ-jụmọ pịrị tẹ KỊNỊNYANAḄỌ ḅe poki tẹ in ḍuko ye naam. Ọ̀ tọrọkọ ḅụ, ịn KỊNỊNYANAḄỌ ḅe kụn tẹ ọ̀ mangịmarị apụ ma ẹrẹ kẹ ḍiri ḅio kẹẹ koromam. 17Kụrọmamgba nyana KỊNỊNYANAḄỌ ḅe ḅẹẹm, “Ini ị̀ atomi sọ ḅa. Anị ene ḅụ, àrị à mịẹ ḅẹ ye mịẹ sakị, in sime ị̀ pịrị apụ sọ ḅa karakara-ḅara-ḅụ. Àrị ọkụrụkụrụ nyana ịn pịrị ḅa, ḍaḅọ ọkụrụkụrụ nyana ọ̀ tụḅọ tẹ fịrịmẹnjị ọ̀ pịrịarị ḅọ pịrị ḅara. 18Ị̀ atomi siin gbọrụ sakị kẹ ẹrị ḅa paka karakaraye-mịẹḅọ ḅe pịrịarị ye na paka si-sịḅịḅio-sụaḅọ ḅe pịrịarị ye na, anie fịrịmẹnjị ị̀ pịrị ḅọ ḅe na fịrịmẹnjị ị̀ pịrị-a ḅọ ḅe na aḅụụ pakarị ye mẹ.”
Currently Selected:
Malakayị 3: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
