Malakayị 2
2
1Kụrọmamgba nyana KỊNỊNYANAḄỌ ḅe agbamịẹapụ ma ḅẹẹm, “Mị oloko mẹ à sụa ọ́ pịrịm: 2Ọmịnị ị̀ kụn nyanam ọ́ mịẹarị ye ḅụ. Ọmịnị à ḍukoarị ye poki ḅịa ḅẹḅẹ, anịsakị à wori-nume ọkị-ḅo ọmịna ọgọnọ gbana ḅa. Ọ́ kẹ ḅụụ-ḍikiḍiki ḅẹ tẹ daarị aị ma ọgọnọ à wori-nume kẹ gbana ḅa. Karakaraye ḍuko ḅụ, à wori-nume kẹ arị ọgọnọ gbana tẹẹ, ọmịnị ì oloko kẹ tẹmẹ-la ḅara ọkị-a ẹrẹsị. 3À fomu-ḅara kẹ ọmịna awọmẹ pịrị tẹ ọ́ kẹ agba mịẹarị anama ma afuro ḅio in polo pakama-ḅo aị ma kẹ ọmịna atọrụ-kuḅu ọmbị ḅa; ini ọ́ kẹ paka fịnya-fịnya opu sara mẹ mu ḅa. 4#Kịẹ 3.11-13Anịsakị ó nimi ḅa mịnẹ yẹrị mị oloko mẹ sụam, mịẹtẹ ị̀ ọḅọkụ mẹ tẹ à kẹ agbamịẹapụ, Livayị furo-ḅẹ-apụ ma na fị wararị ọḅọkụ mẹ kaan ḅịa ḅara.
5 #
Kịẹ 25.12
“Ị̀ ọḅọkụ mẹ ḅụ à ḍumo minini ịn pịrịm, pịkị ye ini na iḅi ḅẹ ḅara na, tẹ mie à pịkị kẹ ịn pịrị yee, mịẹtẹ ini ị̀ mangịma ḅẹ ḅara. Arị ene ma ḅụ, ini ị̀ mangịma tẹ ị̀ kụnm. 6Ịn kuraye tolumam, kura-aye-a. Ini ị̀ na ḅịḅị-kẹ-ogbosọ ḅara angam; ini ḅioju karakara mịẹm ngẹrị-a, kụma ịn ḅarasụa tọnwa-apụ pịrị tẹ ịn siye mịẹ-a ḍumo kọnm. 7Karakara Tamụnọ nimi toluma, anie sime agbamịẹapụ pịrị fịrị. Kịnị mu-mu tẹ ịna aḅara à ḅiiarị ye ḍawọ, ini anie Kụrọmamgba nyana KỊNỊNYANAḄỌ ḅe oku-mẹnjịapụ ẹrẹsị. 8Kụma mịọkụ ọmịnị agbamịẹapụ ma karakara mịẹ ḅụ pịkị-so tẹẹ. Ọmịna tolumayee mịẹ tẹ tọnwa-apụ iri-ye mịẹ tẹẹ. Yẹrị na ọmịnị na fị ọḅọkụ mẹ ọ́ kan tẹẹ. 9Mie ḅụ, yẹrị sọ ị̀ pakịrị anga ḅụ mịẹ tẹ Izirẹlịapụ ma ó ḍiki-sima ḅa, ọmịnị à ḅiiarị ye poki tẹ mịẹ-a ẹrẹsị, tẹ ó ye kẹ ị̀ atomi tolumarị sakị, ọmịnị ọrụḅọ-ọrụḅọ kẹ gbọrụ ḅara ọkị-a.”
Tomi Ma Ḅioḅẹngbọ-kẹ-sịrẹrẹ-niḅi-a Ḅara Sime Tamụnọ Pịrịm
10Wamịnị-mgba gbọrụ Ḍaḅọ nyanam. Gbọrụ Tamụnọ ḅe wamịnị-mgba tẹmẹm. Ọkọ kụma wa tiye gotẹ wamịna ḅịḅị simarị wa minini jụmọ-jụmọ pịrị ye ḅụ, tẹ tiye ẹrẹsị wa pịkị Tamụnọ wamịna elemu aḍapụ na fị ọḅọkụ mẹ ḍiki-simarị? 11Juda ḅẹ apụ ma ịna ḅịḅị sima tẹẹ, in minini Tamụnọ pịrị ye ḅụ; Jeruselemu na Izirẹlị na sọ si mịẹ tẹẹ; bebe amakiri mẹ kana-koro ḅụ ịn sịḅị-ngụngụmaye mịẹ tẹẹ. Ịn KỊNỊNYANAḄỌ ḅe ḅẹlẹmarị ọ̀ Warị mẹ pilema tẹẹ. Owiapụ ja sịẹ ḅẹ oru-atamụnọ tẹkẹarị ereme sime tẹẹ. 12Yee KỊNỊNYANAḄỌ ḅe miemẹ mịẹarị owiḅọ mẹ sikima Izirẹlị tomina ogbo mẹ ḅụ, tẹ ḅarị gbala-gbala ḍụkụ tẹ mḅọ wamịna sịẹ mẹ ḅụ sọ tẹ ḍiepịrị-aị ọkị-ḅo ọkị-ḅo Kụrọmamgba nyana KỊNỊNYANAḄỌ ḅe pịrị ma.
13Mie jen tẹ ọ́ mịẹarị ye. Ọmịnị owu-minji kẹ KỊNỊNYANAḄỌ ḅe agbamịẹ-anga mẹ ḅilemarị, tẹ lee-leema owuarị, ọ̀ ḅarị jen kẹ ọmịnị ọkị-ḅoarị ḍiepịrị-aị ma da-a ẹrẹsị. 14Ó gbelarị tiye ẹrẹsị ọ̀ ḅarị arị da-a mọ. Anị gotẹ ọkọ mịẹ ye, ò nimi wararị í minini ị́ ịwọ sakị í sime taḅọ ma pịrị ye mẹ í sima tẹẹ. Árị ma anie ị́nịna gbọrụ ḅụ mẹnjị ḅọ, tẹ í í minini á pịrị ye mẹ sima tẹẹ, tụkụmaye, Tamụnọ tọrọkọ ḅụ í mininim mịnẹ í ḅioḅẹngbọ-kẹ-sịrẹrẹ-niḅi ḅara sime á pịrị ḅa. 15Tamụnọ ị́yẹrị na árị na kẹ gbọrụ oju na tẹmẹ na mịẹm. Miemẹ mịẹ ḅụ ò ḅioḅẹngbọ sime ye tiye? Ò gotẹ ọkọ mịẹ ye ọ́ karakara ḅara kẹ sime Tamụnọ pịrị atomi sọ ḅarị awọmẹ iyi ḅẹ ḅara. Mie ḅụ ọmịnị ẹrị mịnẹ ọmịna ḅụụ gbọrụḅọ-sọ mḅọ minini mḅọ taḅọ pịrị ye sima-a. 16KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹm, “À diḅọ na taḅọ na siya ḍiki-ḅioḅuarị. Ọmịna aḅụụ ḅẹ gbọrụḅọ tọrụ-kpọmatẹ ọkọ sime siye kẹ amịna taḅọ mịẹarị sakị, àrị anị ḍiki-ḅioḅuarị. Ẹrị mịnẹ í minini ị́ ta pịrị ye ḅụ í ḅioḅẹngbọ-kẹ-sịrẹrẹ-niḅi ḅara simem.”
Ḅẹrẹkọn Ene Mẹ Kpeki Tẹẹ
17Ọmịnị ịnyọ kẹ KỊNỊNYANAḄỌ ḅe tama fama tẹẹ, ọ́ kọn-arị ẹkwẹn ḅụ. Kụma ó gbelarị, “Ndẹẹ wa wẹrị tẹ ịnyọ kẹ ị́ tama ḅara?” Mị-ḅara mẹ ḍuko ḅụ, “Kụrọmamgba nyana KỊNỊNYANAḄỌ ḅe kuromarị mịnẹ siye mịẹ apụ mamgba iḅi apụ; karakara ye ḍuko ḅụ, ịna mịẹye ọ̀ ḅụụ-ḅẹlẹarị.” Anịanịa gbela ḅụ, “Tomi ọkịarị inema ḅụụ ḅụ ofori Tamụnọ ḅe, ndẹẹ ori?”
Currently Selected:
Malakayị 2: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
