Luku 17
17
Jizọsị Si Gbolomaye Tolumam
(Mat 18.6-7,21-22; Mak 9.42)
1Jizọsị nwẹnị ò ḍukamẹnjịapụ ma ḅẹẹ, “Mịẹtẹ tomi si mịẹ ḅẹ aị paka-a so ḅịa, kụma arị pakama ḅarị ḅọ mẹ mḅọ tẹkẹlẹtẹ! 2Ikuarị ye gbẹẹ ḍụḅarị kẹ mḅọ kọngọ kpọ tẹ mḅọ kẹ tọrụ-minji gbin fama iḅi kẹ mḅọ ḅụụ ḅo ye mịẹtẹ mịna kala awọmẹ ma ḅụ ḅẹ gbọrụḅọ si mịẹ nẹngịm. 3#Mat 18.15Ọkọẹrẹsị ọmịnị ọ́ mịẹarị ye ḅụ ẹbị nyana-a.
“Ị́ mịnaḅọ si mịẹ-mịẹ, ò ḍiki-ịganịị, ori anị ḅụ pịkịm ḅẹḅẹ wẹrịso ọ̀ pịrịị. 4Gbọrụ ene ḅụ ọ̀ sọnọma sakị kẹ si kẹ ị́ mịẹ sọ ọ̀ pịkịma-ḅo tẹ ‘À ḅarị mịẹ ḅịa’ kẹ ị́ ḅẹẹ ḅẹẹ, wẹrịso ọ̀ pịrịị.”
Jizọsị Minini Gbolomaye Tolumam
5Fịrịmẹnjịapụ ma nwẹnị KỊNỊNYANAḄỌ ḅe ḅẹẹ, “Wa nyana minini nẹngị ye kẹ wa pịrịị.”
6KỊNỊNYANAḄỌ ḅe nwẹnị pakịrị, “Ọmịna minini ịrụ mọsịtadị mgbọlị na gbasị sọ, ọ́ sịẹ wararị sịn ḅẹẹ mịnẹ anị suku-na-suku-na saakị mu tọrụ koro, tẹ anịanga sịẹsime ḅẹẹ kụma, anị ọ́ ḅẹẹ ḅara mịẹ ḅa.
Sime Fịrịmẹnjịḅọ Pịrị Kọrịnama
7“Ọkịị mịnẹ ọmịna ḅụ ḅẹ gbọrụḅọ fịrịmẹnjịḅọ ọkọ tẹ ọ̀ ḍụọ kọrịarị, anịanịa anana ḍikiḍikiarị. Tẹ ọ̀ kọrịnama kọrị fama tẹ ḅo warị la kụma ọ́ ḅọrọ ọ̀ ḅẹẹ ḅẹ mịnẹ ọ̀ fọnya ye tẹ ḅo ye fị? 8Gbala-gbala, ọkọ-a! Anie nakara í ọ̀ ḅẹẹarị, ‘Fịye mịẹ ị̀ pịrị, tẹso, ị́ tọrọkọ gbaịn ḅịtẹ kpọọ tẹ ì koru à ye mẹ fị tẹ pịkị minji ḅuu, tẹrẹmẹ í í nye fị.’ 9Fịrịmẹnjịḅọ ḅe ịn tọn ọ̀ pịrị ye mịẹ kụma ị́ ịmịẹtẹ kẹ ọ̀ ḅẹẹ na-iḅi? 10Anie anị pịkị sime ọ́ pịrị ḅara. In tọn ọ́ pịrị aị mamgba ọ́ nwẹn mịẹ fama tẹ ḅẹḅẹ, ọ́ ḅẹẹ, ‘Wamịnị fịrịmẹnjịapụ, sime wa pịrị kọrịnama mie wa kọrị ye.’ ”
Jizọsị Oyia Sofịnị-obi Kọn Apụ Gwọm
11Jizọsị so Jeruselemu muarị sakị Sameriya na Galili na ogboku ḅẹ agara ḅụ mie ọ̀ ḅọrọ ye. 12Ọ̀ mẹnjị gbọrụ kala-ama sọ ḅẹ-muarị ogbo ò ḅo oyia apụ na bịamam, in sofịnị-obi kọn-arị. Ịn nwẹnị ala-jụ sịẹ 13tẹ oloku, “Jizọsị, Sịḅịdaḅọ! Wa ḍiki-sịḅị-kụrụkụrụụ!”
14 #
Lẹv 14.1-32
Jizọsị ḅo ịna ẹrị tẹso, ọ̀ nwẹnị ịn ḅẹẹ, “Ó mu ḅụụ kẹ agbamịẹapụ ma ḍie tẹ ini ó pekele-ḍiki.”
Ini ọkọ kẹ muarị ogbo ịna oju nwẹnị fịafịa. 15Ịna ḅụ ḅẹ gbọrụḅọ ḅo ẹrịm mịnẹ ọ̀ gwọ tẹ ḅẹ sakị, ọ̀ pịkịma ḅo tẹ gele pọkọ kẹ Tamụnọ bomam. 16Ọ̀ nwẹnị Jizọsị ḅụọ-suku amịna ḅụụ sẹma-kiri-gbin, tẹ ịmịẹtẹ kẹ ọ̀ ḅẹẹ. Tomḅọ ḅe Sameriya ḅẹ ḅọ. 17Jizọsị nwẹnị ḅẹẹ, “Oyi apụ mie gwọ ye, ndẹẹ kirikọn eseni apụ ma? 18Ndẹẹ ḅị igoniḅọ ḅe ngẹrị pịkị-ḅo tẹ ịmịẹtẹ kẹ Tamụnọ ḅẹẹ ḅe ḅo ḅara?” 19Tẹ Jizọsị nwẹnị ọ̀ ḅẹẹ, “Saakị tẹ soo, í minini mịẹtẹ í oju iḅi tẹ.”
Jizọsị Tamụnọ-Amada Gbolomaye Tolumam
(Mat 24.23-28,37-41)
20Farịsii ḅẹ ja apụ nwẹnị Tamụnọ Ama-da mẹ ḅo ḅẹ sakị kẹ Jizọsị gbela. Mie ọ̀ pakịrị ḅịḅị, “Tamụnọ Ama-da mẹ tomi ẹrị ḅẹ ḅara kẹ ḅo ḅịa. 21Gbọrụḅọ sọ ḅẹẹ ḅịa, ‘Ḍiki mịanga!’ anịanịa, ‘Anịanga!’ kẹ gotẹ ọkọ ḅẹẹarị, ọmịna ḅụụ ḅio mie Tamụnọ Ama-da mẹ simearị ye.”
22Anịtẹso ọ̀ nwẹnị ò ḍukamẹnjịapụ ma ḅẹẹ, “Sakị ḅo ḅa tẹ ó ḅii ḅa ọ́ paa Tomḅọ Tụḅọ ḅe sakị mẹ ḅẹ gbọrụ ene kịngẹ ẹrị, kụma ọmịnị ẹrị ḅịa. 23‘Ọmịnị anịjụ ḍikii!’ anịanịa ‘Mịanga ḍikii!’ kẹ ọ́ ḅẹẹ ḅẹ apụ paka ḅa. Kụma ó minini tẹ paka anị ḍọkụma-mu ma. 24So ḅalapụ tẹ anị ḅẹ bele mẹ puu saḅa-ḅọrọ ḅara anie Tomḅọ Tụḅọ ḅe ḅo ḅẹ ene mẹ sọ sime ḅarị ḅara. 25Kụma ọ̀ tarị tọrụsiẹrị lama ḅa, tẹ mị sakị mẹ ḅẹ apụ ma ọ̀ sịkị ḅa. 26#Suk 6.5-8Noha sakị ḅụ ye sime-ḅara anie Tomḅọ Tụḅọ ḅe ene ma ḅụ sọ anị sime ḅarị ḅara. 27#Suk 7.6-24Ọrụḅọ-ọrụḅọ fị-na-ḅuu-nam, owiapụ na ereme na simem, nwenii tẹ Noha arụ mẹ ḅụkụlọ tẹ opu minji mẹ ḅo inimgba ḅaa famam. 28#Suk 18.20—19.25Lọtị sakị ḅụ anị sime-ḅara mie anị pịkị sime ḅarị ḅara. Ọrụḅọ-ọrụḅọ fị-na-ḅuu-naarị, dẹrị-na-fẹ-naarị, ye ḍiḅiarị, pịkị warị namarị. 29Lọtị ḅe Sọdọmụ koroma-so eneḅaka So-ḅio fịnị na ḍụḅarị na ene sara ḅara sara tẹ inimgba ḅaa famam. 30Anie Tomḅọ Tụḅọ ḅe ḅụụ pakama ḅarị ene mẹ sọ sime ḅarị ḅara.
31 #
Mat 24.17,18; Mak 13.15,16 “Anị ene mẹ ḅụ, warị isun ọgọnọ sime ḅọ koro warị ḅio mḅọ nyana aị ọkị ḅẹ ḍọkị ma; anị gbọrụ ḅara ḅụ piri-ḅio sime ḅọ pịkịma warị mu ma. 32#Suk 19.26Ọ́ Lọtị ta kẹ ḅiokoromaa! 33#Mat 10.39; 16.25; Mak 8.35; Luk 9.24; Jọn 12.25Amịna ḍumo ḅọrọma ḍọkị ḅọ anị fama ḅa; amịna ḍumo fama ḅọ anị ḅọrọma ḅa. 34À ḍuko ọ́ pịrịarị mịnẹ anị ḍin, gbọrụ iḅila ọgọnọ monoarị maa apụ ḅụ ịn gbọrụḅọ ọkị tẹ osi-ḅọ wẹrịso ḅa. 35Maa ereme mbịaka gbẹẹ gbolomarị anga ḅụ ịn gbọrụḅọ ọkị tẹ osi-ḅọ wẹrịso ḅa.” 36Maa owiapụ piri-ḅio kọrịnama kọrịarị ogbo ịn gbọrụḅọ ọkị tẹ osi-ḅọ wẹrịso ḅa.
37Ò ḍukamẹnjịapụ ma nwẹnị ò ḅii, “KỊNỊNYANAḄỌ, miemẹ ḅọrọ tọ-anga mịẹ ḅẹ?”
Jizọsị nwẹnị pakịrị, “Fịtẹ nama sime anga, anie ẹdẹlẹ gbori-gbori anga.”
Currently Selected:
Luku 17: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
