Luku 16
16
Jizọsị Mbasị Ye-ḍikiḍikiḅọ Egberi Gbaam
1Jizọsị nwẹnị ò ḍukamẹnjịapụ ma ḅẹẹ, “Gbọrụ sakị gbọrụ ngọ-kọn ḅọ gbọrụ fịrịmẹnjịḅọ nyana tẹ ọ̀ nyana aị mamgba kẹ ọ̀ pịrị ḍikiḍikim. Kịnị nwẹnị ḅo ḍuko ọ̀ pịrị mịnẹ ò ye-ḍikiḍikiḅọ ḅe ori igbigi gulugulumarị. 2Mie ḅụ ọ̀ nwẹnị ọ̀ sịn tẹ ọ̀ ḅẹẹ, ‘Ị́ ḅụụ à nwẹn naarị ye anie tiye? Ḅo ị̀ aị tẹ í ḍikiḍikiarị aị mamgba kịẹn tẹ saḅama ị̀ pịrịị, ị́ ḅarị ì ye ḍikiḍikiḅọ sọ ḅịa ẹrẹsị.’ 3Fịrịmẹnjịḅọ ḅe nwẹnị amịna ḅụụ ḅẹẹ, ‘Ị̀ sịḅịdaḅọ ḅe fịrị ḅụ ì sin ḅẹ tẹ. À tiye kọrị ḅẹ? Àrị ịnyọ nyana tẹ kiri soku ḅịa, kịnị ḅara ye ḅii pịkị ị̀ ḅụụ-jịrịmarị. 4Mịọkụ à mịẹ ḅẹ ye à nimi tẹ, tẹ ị̀ kọrịnama mẹ ị̀ ḅara so sakị àrị ikiapụ nyana tẹ ị̀ da ịna awarị suu ḅa!’
5“Mie ḅụ ọ̀ nwẹnị ọ̀ sịḅịdaḅọ ḅara saa ọlọ apụ sịn ḅo tẹ tarị ḅọ ḅe gbela, ‘Ị̀ sịḅịdaḅọ ḅara ị́ nda aị ọlọ?’ 6Ọ̀ nwẹnị pakịrị, ‘Pulo aposini sọnọa si.’ Ye ḍikiḍikiḅọ ḅẹ nwẹnị ọ̀ ḅẹẹ, ‘Mie í ḍiri, lẹgị-sime tẹ anị kẹ mesi oyi finji kẹẹ.’ 7Ọ̀ nwẹnị pịkị jụmọ ḅii, ‘Ị́yẹrị ị́ ọlọ ye nda aị?’ Anị ḅọ mẹẹ, ‘Mbịaka akpa maa ẹndẹ oyia asi finji.’ Ye-ḍikiḍikiḅọ ḅe nwẹnị pịkị anị ḅọ ḅẹẹ, ‘Mie í ḍiri, anị kẹ maa ẹndẹ kẹẹ.’
8“Miemẹ gotẹ ḅie ḅara fịafịa-a ye ḍikiḍikiḅọ ḅe sịḅịdaḅọ ḅe nwẹnị ò tokini, anie mị tomikiri mẹ ḅẹ apụ ma aka nimi tẹ kẹ ịna amịẹaị mịẹ bele ḅio ḅẹ atomi ma nẹngị ye ẹrẹsị.”
9Tẹ Jizọsị nwẹnị paa ẹkwẹn tọrọkọ mu, “Ọkọẹrẹsị à ḍuko ọ́ pịrịarị, ó tomikiri ḅẹ ngọ mẹ kẹ ikia ọlọ ḅụụ pịrịị, mịẹtẹ anị ḅarị ọmịna ḅara ofori sakị ini ọ́ da sime-gbamaso warị ḅio suu ḅarị ḅara. 10Boowa kalịye ọlọ kpaịnma ḅọ pịkị tọnwa aị ọlọ kpaịnma ḅa; ye kalịye ọlọ kpaịnma-a ḅọ pịkị tọnwa aị ọlọ kpaịnma ḅịa. 11Tomikiri ḅẹ ngọ sọ ọ́ wẹrị kpaịnma-a sakị ndẹẹ ini inetẹ karakara ngọ kẹ ọmịna ḅara sụa ḅarị ḅara? 12Anị sakị ọmịnị inetẹ jụmọ nye kpaịnma-a kụma tụḅọ ó soku-ḅẹ ye kẹ ọ́ pịrị ḅe?
13 #
Mat 6.24
“Gbọrụ fịrịmẹnjịḅọ sọ gbọrụ kiri maa apụ omoniḅọ sọ ḅịa, mḅọ gbọrụḅọ ḍiki-ḅioḅu tẹ osi-ḅọ ḅẹlẹma ḅa; mḅọ sịḅị-tuu gbọrụḅọ pịrị tẹ osi-ḅọ ḍiki-sima ḅa. Ọmịnị inetẹ gbọrụ kiri sunsin Tamụnọ na igbigi na pịrị gboloma ḅịa.”
Jizọsị Kọn Ja Ẹkwẹn
(Mat 11.12-13; 5.31-32; Mak 10.11-12)
14Farịsiiapụ ma miemẹ naa fama sakị in Jizọsị mịẹ sima ḅara kẹ ye mịẹm, ini igbigi ḅẹlẹmam ẹrẹsị. 15Jizọsị nwẹnị ịn ḅẹẹ, “Ọmịnị anie tomina tọrụ iḅi ọkị ḅẹ ḅara kẹ ye mịẹarị apụ, kụma Tamụnọ ọmịna ḅioḅẹngbọ sime ye nimi wararị. Tomi kẹ opu ye sịn-arị ye Tamụnọ tọrọkọ gberie-sọ gberie-a.
16 #
Mat 11.12,13 “Mozizi Oloko mẹ na ịkịankoroapụ ma kẹẹ aị ma na kụrọ nyana nwenii Minji-sara Jọnị ḅo sakị lam; anịngẹ-kụraḅio Tamụnọ Ama-da mẹ ḅẹ Iḅi Oku mẹ ịn nwẹn ḍukoarị, tẹ ọrụḅọ-ọrụḅọ amịna ḅụụ sukuruma suuarị. 17#Mat 5.18Kụma So na Kiri na ḅọrọ so sarasara Oloko mẹ ḅụ ịrụ-tẹịn ye papaa ḅọrọ so nẹngịm.
18 #
Mat 5.32; 1 Kọr 7.10,11 “Amịna taḅọ na siya tẹ jen ẹrẹḅọ sime ḅọ, sime ḅọ mḅọ sẹfị tẹ, anị gbọrụ ḅara ḅụ diḅọ na siya tẹ ẹrẹḅọ sime ḅọ sime ḅọ mḅọ sẹfị tẹ.
Jizọsị Ngọ-Kọnḅọ Ḅe Na Lazarọsị Na Egberi Gbaam
19“Gbọrụ sakị gbọrụ ngọ-kọnḅọ simem, tẹ kpọma ye la ḅụratẹ ḅiriaị ḅiri, ḅiri tẹ pịkị kpọma woso-woso ḍumo kọnm ene ḅaa ene, ḅaa ene. 20Anị sakị ḅụ Lazarọsị nwẹn-sịn igoinḅọ sọ simem, ori oju mamgba ịnọ-ịnọ-ịnọ, tẹ ngọ-kọnḅọ ḅe warị ḅọkọ mie ini ọ̀ kẹ ḅo tẹ ọ̀ lẹgị lẹgị yee, 21ò simearị ogbo ori ngọ-kọnḅọ ḅe dẹbịlẹ ḅụ kọsị-sara afịaị kolokolo fị ḅarị ḅoto. Obiri ma pịkị ḅo ori oju ḅẹ ịnọ ma mẹnị mẹnịm.
22“Igoinḅọ ḅe nwẹnị fịị, tẹ enjẹlị apụ ò dogi-mu So-ḅio Ebira-amụ akaka lẹgịmam, So-ḅio ḅẹ alalị fị dẹbịlẹ suku. Ngọ-kọnḅọ ḅe sọ fịị tẹ ini ò ḍiḅim. 23Tẹ Ḍuḅu ḅio ḅụ ori opu akụye daarị ogbo ọ̀ nwẹnị tọrụ saakị tẹ ala-jụ ḅio Ebira-amụ ẹrị, Lazarọsị ori akaka lẹgị-sime wararị. 24Mie ḅụ ọ̀ nwẹnị oloku pakama, ‘Ḍa Ebira-amụ! Sisi paa ì ḍiki sịḅị-jịrị tẹ Lazarọsị fịrịma tẹ ọ̀ ḅara-tụngbalị kẹ minji gbọn tẹ kẹ ị̀ ḅẹlẹ deinma, gbala opu akụ ḅio àrị emi mị kọrị fịnị mẹ ḅio!’
25“Kụma Ebira-amụ ḅẹẹm, ‘Ị̀ tụḅọọ, kẹ ḅiokoroma mịnẹ í ḍumo wararị sakị iḅi aị mamgba ị́ aị famam, tẹ Lazarọsị si-aị mamgba nyanam, kụma mịọkụ ori tọrụ-ḅẹlẹ nyana tẹ mịanga, akụ daarị. 26Anie sikima wamịnị na ọmịnị na ogboku opu olulu emi, anie mịẹtẹ saḅa mu jụmọ-jụmọ la-la ọkụ ofori!’ 27Ngọ-kọnḅọ ḅe nwẹnị ḅẹẹ, ‘Ọkọ ḅẹḅẹ, ḍa Ebira-amụ, sisi Lazarọsị kẹ ị̀ ḍa warị fịrịmaa, 28anịanga ị̀ sọnọa amịnapụ emi, tẹ ọ̀ paa mu ịna ḅeri nụnụ, anieofori in ḅofa ḅo mị akụ mẹ da.’
29“Ebira-amụ nwẹnị ḅẹẹ, ‘Ị́ amịnapụ ma Mozizi na Ịkịankoro apụ ma na nyana wararị, ịna ḅeri nụnụ; ị́ amịnapụ ma, ịn mịẹ na-iḅi ye anie Mozizi na Ịkịankoro apụ ma na ḅịḅị poki.’ 30Ngọ-kọnḅọ ḅe nwẹnị pakịrị, ‘Ḍa Ebira-amụ, anie ngẹrị iḅi ḅịa. Fịtẹ-ḅọ saakị tẹ mu ịn la kụma, ini ịna asi ḅụ pịkị ḅa.’ 31Kụma Ebira-amụ nwẹnị ḅẹẹ, ‘In Mozizi na Ịkịankoro apụ ma na ḍukoarị ye naa-a ḅẹḅẹ, fịtẹ-ḅọ saakị tẹ mu ḍuko ḅarịye sọ ịna ḅụụ ye mịẹ ḅịa.’ ”
Currently Selected:
Luku 16: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
