Luku 15

Jizọsị Fatẹ Anana Egberi Gbaam

(Mat 18.12-14)

1 # Luk 5.29,30 Gbọrụ ene, ama-igbigi da apụ na ama kẹ si-mịẹapụ sịn tẹ apụ na Jizọsị ḍukoarị ye poki ḅẹ ḅo sakị, 2Farịsiiapụ na Oloko toluma apụ na nwẹnị saakị mbụrụmbụrụ, “Ḅị tomḅọ ḅe ama kẹ si-mịẹapụ sịn tẹ apụ ma daa-ọkị tẹ pịkị ini na ḅara gboloma fịye fịarị.” 3Mie ḅụ Jizọsị nwẹnị mị egberi mẹ gbaa ịn pịrị:

4“Ọmịna ḅụ gbọrụḅọ anana sọnọa asi nyana tẹ gberie fa kụma mḅọ tiye mịẹ ḅẹ? Mḅọ gberie fa sọnọa asi ma kẹ osuka fị anga mẹ ḅụ koroma tẹ mu fa gberie ḅe ḍọkị nwenii mḅọ ori ẹrị ḅa. 5Ọ̀ fa ye ḅe ẹrị sakị, opu ḅioḅẹlẹ ḅụ ori ọ̀ kẹ apana ọgọnọ gbana 6tẹ kẹ so warị mu ḅa. Anịtẹso ori ori ikiapụ na ori na kpeki tẹ anga apụ na sin kobiri tẹ ịn ḅẹẹ ḅa, ‘Ì ḅioḅẹlẹ lamarị, ị̀ anana fa ye ḅe paka-ḅo tẹ. Ó yee wa anị gotẹ tii kọn!’ 7Anị gbọrụ ḅara ḅụ, à ḍuko ọ́ pịrịarị, ọkọ nẹngị ḅioḅẹlẹ So-ḅio sime kẹ gbọrụ si-mịẹḅọ tẹ si ḅụ pịkị ḅọ pịrị kẹ karakara wararị gbọrụḅọ fa kịnị sọnọa si tẹ si ḅụ pịkị ḅịa apụ nẹngị ḅa.

Jizọsị Fatẹ Igbigi Egberi Gbaam

8“Anịanịa, kẹ ọkị, gbọrụ ẹrẹḅọ oyia seleḅa igbigi nyana tẹ gberie warị ḅio siin-koro fa kụma, á tiye mịẹ ḅẹ? Á tọnjọ tọnjị tẹ warị mẹ ọfịn tẹ ḍọkị nwenii árị anị ẹrị ḅa. 9Árị anị ẹrị sakị, árị árị ikiapụ na árị na kpeki tẹ anga apụ na sịn kobiri tẹ ịn ḅẹẹ ḅa, ‘Ì ḅioḅẹlẹ lamarị, ì igbigi tẹ fa ye mẹ paka-ḅo tẹ. Ó ye wa anị gotẹ tii kọn!’ 10Anị gbọrụ ḅara ḅụ, à ḍuko ọ́ pịrịarị, anie Tamụnọ enjẹlị gbọrụ si-mịẹḅọ tẹ si ḅụ pịkị ḅọ gotẹ ḍerekuarị ḅara.”

Jizọsị Fatẹ Tụḅọ Egberi Gbaam

11Jizọsị nwẹnị pịkị ḅẹẹ, “Gbọrụḅọ maa owiapụ-awọmẹ iyim. 12Kalaḅọ ḅe nwẹnị ọ̀ ḍa ḅẹẹ, ‘Ḍa, ị́ ngọ ḍie tẹ ị̀ la kiri kẹ ị̀ pịrịị mịọkụ.’ Mie ḅụ tomḅọ ḅe nwẹnị ori ngọ ḍie ori maa awọmẹ ma pịrị. 13Boowa aḍin ḅọrọ tẹso, kalaḅọ ḅe nwẹnị ọ̀ la kiri mẹ dẹrị tẹ igbigi mẹ kẹ so iḅere-iḅerea anga simearị ama mu, tẹ arịmgba kẹ woso-woso ḍumo kọn fama. 14Ọ̀ ḅara sime ye, sime ye fa tẹso, opu ḅuru-ḅa nwẹnị anị ama mẹ gbaịn, anị sakị ọ̀ ḅara gberie-sọ ḅarị kọn-a. 15Mie ḅụ anị ama ḅẹ gbọrụḅọ nwẹnị kọrịnama kẹ ọ̀ pịrị mịnẹ ò mu opuropo ma ḍikiḍiki ọ̀ pịrịị ọ̀ ḍụọ ḅio. 16Ọ̀ sịn ḅara opuropo ma fịarị akịdị ḅụ ori sọ ye fị ḅarị ḅoto, kụma gbọrụḅọ-sọ ye kẹ ọ̀ pịrị fị-a. 17Kunoma ḅụ ọ̀ nwẹnị naa-ḅo tẹ amịna ḅụụ ḅẹẹ, ‘Ị̀ ḍa ọkọ wararị kọrịnama kọrị apụ mamgba fịye fị furo ḅinma, ḅinma tẹ kọn ye nyana wararị, tẹ mịanga ḅuru ị̀ ḅaa ḅẹ-yearị! 18À saakị tẹ ị̀ ḍa ḍọkụma-mu tẹ ḅẹẹ ḅa, Ḍa, à si kẹ Tamụnọ mịẹ tẹẹ, pịkị sọ, 19à ḅarị jen kẹ ị́ tụḅọ fị na-iḅi-a; ị̀ kẹ ị́ ọkọarị kọrịnama-kọrịapụ ma ḅẹ gbọrụḅọ ḅara wẹrịị.’ 20Mie ḅụ ọ̀ nwẹnị saakị tẹ mẹnjị pịkịma so ọ̀ ḍa dama-mu.

“Amụ ò ḅo warị kpeki-a ogbo ọ̀ ḍa nwẹnị ori ẹrị ala-jụ ḅụ. Anị gbọrụ kiri tụḅọ ḅe ọkụrụkụrụ ọ̀ ḅaa, tẹ ọ̀ nwẹnị mangị mu tẹ ḅẹlẹma ḅara ḅụ ekpe kẹ ọ̀ lama. 21Tẹ tụḅọ ḅe nwẹnị ḅẹẹ, ‘Ḍaa, à si kẹ Tamụnọ mịẹ tẹẹ, pịkị ị́yẹrị sọ. À ḅarị jen kẹ ị́ tụḅọ fị na-iḅi-a.’ 22Kụma ḍaḅọ ḅe nwẹnị ọ̀ fịrịmẹnjịapụ sịn tẹ ḅẹẹ, ‘Ọ́ fọnya mu iḅitẹịn kapa mẹ kẹ ḅo ọ̀ sụa, ó gulu kẹ ọ̀ ḅara-tụngbalị sụa, pịkị okuro kẹ ori aḅụọ sụa. 23Anịtẹso ó mu tim-timtẹ nambulo ḅe ọkị tẹ ḅaa, tẹ wa alalị fị tẹ tii kọn. 24Gbala ḅie ị̀ tụḅọ ḅe ọ̀ fịịm, kụma mịọkụ ò ḍumo tẹ; ọ̀ faam, kụma mịọkụ ọ̀ paka-ḅo tẹ!’ Tẹ ịn nwẹnị saakị alalị mẹ fị.

25“Anị sakị omongiḅọ ḅe piri-ḅio emi. Ọ̀ pịkịma ḅo warị kpeki tẹso, ọ̀ nwẹnị in su-na-sẹkị-naarị ye mẹ naa. 26Mie ḅụ ọ̀ gbọrụ fịrịmẹnjịḅọ sịn tẹ ò gbelam, ‘Warị ḅio tiye ḅọrọ pakarị?’ 27Fịrịmẹnjịḅọ ḅe nwẹnị pakịrị, ‘Í iyimbere pịkịma ḅo warị la tẹ, tẹ ò ḍumo na oju iḅi na kẹ ḅo la ye mẹ gotẹ ị́ ḍa tim-timtẹ nambulo ḅe ḅaa tẹ.’

28“Ye mẹ omongiḅọ ḅe ḅụụ-ḅẹsọ la ḅara gotẹ ọ̀ ḅarị warị sọ ḍụkụ-a; mie ḅụ ọ̀ ḍa nwẹnị paka-ḅo tẹ ọ̀ tẹkẹ mịnẹ ọ̀ warị sọọ. 29Kụma ọ̀ nwẹnị ọ̀ ḍa pakịrị, ‘Ị́yẹrị sọ ḍikii, mịna akụra mamgba à nwẹn kẹ omoni fịrị mẹnjị ị́ pịrị tẹ, jene-jene amụ àrị ị́ ḅịḅị kan-a. Í tiye kẹ ị̀ pịrị tẹ? Gbọrụ oḅori tụḅọ kịngẹ sọ amụ ị́ kẹ ị̀ pịrị tẹ à kẹ ì ikiapụ na alalị fị-a! 30Kụma ị́ aị mamgba ọkị mu ama mẹnjị ereme na fama, fama wararị tụḅọ ḅe ḅo gbọrụ sakị í tim-timtẹ nambulo ḅe ḅaa ọ̀ pịrị tẹ!’ 31Ḍaḅọ ḅe nwẹnị pakịrị, ‘Ị̀ tụḅọọ, sakị mamgba ị́yẹrị kọkọ ị̀ na emi, à nyana ye, nyana ye í nye. 32Kụma wa alalị fị tẹ ḅioḅẹlẹ na-iḅim, í iyimbere ḅe ọ̀ fịịm, kụma mịọkụ ọ̀ ḍumo tẹẹ; ọ̀ faam, kụma mịọkụ ọ̀ paka-ḅo tẹẹ.’”

Currently Selected:

Luku 15: KBTP

Highlight

Copy