Luku 18
18
Jizọsị Diḅọ-fịtẹ-ẹrẹḅọ Na Ḅẹrẹkọnḅọ Na Egberi Gbaam
1Anịtẹso Jizọsị egberi gbaa ò ḍukamẹnjịapụ ma pịrịm, kẹ ye kẹ in toluma mịnẹ ịn sakị mamgba tẹkẹẹ, tẹ gbala-gbala ḅioḅẹngbọ ḅịkị nyana ma. 2“Gbọrụ ḅẹrẹkọnḅọ gbọrụ ama ḅụ simem. Ọ̀ Tamụnọ ḍiki-ḅalafa-a, pịkị gbọrụ tomḅọ sọ kẹ ye-sịn-a. 3Anị sakị anị gbọrụ ama mẹ ḅụ gbọrụ diḅọ-fịtẹ-ẹrẹḅọ sọ simem, tẹ ma ẹrẹḅọ ma sakị mamgba ḅẹrẹkọnḅọ ḅe dama-ḅo ḅo tẹ ọ̀ ḅẹẹarị ori árị na fịya-a apụ na árị na ogboku á karakara kọn pakama-ḅo á pịrịị. 4Tọnwa-tọnwa ḅẹ asakị á nwẹn kẹ ọ̀ dama-mum, kụma ọ̀ ḅụụ ḅẹrẹ-a, anị ḅẹ kunoma ọ̀ nwẹnị ọ̀ ḅụụ ḅẹẹ, ‘Tomi-juḅẹye, à Tamụnọ ḍiki-ḅalafa-a, pịkị tomi kẹ ye-sịn-a ḅẹsọ, 5ma diḅọ-fịtẹ-ẹrẹḅọ ma kẹ ị̀ ḅụụ-fụkama la tẹ ḅara gotẹ àrị ẹrị ḅa mịnẹ árị á karakara mẹ nyanam, anieofori á nwẹn ḅo-ḅo-ḅoarị ye mẹ ị̀ ḅalaḅalama ḅaa ḅa!’ ”
6Tẹ KỊNỊNYANAḄỌ ḅe nwẹnị pịkị ḅẹẹ, “Anị si ḅẹrẹkọnḅọ ḅe ḍuko ye mẹ pokii. 7Mịọkụ, ọ́ sịn-arị Tamụnọ iḅi ḅẹrẹkọn ori atomi pịrị ḅịa, ḍin na eneḅaka na kẹ owu ọ̀ pịrị tẹ ọ̀ ḅara ḅụ ḅarasụa ḅiiarị apụ ma? Ọ̀ sakị fama ḅẹ, ḅarasụa ịn pịrị ḅụ? 8À ḍuko ọ́ pịrịarị, ori iḅi ḅẹrẹkọn ịn pịrị ḅa, sakị fama-a ḅara. Kụma Tomḅọ Tụḅọ ḅe ḅo ḅarị sakị tomikiri ḅụ ò gbeke minini nyana apụ ḍọkị-ẹrị ḅẹ?”
Jizọsị Farịsiiḅọ Na Ama-Igbigi Da Ḅọ Na Egberi Gbaam
9Jizọsị nwẹnị pịkị mị egberi mẹ gbaa amịna ḅụụ kẹ iḅi-apụ sịn tẹ ja apụ ḍiki-simarị apụ ma pịrị. 10“Maa apụ gbọrụ sakị Tamụnọ-warị mẹ ḅio tẹkẹ ḅẹ mum, gbọrụḅọ Farịsiiḅọ, osi-ḅọ ama-igbigi da ḅọ.
11“Farịsiiḅọ ḅe nwẹnị sikima ḅele tẹ tẹkẹ, ‘Tamụnọ, àrị ịmịẹtẹ kẹ ị́ ḅẹẹm, mịnẹ à ja tomi sime-ḅara sime-a — opu pọkọ-ḅẹngbọ sụa, ja apụ mingirima, anịanịa sẹfị ma ḅọrọ. Ịmịẹtẹ mịnẹ àrị anịanga simearị ama-igbigi da ḅọ ḅe na kịka-a. 12Gbọrụ fẹnị anga ḅụ maa ene à nwẹn kẹ ḅuru-ịmọarị, à nyana ye, nyana ye à pịkị kẹ oyia akiri ḍiya tẹ gbọrụ kiri kẹ ị́ pịrịarị.’
13“Kụma ama-igbigi da ḅọ ḅe nwẹnị sikima ḅele tẹ sịẹsime, tọrụ sọ ọ̀ saakị so ḍiki-a, kụma ọ̀ ḅara kẹ ekpe fomu tẹ ḅẹẹm, ‘Tamụnọ, ì ḍiki-tọrụ-kụrụkụrụụ, yẹrị si-ḅọọ!’ 14#Mat 23.12; Luk 14.11Jizọsị nwẹnị ḅẹẹ, à ḍuko ọ́ pịrịarị, ama-igbigi da ḅọ ḅe mie Tamụnọ na ḅẹrẹ-fama tẹ ye, ọ̀ warị la sakị, Farịsiiḅọ ḅe-a. Gbala amịna ḅụụ gelema ḅọ, gelema ḅọ ini mḅọ iderima ḅa, tẹ amịna ḅụụ iderima ḅọ, iderima ḅọ ini mḅọ kẹ opu sọma ḅa.”
Jizọsị Kala Awọmẹ Bomam
(Mat 19.13-15; Mak 10.13-16)
15Ja atomi nwẹnị ḅara-ḅio dogiarị awọmẹ kẹ ḅo Jizọsị pịrị mịnẹ ọ̀ ḅara kẹ ịna ọgọnọ gbanaa. Ò ḍukamẹnjịapụ ma ini ẹrị sakị ini in ḍiki ịganịm ini ọkọ mịẹ ye gotẹ. 16Kụma Jizọsị awọmẹ ma sịn ọ̀ ḅụụ pịrị tẹ ḅẹẹm, “Ọmịnị awọmẹ ma wẹrịso ini ị̀ ḍọkụma-ḅo, ịn dasịẹma ma, gbala ini ma sime-ḅara sime apụ anie Tamụnọ Ama-da mẹ sime pịrị yee. 17Ó mie kẹ ḅiokoromaa! Kalatụḅọ ḅara kẹ Tamụnọ Ama-da mẹ ọkị-a ḅọ ọkị-a ḅọ, mḅọ anị suku-ḅio simearị tomḅọ nwẹn sọ ḅịa gbamasom.”
Ngọ-Kọnḅọ Ḍumo Gbamaso Ḅẹ Ḅara Gbelam
(Mat 19.16-30; Mak 10.17-31)
18Juu-ḅẹ gbọrụ sịḅịdaḅọ nwẹnị Jizọsị ḅii, “Iḅi Ye-tolumaḅọ, à tiye mịẹ tẹ sime gbamaso ḍumo nyana ḅẹ?”
19Jizọsị nwẹnị ò gbela, “Í tiegotẹ iḅi-ḅọ kẹ ị̀ sịn-arị? Gbọrụḅọ-sọ iḅi-a Tamụnọ ngẹrị sikima. 20#Pks 20.14; Dit 5.18; Pks 20.13; Dit 5.17; Pks 20.15; Dit 5.19; Pks 20.16; Dit 5.20; Pks 20.12; Dit 5.16Oloko ma í nimi wararị: ‘Sẹfị ma; kịnị-ḅa ma; furu ma; iruo ḅẹrẹ kẹ gbọrụḅọ-sọ sịḅị sẹịn ma; ị́ ḍa na í iyingi na kụn.’ ”
21Tomḅọ ḅe nwẹnị pakịrị, “Ị̀ ịwọ sakị kụra-ḅio à mịna oloko ma kokoarị.”
22Jizọsị mie naa sakị, ò tomḅọ ḅe ḅẹẹm, “Gberie paa kọn wararị tẹ ị́ mịẹ na-iḅi ye. Ị́ nyana aị mamgba dẹrị tẹ igbigi mẹ kẹ igoin-apụ pịrị, anịsakị So-ḅio ị́ ngọ nyana ḅa; tẹ ḅo tẹ ì ḍukamẹnjịị.” 23Tomḅọ ḅe mie naa sakị, ọ̀ kọọn sara ngọ gotẹ, anị nwẹnị ò ḅioḅẹngbọ sima lama.
24Jizọsị tomḅọ ḅe ḅioḅẹngbọ siye mẹ ẹrị tẹ ḅẹẹm, “Ngọ-kọnapụ ḅo Tamụnọ Ama-da mẹ suku-ḅio simearị atomi sọ mẹ kpọma ḅụụ-fụkamam! 25Ngọ-kọnḅọ ḅo Tamụnọ Ama-da mẹ suku-ḅio simearị tomḅọ sọ mẹ kpọma ḅụụ-fụkama ike-sụa-nama laga tọrụngbọ tolu-ḅọrọ nẹngịm.”
26Ò ḍuko ye naa apụ nwẹnị gbela, “Ọkọ kụma tụḅọ inetẹ ḅọrọma ḅẹ?”
27Jizọsị nwẹnị pakịrị, “Tomḅọ inetẹ mịẹ ḅịa ye Tamụnọ inetẹ mịẹ ḅa.”
28Anịtẹso Pita ḅẹẹm, “Ḍikii! Wa wamịna awarị koroma-so tẹ í ḍukamẹnjịarị.”
29Jizọsị nwẹnị ịn ḅẹẹ, “Ọkọọ, tẹ à mịẹtẹ ó nimiarị, mịnẹ ḅẹḅọ-ḅẹḅọ tẹ Tamụnọ Ama-da mẹ gotẹ warị, anịanịa taḅọ, anịanịa owiapụ-amịnapụ, anịanịa ḍaḅọ-na-iyingiḅọ-na, anịanịa awọmẹ koroma-so ḅọ, 30mị tomikiri mẹ ḅụ tọnwa aị nyana ḅa tẹ pịkị sime-gbamaso ḍumo nyana ḅa ḅo ḅarị tomikiri mẹ ḅụ.”
Jizọsị Tẹra Sakị Karamaye Kẹ Ọ̀ Fịị Gbolomaye Ḍukom
(Mat 20.17-19; Mak 10.32-34)
31Jizọsị nwẹnị ò Ḍukamẹnjị Oyi Maa apụ Finji ma sịn sikima tẹ ịn ḅẹẹ, “Ó pokii! Wa Jeruselemu muarị, anịanga ịkịankoro apụ ma Tomḅọ Tụḅọ ḅe ḅụ kẹẹ ye goyegoye paka fama ḅa. 32Juu-ḅẹ-apụ ma ọ̀ saḅama igoniapụ ma pịrị tẹ ini ò kombo ḅa; ini ọ̀ mịẹ-sima tẹ pịkị fịla kẹ ori isi ḅa. 33Ini ò fomu tẹ ọ̀ ḅaa ḅa, kụma tẹra aḍin karama ene ḅụ ọ̀ saakị tẹ ḍumo ḅa.”
34Kụma mịna aị ma ḅẹ gberie fie ye sọ ò ḍukamẹnjịapụ ma naa-a; ẹkwẹn ma fie ye ịna ḅụ kikimam, tẹ Jizọsị ḍuko ye mẹ ini anị nimi-a.
Jizọsị Tọrụngbọ-Pụụntẹ Ye-ḅiiḅọ Gwọm
(Mat 20.29-34; Mak 10.46-52)
35Jizọsị ḅo Jeriko kpeki sakị gbọrụ tọrụngbọ-pụụntẹḅọ etela akaka lẹgị tẹ ye ḅiiarị. 36Ò tomina-ogbo ḅọrọarị ye mẹ naa sakị ọ̀ nwẹnị gbela, “Mie ḅọrọ tiye?”
37Ịn nwẹnị ḍuko ọ̀ pịrị, “Nazarẹtị ḅẹ Jizọsị mẹnjị-ḅọrọarị.”
38Ọ̀ nwẹnị oloku pakama, “Jizọsị Devidi Tụḅọ! Ọkụrụkụrụ nyana ị̀ pịrịị!”
39Tọrọkọ sime atomi ma nwẹnị ò ḍiki ịganị tẹ ọ̀ ḅẹẹ mịnẹ ọ̀ ḅịḅị gbaịn. Kụma ori paa kụrọma olokuarị, “Devidi Tụḅọ! Ọkụrụkụrụ nyana ị̀ pịrịị!”
40Mie ḅụ Jizọsị nwẹnị daasịẹ tẹ ḅẹẹ mịnẹ ịn tọrụngbọ-pụụntẹḅọ ḅe kẹ ḅo ọ̀ pịrịị. Ò ḅo kpeki tẹso, Jizọsị ò gbelam, 41“Í ḅiiarị à tiye mịẹ ị́ pịrị?”
Ọ̀ nwẹnị pakịrị, “Ị̀ Nyanaḅọ, à ḅiiarị à pịkị siin ye ẹrị.”
42Jizọsị nwẹnị ọ̀ ḅẹẹ, “Ọkọ ḅẹḅẹ ye ẹrịị! Í minini mịẹtẹ ị́ gwọ tẹ.”
43Anị gbọrụ sakị ḅụ ọ̀ nwẹnị inetẹ ye ẹrị, tẹ Jizọsị ḍukamẹnjị, tẹ ịmịẹtẹ kẹ Tamụnọ ḅẹẹ. Tomina-ogbo mẹ anị ẹrị sakị inimgba Tamụnọ tokinim.
Currently Selected:
Luku 18: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
