Luku 19

Jizọsị Zakịyọsị Warị Mum

1Jizọsị mẹnjị ma-mu Jeriko ḅio tolu-ḅọrọarị sakị 2ama-igbigi da apụ sịḅịdaḅọ, Zakịyọsị nwẹn-sịn gbọrụḅọ, simem. Ori iḅiọkụ ngọ kọnm. 3Ò Jizọsị ẹrị ḅẹ ḍọkị lamam, kụma ọ̀ kpụlụ lama wararị ẹrẹsị tomina-ogbo mẹ ọ̀ tọrụ kikima tẹ ori inetẹ Jizọsị ẹrị-a. 4Mie ḅụ ọ̀ nwẹnị mangị tomi ma tọrọkọ-pẹlẹma tẹ mu sịkamọ nwẹn-sịn gbọrụ opu sịn kpọlị, Jizọsị anịanga ḅọrọ ḅẹ sakị ori ori ẹrị ḅẹ ḅara. 5Jizọsị ḅo sịn mẹ suku la tẹso, ọ̀ nwẹnị tọrụ saakị ḍiki tẹ ọ̀ ḅẹẹ, “Zakịyọsị, fọnya koro-ḅoo, mịmgba àrị ị́ warị sime ḅa.”

6Zakịyọsị nwẹnị fọnya koro ḅo, tẹ opu ḍereku ḅụ Jizọsị da warị suu. 7Anị ẹrị apụ mamgba nwẹnị saakị mbụrụmbụrụ; “Ḅị tomḅọ ḅe igoni kẹ si-mịẹḅọ ḅe warị bịan-arị ḅara ḍikii!”

8Zakịyọsị nwẹnị saakị sịẹ tẹ KỊNỊNYANAḄỌ ḅe ḅẹẹ, “Ị̀ nyanaḅọ, ì pokii! À nyana aị mamgba à kẹ maa anga ḍie tẹ gbọrụ anga kẹ igoin-apụ pịrị ḅa, à pịkị inoma ḅara kẹ ḅara ḅụ ye ọkị ḅọ emi-emii àrị anị ḅẹ inia akiri kẹ mḅọ gbẹẹ ḅa.”

9Jizọsị nwẹnị ọ̀ ḅẹẹ, “Mịmgba ḅọrọma ḅo mị warị la tẹ; ḅieḅe sọ kọkọ Ebira-amụ furo-ḅẹ-ḅọ. 10#Mat 18.11Fa apụ ḍọkị tẹ ịn ḅọrọma mie Tomḅọ Tụḅọ ḅe gotẹ ḅo ye.”

Jizọsị Golu-golu Igbigi Egberi Gbaam

(Mat 25.14-30)

11Tomi ma paa ò pokiarị ogbo Jizọsị jen egberi gbaa ịn pịrịm. Anị sakị ò Jeruselemu kpeki lama tẹ, tẹ tomi ma ọkịm mịnẹ Tamụnọ Ama-da mẹ tolu paka-ḅo ḅẹ tẹẹ. 12Mie ḅụ ọ̀ ḅẹẹm, “Gbọrụ sakị ḅụ opu kiri la tẹ gbọrụ opu tomḅọ, ini ọ̀ kẹ ama-dama ḅẹ tẹ jen ama mum, anịtẹso ọ̀ nwẹnị tọn mịnẹ ọ̀ pịkịma so ori ama mu ḅa. 13Tẹrẹmẹ ori ama koroma-so ọ̀ nwẹnị ori afịrịmẹnjịapụ sịn, ini oyi apụ, tẹ golu igbigi, gbọrụḅọ gberie, gberie kẹ ịn pịrị tẹ ịn ḅẹẹ, ‘Ọ́ kẹ tuḅokọn tẹ sọye mịẹ à so wararị sakị.’ 14Tomḅọ ḅe ama ḅẹ apụ ọ̀ ḅẹlẹma-a ẹrẹsị ịn nwẹnị oku fịrịma ò tongu pono mu mịnẹ ịn ḅarị ḅii-a ori ịna ama-da.

15“Tomḅọ ḅe mu osi ama mẹ ọkị da tẹso, ọ̀ pịkịma-ḅom. Ò ḅo la gbọrụ sakị ọ̀ nwẹnị ori afịrịmẹnjịapụ apụ ma sịn ḅo, ịn mịẹ tẹ sọye nimi ḅẹ ḅara. 16Tarị ḅọ ḅe ḅo tẹ ḅẹẹm, ‘Ị̀ nyanaḅọ, ị́ kẹ ị̀ pịrị golu igbigi mẹ à kẹ ja oyi ḍọkị-ḅo tẹ.’ 17Ọ̀ nwẹnị ḅẹẹ, ‘Mịẹ ḅaka, iḅi fịrịmẹnjịḅọọ. Í ye kalịye ọlọ kpaịnmam ẹrẹsị àrị ị́ kẹ oyia opu ama sịḅị dama ḅa.’ 18Maaịn karama ḅọ ḅe ḅo tẹ ḅẹẹm, ‘Ị̀ nyanaḅọ, ị́ kẹ ị̀ pịrị golu igbigi mẹ à kẹ ja sọnọ ḍọkị-ḅo tẹ.’ 19Ọ̀ nwẹnị ḅieḅe ḅẹẹ, ‘Ị́yẹrị sọnọ opu ama ḍikiḍiki ḅa.’

20“Jen fịrịmẹnjịḅọ ḅo tẹ ḅẹẹm, ‘Ị̀ nyanaḅọ, mie í golu igbigi, à pọkụtankịsị kẹ anị fịna tẹ kẹ ḅọịm. 21Ị́yẹrị ị́ ḅẹrẹ kpọm, ị̀ ḅalafaam. Í nye-a ye sọ ị́ ọkịarị, í ye ḍiḅi-a anga sọ í ye sokuarị.’ 22Ọ̀ nwẹnị ọ̀ ḅẹẹ, ‘Ị́yẹrị lala-si fịrịmẹnjịḅọ, ị́ ḅịḅị paka-ḅo ẹkwẹn mie à kẹ ḅẹrẹ-pẹlẹ ị́ pịrị ḅarịye! Í nimim mịnẹ ị̀ ḅẹrẹ kpọm, ì nye-a ye sọ àrị ọkịarị, à ye ḍiḅi-a anga sọ à ye sokuarị. 23Ọkọ kụma tiye ẹrẹsị í ì igbigi mẹ kẹ igbigi wẹrị anga ḅụ suu-a? Mimgbe à pịkịma ḅo sakị àrị anị na anị ḅẹ sọye na ọkị tịya.’

24“Anịtẹso ọ̀ nwẹnị anịanga sịẹsime apụ ma ḅẹẹ, ‘Ọmịnị ọ̀ ḅara golu igbigi mẹ ọkị tẹ kẹ oyi nyana fịrịmẹnjịḅọ ḅe pịrịị.’ 25Kụma ịn nwẹnị ọ̀ ḅẹẹ, ‘Wanyanaḅọ, ori ọ̀ kọkọ oyi nyana wararị!’ 26#Mat 13.12; Mak 4.25; Luk 8.18Ọ̀ nwẹnị pakịrị, ‘Ó nimi-a ḅẹḅẹ ó nimii, ye ḅara ḅụ sime-ḅọ mẹ in jaị kẹ sụa mḅọ pịrị ḅa; anịsakị ye ḅara ḅụ ofori ḅọ mẹ mḅọ ḅara sime kalịye sọ ini mḅọ ḅara ọkị ḅa. 27#Mat 25.14-30Ndẹẹ mịanga sime tẹ ì ḍiki-ḅioḅu tẹ ḅẹẹm yẹrị ḅarị ama-dama ḅẹẹ apụ ma? Ọmịnị ịn fọnọ pakama-ḅo tẹ ịn ḅaa ị̀ tọrọkọ!’ ”

Jizọsị Owu Ḅara Iḅi-ḅọ Ḅara Kẹ Jeruselemu Sọ-mum

(Mat 21.1-11; Mak 11.1-11; Jọn 12.12-19)

28Jizọsị miemẹ ḍuko tẹ nwẹnị ịn ḅọrọ tẹ tọrọkọ-tọrọkọ so Jeruselemu mu. 29Ò ḅo Bẹtịfeji na Bẹtani na kpeki tẹso, Olivu Tụndụ mẹ ḅụ, ọ̀ nwẹnị ò ḍukamẹnjịapụ ma ḅẹ maa apụ fịrịma 30tẹ ịn ḅẹẹ, “Ọ́ tọrọkọ-jụ simearị kala-ama mẹ muu, tẹ ọmịnị ama mẹ ḅio sọ sakị ọ́ kịnị amụ kpọlị tẹ kẹ mẹnjị-a yedogi-nama ẹrị ḅa, ini ọ̀ kẹ kpọ wẹrị wararị, ọmịnị ò fima ḅoo. 31Ọmịnị ò fimarị ogbo kịnị ó gbela mịnẹ ó tiegotẹ nama ḅe fimarị ḅẹḅẹ, ọ́ ḅẹẹ mịnẹ Sịḅịdaḅọ ḅe ọ̀ kẹ ye mịẹ ḅẹ-ḅiiarị.”

32Ịn nwẹnị mu tẹ Jizọsị ḍuko ḅara, ḍuko ḅara kẹ ye ẹrị. 33Ịn nama ḅe fimarị ogbo mie nyana apụ ḅo in ḅii ye, “Ó tiegotẹ ò fimarị?”

34Ịn nwẹnị pakịrị, “Sịḅịdaḅọ ḅe ọ̀ kẹ ye mịẹ ḅẹ-ḅiiarị,” 35tẹ ịn nwẹnị yedogi-nama ḅe ọkị mu Jizọsị pịrị. Anịtẹso ini ịna ọgọnọ ḅẹ akapa sin tẹ kẹ nama ḅe ọgọnọ dẹẹ tẹ ḅarasụa Jizọsị pịrị tẹ ọ̀ kpọlịm. 36Ọ̀ nwẹn nama ḅe ọgọnọ sime tẹ muarị sakị tomi ma ịna ọgọnọ ḅẹ akapa sin, sin tẹ kẹ etela mẹ dẹẹarị.

37Ò ḅo Jeruselemu kpeki tẹso, etela mẹ Olivu Tụndụ mẹ ḅụ tuuideriarị anga mẹ ḅụ, ò ḍukamẹnjịarị opu inweni-ogbo mẹ saakị oloku tẹ ịmịẹtẹ kẹ Tamụnọ ḅẹẹ ḅẹẹ tẹ ò tokinim, ini ẹrị opu aị mamgba gotẹ, 38#Dev 118.26“Tamụnọ, KỊNỊNYANAḄỌ ḅe ẹrẹ ḅụ ḅoarị Amadaḅọ ḅe bomaa! Dein So-ḅio simee, ebube sime Tamụnọ pịrịị!”

39Anịtẹso Farịsii-ḅẹ ja apụ tẹ inweni-ogbo mẹ ḅụ sime apụ nwẹnị Jizọsị ḅẹẹ, “Ye-tolumaḅọ, í ḍukamẹnjịapụ ma ḅẹẹ ịn ḅịḅị gbaịn!”

40Jizọsị nwẹnị pakịrị, “À ḍuko ọ́ pịrịarị, ini ḅịḅị gbaịnm ḅẹḅẹ mịna aḍụḅarị ma ḅioju saakị oloku pakama ḅa.”

Jizọsị Jeruselemu Gotẹ Owum

41Ò ḅo opu ama mẹ kpeki tẹ anị ẹrị tẹso, ọ̀ nwẹnị anị gotẹ owu, 42tẹ ḅẹẹ, “Mimgbe mịmgba ḅẹ eneḅaka mẹ ḅụ í dein ḅọrọ ḅo ị́ la ḅẹ ḅọkọ nimi namịna! Kụma mịọkụ ị́ ḅarị inetẹ anị ẹrị ḅịa! 43Sakị ḅo ḅa, tẹ ị́ na fịya-a apụ anga na, anga na ḅụ í gbori-ikelema tẹ, etela kiki ị́ pịrị tẹ, mẹnjị ḅo ị́ bịan sịẹ ḅa. 44Ini ị́ kan sara fama tẹ í ḅio sime atomi mamgba ḅaa fama ḅa. Ịn kẹ í onu mẹ nama wararị aḍụḅarị mamgba jen ḅarị jen ọgọnọ sime ḅịa, mie mẹmgba dogi ḅoarị ye anie Tamụnọ ḅarana ḅo ị́ ḅọrọma ḅẹ sakị mẹ í lekiri-a ẹrẹsị!”

Jizọsị Tamụnọ-warị Mẹ Sọ-mum

(Mat 21.12-17; Mak 11.15-19; Jọn 2.13-22)

45Anịtẹso Jizọsị Tamụnọ-warị mẹ mu tẹ anịanga ḅụ tuḅokọn sime apụ mamgba dee pakama, 46#Ayị 56.7; Jer 7.11tẹ ịn ḅẹẹm, “Fịafịa Ḍiri mẹ ḅio anị kọkọ kẹẹ wararị mịnẹ Tamụnọ ḅẹẹm, ‘Ị́ warị mẹ ịn kẹ anị sịn ḅarịye tẹkẹ-warị’, kụma ọmịnị anị kẹ furu apụ ḅọị anga mịẹ tẹ!”

47 # Luk 21.37 Ene-ḅaaene-ḅaaene Jizọsị mu Tamụnọ-warị mẹ ḅio ye tolumam. Anị sakị agbamịẹapụ ma na, Oloko toluma apụ ma na, tomi ma sịḅịdapụ ma na ọ̀ ḅaa ḅẹ ḅọkọ ḍọkịm. 48Kụma sakị mamgba ò tolumaye mẹ pokiarị atomi ma gotẹ ini ine-a; tomi ma ḅii-a ori ẹkwẹn ma ḅẹ gbọrụmgbọ-sọ ịn gbarị.

Currently Selected:

Luku 19: KBTP

Highlight

Copy